സൈനികരുടെ ആത്മഹത്യയെക്കുറിച്ച് കേന്ദ്ര ആഭ്യന്തര മന്ത്രാലയത്തിന്റെ ഞെട്ടിക്കുന്ന വെളിപ്പെടുത്തല്‍. കഴിഞ്ഞ ആറ് വര്‍ഷത്തിനിടെ 700ല്‍ അധികം സൈനികര്‍ ആത്മഹത്യ ചെയ്തതായാണ് പാര്‍ലമെന്ററി പാനലിന് സമര്‍പ്പിച്ച റിപ്പോര്‍ട്ടില്‍ കേന്ദ്ര ആഭ്യന്തര മന്ത്രാലയം അറിയിച്ചത്. ഏറ്റുമുട്ടലുകളേക്കാള്‍ സൈനികരുടെ ജീവനെടുക്കുന്നത് ഇത്തരം ആത്മഹത്യകളാണ്. പ്രാദേശികമായ പ്രശ്‌നങ്ങളും ജോലിയ്ക്കിടയിലെ വിരസതയും വ്യക്തിപരമായ കാര്യങ്ങളുമാണ് സൈനികരെ ആത്മഹത്യകളിലെത്തിക്കുന്നതെന്നും മുതിര്‍ന്ന ബി.ജെ.പി നേതാവ് മുരളീ മനോഹര്‍ ജോഷി അദ്ധ്യക്ഷനായ പാര്‍ലമെന്ററി പാനലിന് മുമ്പാകെ സമര്‍പ്പിച്ച റിപ്പോര്‍ട്ടില്‍ തുടരുന്നു.

കേന്ദ്ര സായുധ സേനകളിലെ 700ല്‍ അധികം അംഗങ്ങള്‍ സ്വയം ജീവനൊടുക്കി. ഓരോ വര്‍ഷവും 9000 സൈനികര്‍ സ്വയം വിരമിക്കാറുണ്ട്. 2012 മുതലുള്ള കാലയളവില്‍ 189 സി.ആര്‍.പി.എഫ് ജവാന്മാര്‍ ജീവനൊടുക്കിയപ്പോള്‍ 175 പേര്‍ക്ക് വിവിധ ആക്രമണങ്ങളിലും ജീവന്‍ നഷ്ടമായി. 529 ബി.എസ്.എഫ് ജവാന്മാര്‍ 2001 മുതലുള്ള കാലയളവില്‍ ആത്മഹത്യ ചെയ്തപ്പോള്‍ 491 പേരാണ് വിവിധ സൈനിക നടപടികള്‍ക്കിടയില്‍ കൊല്ലപ്പെട്ടത്. ഇന്‍ഡോ ടിബറ്റന്‍ ബോര്‍ഡര്‍ പൊലീസ് സേനയിലും ആത്മഹത്യ ഉയരുന്നുണ്ട്. 2006 മുതലുള്ള കണക്ക് അനുസരിച്ച് 62 പേര്‍ ആത്മഹത്യ ചെയ്തുവെന്നും ഈ കാലഘട്ടത്തില്‍ 16 പേര്‍ ആക്രമണങ്ങളില്‍ കൊല്ലപ്പെട്ടതായും റിപ്പോര്‍ട്ടില്‍ തുടരുന്നു. 2013 മുതലുള്ള കണക്കനുസരിച്ച് സി.ഐ.എസ്.എഫിലെ 63 സൈനികര്‍ ആത്മഹത്യ ചെയ്തിരുന്നു. എന്നാല്‍, ഈ കാലയളവില്‍ ആക്രമണത്തില്‍ ഒരാള്‍ മാത്രമാണ് കൊല്ലപ്പെട്ടത്. 2014 മുതലുള്ള കണക്ക് അനുസരിച്ച് ആസാം റൈഫിള്‍സിലെ 27 സൈനികര്‍ ആത്മഹത്യ ചെയ്യുകയും 33 പേര്‍ ആക്രമണങ്ങളില്‍ കൊല്ലപ്പെടുകയും ചെയ്തിട്ടുണ്ട്.

മാസങ്ങളോളം സ്വന്തം വീട്ടില്‍ നിന്നും അകന്ന് കഴിയുന്നത് പല വിധ ദാമ്പത്യ അസ്വാര്യസങ്ങള്‍ക്കും കാരണമാകാറുണ്ട്. പല സൈനിക വിഭാഗങ്ങളില്‍ പ്രവര്‍ത്തിക്കുന്നവര്‍ക്കും മതിയായ അവധി ലഭിക്കാറില്ല. മാത്രവുമല്ല ജോലി ഭാരവും കൂടുതലാണ്. ഇതിനൊക്കെ പുറമെ രാജ്യത്തിനകത്ത് തലങ്ങും വിലങ്ങും ഡ്യൂട്ടി നിശ്ചയിക്കുന്നതും സൈനികരെ ആത്മഹത്യയ്ക്ക് പ്രേരിപ്പിക്കുന്നതായും ആഭ്യന്തര മന്ത്രാലയം കണ്ടെത്തി. ഇത്തരം കാര്യങ്ങള്‍ പരിശോധിക്കുന്നുണ്ടെന്നും വേണ്ട നടപടികളെടുക്കുമെന്നും മന്ത്രാലയം കൂട്ടിച്ചേര്‍ത്തു.