കേരളത്തെ നടുക്കിയ കാരണവര് കൊലപാതകത്തിലെ പ്രതിയും മരുമകളുമായ ഷെറിനെ ജയിലില് നിന്ന് മോചിപ്പിച്ച മഹാനായ മന്ത്രി ആരാണ്? വഴിവിട്ട് കാലങ്ങളോളം പരോള് അനുവദിച്ചതിനു പിന്നിലെ രഹസ്യം എന്തൊക്കെയാണ്?
കേരളത്തെ നടുക്കിയ കാരണവര് കൊലപാതകത്തിലെ പ്രതിയും മരുമകളുമായ ഷെറിനെ ജയിലില് നിന്ന് മോചിപ്പിച്ച മഹാനായ മന്ത്രി ആരാണ്. മധ്യകേരളത്തില് നിന്നുള്ള ഈ മഹാമന്ത്രിക്ക് ഷെറിന് സെന്ട്രല് ജയിലില്നിന്ന് പുറത്തുവരണമെന്ന് എന്താണ് താല്പര്യം. വഴിവിട്ട് കാലങ്ങളോളം പരോള് അനുവദിച്ചതിനു പിന്നിലെ രഹസ്യം എന്തൊക്കെയാണ്. ഷെറിന് വഴിവിട്ട് പലതവണ ജാമ്യം അനുവദിക്കാന് ചരടുവലിച്ചിരുന്നതും ഇതേ സഖാവ് മന്ത്രിതന്നെയായിരുന്നു. പതിനാല് വര്ഷം ജയിലില് കിടന്നു എന്ന ഏക കാരണത്തിലാണ് ഷെറിനെ സെന്ട്രല് ജയിലില്നിന്ന് പുറത്തുവിടാന് പിണറായി മന്ത്രിസഭ തീരുമാനിച്ചിരിക്കുന്നത്.
ജീവപര്യന്തം തടവിന് വിധിക്കപ്പെട്ട ഷെറിന് എന്ന സൗന്ദര്യധാമം എക്കാലത്തും ജയിലില് പ്രശ്നക്കാരിയായിരുന്നു. അതേസമയം ജയിലിനുള്ളിലും ഷെറിനോട് പ്രത്യേക വാല്സല്യവും കരുതലും ചൊരിഞ്ഞുകൊണ്ടിരുന്ന പുരുഷ വാര്ഡന്മാരുമുണ്ടായിരുന്നു. നിറത്തിനു മങ്ങലേല്ക്കാതിരിക്കാന് ജയിലില് കുട, മൊബൈല് ഫോണ്, ഇഷ്ടഭക്ഷണം, അടുക്കളപ്പണി എന്ന പേരില് സ്ഥിരം വിശ്രമം തുടങ്ങി നിരവധി ആനുകൂല്യങ്ങള് ഷെറിന് കൊടുക്കാന് സിപിഎം നേതാക്കളില് പലരുടെയും ഇടപെടലുണ്ടായിരുന്നു. ഷെറിന് മൂന്നു ജീവപര്യന്തവും മറ്റു പ്രതികള്ക്ക് ഇരട്ട ജീവപര്യന്തവുമായിരുന്നു ശിക്ഷ. ഈ ഉത്തരവ് ഹൈക്കോടതിയും ശരിവയ്ക്കുകയും ചെയ്തിരുന്നു. ഷെറിന് സുപ്രീംകോടതിയെ സമീപിച്ചെങ്കിലും അനുകൂലവിധിയുണ്ടായില്ല.
ഇത്തരമൊരു പ്രതിയെയാണ് പിണറായി മന്ത്രിസഭയിലെ വിവാദമന്ത്രി മോചിപ്പിക്കാന് പച്ചക്കൊടി കൊടുത്തിരിക്കുന്നത്. ജീവപര്യന്തം ശിക്ഷ അനുഭവിക്കുന്ന വനിതാ തടവുകാരില് സംസ്ഥാനത്ത് പരോള് നേടുന്ന കാര്യത്തില് ഷെറിനായിരുന്നു ഒന്നാം സ്ഥാനത്ത്. ആറു വര്ഷത്തിനിടെ 22 തവണയായി ഇവര്ക്കു ലഭിച്ചത് 444 ദിവസത്തെ പരോള്. 2012 മാര്ച്ചിനും ഈ വര്ഷം ജനുവരിക്കുമിടയില് 345 ദിവസത്തെ സാധാരണ പരോള് ലഭിച്ചു. 2012 ഓഗസ്റ്റ് മുതല് 2017 ഒക്ടോബര് വരെ 92 ദിവസത്തെ അടിയന്തര പരോള് ഇവര്ക്കു മാത്രം ആനുകൂല്യമായി ലഭിച്ചു. കൂടാതെ ഹൈക്കോടതിയില്നിന്ന് ഒരാഴ്ചത്തെ അടിയന്തര പരോള് കൂടി ലഭിച്ചു. തടവുകാര്ക്ക് ശിക്ഷാ ഇളവു നല്കാന് സംസ്ഥാന സര്ക്കാര് ഗവര്ണര്ക്ക് നല്കിയ ആദ്യ പട്ടികയിലും ഇവര് ഇടം നേടിയിരുന്നു. ഇതിനൊക്കെ പിന്നില് പിണറായി മന്ത്രിസഭയിലെ മഹാനായ മന്ത്രിയുടെ ഇടപെടലുണ്ടായിരുന്നു.
കേരളത്തെ നടുക്കിയ കൊലക്കേസുകളില് ഓര്ക്കപ്പെടുന്ന ഒന്നാണ് അമേരിക്കന് മലയാളിയായിരുന്ന ചെറിയനാട് ഭാസ്കരകാരണവരുടെ ക്രൂരമായ കൊലപാതകം.പ്രണയവും പകയും കൊലയും കൂടിക്കലര്ന്ന് സിനിമാക്കഥപോലെ സംഭവബഹുലമായിരുന്ന കൊലയായിരുന്നു അത്. കാരണവരുടെ ഇളയ മകന് ബിനു പീറ്ററിന്റെ ഭാര്യ ഷെറിനായിരുന്നു ഒന്നാംപ്രതി. സുഹൃത്തുക്കളായിരുന്ന കോട്ടയം കുറിച്ചി സ്വദേശി ബാസിത് അലി, സുഹൃത്തുക്കളായ എറണാകുളം ഏലൂര് സ്വദേശി ഷാനു റഷീദ്, കളമശേരി സ്വദേശി നിഥിന് എന്നിവരായിരുന്നു മറ്റു പ്രതികള്.
ഷെറിന് പുറത്തിറങ്ങി സുഖമായി ജീവിക്കാന് പോകുന്ന സാഹചര്യത്തിലും കൂട്ടുപ്രതികള് സെന്ട്രല് ജയിലില്തന്നെ തുടരുമെന്നതാണ് കൗതുകകരം. അതായത് ഒന്നാം പ്രതി വീട്ടിലും കൂട്ടുപ്രതികള് ജയിലിലും.
പിണറായി സര്ക്കാരില് ഇഷ്ടക്കാരുണ്ടെങ്കില് ഏതു കൊടുംപാതകിക്കും ജയില് നിന്ന് ഇറങ്ങി വിഹരിക്കാം എന്നതാണ് കേരളത്തിലെ അവസ്ഥ.96 സാക്ഷികളും 12 രേഖകളുമുണ്ടായിരുന്ന കേസില് ഏഴുമാസത്തിനുള്ളില് വിചാരണ പൂര്ത്തിയാക്കി 2010-ല് പ്രത്യേക അതിവേഗകോടതി ശിക്ഷവിധിച്ചു. നാലു ജയിലുകളില് മാറ്റിമാറ്റി പാര്പ്പിച്ചപ്പോള് അവിടെയൊക്കെ ഷെറിന് പ്രശ്നക്കാരിയായിരുന്ന. അവസാനം കണ്ണൂര് വനിതാജയിലിലായിരുന്നു ഷെറിന്. ജീവപര്യന്തം ശിക്ഷനല്കിക്കൊണ്ടുള്ള വിധിയില്, 2010 ജൂണ് 11ന് ആണ് കാരണവര് കൊലക്കേസില് വിധി വരുന്നത്. ജൂണ് 11 ന് ആണു മാവേലിക്കര അതിവേഗ കോടതി ശിക്ഷിച്ച് ഷെറിന് പൂജപ്പുര സെന്ട്രല് ജയിലിലെത്തിയത്. തുടര്ന്ന് ഇവരെ നെയ്യാറ്റിന്കര വനിതാ ജയിലിലേക്ക് മാറ്റി. അവിടെ മൊബൈല് ഫോണ് അനധികൃതമായി ഉപയോഗിച്ചെന്ന് കണ്ടെത്തിയതോടെ അച്ചടക്ക നടപടിയുടെ ഭാഗമായി 2015 മാര്ച്ചില് വിയ്യൂര് സെന്ട്രല് ജയിലിലേക്ക് മാറ്റി. അവിടെ വെയില് കൊള്ളാതിരിക്കാന് ഇവര്ക്കു ജയില് ഡോക്ടര് കുട അനുവദിച്ചത് വലിയ വിവാദമായിരുന്നു.
കൂടാതെ ജയില് ഉദ്യോഗസ്ഥരെ ഭീഷണിപ്പെടുത്തിയെന്ന പരാതിയും ഉയര്ന്നു. 2017 മാര്ച്ചില് തിരുവനന്തപുരം വനിത ജയിലിലേക്ക് മാറ്റി. ജീവിതാവസാനംവരെയെന്ന് പ്രത്യേകം പറയാത്തതിനാല് ശിക്ഷയിളവ് അനുവദിക്കാനാകുമെന്നാണ് നിയമവകുപ്പ് അറിയിച്ചത്. മരുമകളായ ഷെറിന്റെ അവിഹിതബന്ധങ്ങളും പ്രണയവും സാമ്പത്തിക ഇടപാടുകളും കാരണവര് അറിഞ്ഞതോടെയാണ് കാരണവരെ അരും കൊലചെയ്യാന് പ്രതികള് തീരുമാനിച്ചത്. രാത്രി വീട്ടിലെത്തിയ പ്രതികള്ക്ക് വാതില് തുറന്നുകൊടുത്തതും പട്ടികളെ മയക്കാന് മരുന്നുനല്കിയതും ഷെറിനാണെന്ന് പോലീസ് കണ്ടെത്തിയിരുന്നു. കൂടിയ അളവില് ക്ലോറോഫോം മണപ്പിച്ചശേഷം തലയണ മുഖത്ത് അമര്ത്തിപ്പിടിച്ച് കാരണവരെ കൊല്ലുകയായിരുന്നു.
https://www.facebook.com/Malayalivartha
