കാവേരി വിധിയില്‍ വ്യക്തത തേടി കേന്ദ്ര സര്‍ക്കാര്‍ സുപ്രീം കോടതിയില്‍. കാവേരി മാനേജ്‌മെന്റ് ബോര്‍ഡ് രൂപീകരിക്കണമെന്ന വിധിയില്‍ വ്യക്തത തേടിയാണ് കേന്ദ്രസര്‍ക്കാര്‍ കോടതിയില്‍ അപേക്ഷ നല്‍കിയത്. കാവേരി ബോര്‍ഡ് നടപ്പാക്കാനുള്ള പദ്ധതി എന്തെന്ന് വ്യക്തത വരുത്തണമെന്നാണ് അപേക്ഷയില്‍ ആവശ്യപ്പെട്ടിരിക്കുന്നത്. ബോര്‍ഡ് രൂപീകരിക്കാന്‍ മൂന്നു മാസത്തെ സമയം കൂടി അനുവദിക്കണമെന്നും അപേക്ഷയില്‍ ആവശ്യപ്പെടുന്നു.
കാവേരി ബോര്‍ഡ് രൂപീകരിക്കാന്‍ കോടതി അനുവദിച്ച സമയപരിധി അവസാനിച്ച പശ്ചാത്തലത്തിലാണ് സര്‍ക്കാര്‍ സുപ്രീം കോടതിയെ സമീപിച്ചിരിക്കുന്നത്. നദീജല തര്‍ക്കത്തിന് പരിഹാരമായാണ് സുപ്രീം കോടതി കാവേരി ബോര്‍ഡ് രൂപീകരിക്കണമെന്ന സുപ്രധാന വിധി പുറപ്പെടുവിച്ചത്. കേരളത്തെയും പുതുച്ചേരിയെയും ഉള്‍പ്പെടുത്തി കാവേരി ബോര്‍ഡ് രൂപീകരിക്കാനായിരുന്നു നിര്‍ദേശം.
കാവേരി ബോര്‍ഡ് എന്ന ആവശ്യവുമായി തമിഴ്‌നാട് ഇതിനകം രംഗത്തെത്തി. എന്നാല്‍ കര്‍ണാടകത്തില്‍ തെരഞ്ഞെടുപ്പ് പ്രഖ്യാപിച്ചിരിക്കുന്ന സാഹചര്യത്തിലാണ് ബോര്‍ഡ് രൂപീകരിക്കാന്‍ കേന്ദ്രസര്‍ക്കാര്‍ സാവകാശം തേടിയിരിക്കുന്നത്.രണ്ടു പതിറ്റാണ്ടായി നിലനില്‍ക്കുന്ന കാവേരി നദീജലതര്‍ക്കത്തില്‍ കേരളത്തിന് കൂടുതല്‍ ജലം നല്‍കേണ്ടെന്ന് സുപ്രീം കോടതി വിധിച്ചിരുന്നു.
കേരളത്തിനു പുറമേ പുതുച്ചേരിക്കും അധികം ജലം നല്‍കേണ്ടതില്ലെന്നും കോടതി വ്യക്തമാക്കി. അതേസമയം, കര്‍ണാടകത്തിന് അധികജലം നല്‍കണമെന്ന് കോടതി നിര്‍ദേശിച്ചു. 14.75 ടിഎംസി ജലം അധികം നല്‍കണമെന്നാണ് വിധി.