ഒരു വലിയ ശബ്ദവും സ്ഫോടനവും മാത്രമാണ് അവൻ ഓർക്കുന്നത്. തൊട്ടടുത്ത നിമിഷം, കൂടെയുണ്ടായിരുന്ന പ്രിയപ്പെട്ട സഹപ്രവർത്തകൻ ചോരവാർന്ന് നിശ്ചലനായി കിടക്കുന്നു- ഷെയ്ഖ് സായിദ് റോഡിന് സമീപമുള്ള കാർ ഷോറൂമിലുണ്ടായ ഗ്യാസ് സിലിണ്ടർ സ്ഫോടനത്തിൽ നിന്ന് അദ്ഭുതകരമായി രക്ഷപ്പെട്ട ആബിദ് എന്ന മലയാളിക്ക് ആ ദാരുണ നിമിഷത്തിൽ നിന്ന് ഇപ്പോഴും മുക്തനാകാൻ കഴിഞ്ഞിട്ടില്ല. എനിക്കിപ്പോഴും ഇത് വിശ്വസിക്കാൻ കഴിയുന്നില്ല. താഴെ തീപിടിത്തമുണ്ടായെന്നറിഞ്ഞ് ഞങ്ങൾ രണ്ടുപേരും ഒരുമിച്ചാണ് കെട്ടിടത്തിന് പുറത്തേക്ക് ഓടിയത്. ഷിജിൻ എനിക്ക് രണ്ടുമൂന്ന് മീറ്റർ മാത്രം മുന്നിലായിരുന്നു. പെട്ടെന്നാണ് സ്ഫോടനമുണ്ടായത്. അവൻ മരിക്കുകയും ഞാൻ മാത്രം രക്ഷപ്പെടുകയും ചെയ്തത് എങ്ങനെയെന്ന് എനിക്കറിയില്ല...- നെഞ്ചുപൊട്ടുന്ന ഓർമകളോടെ ആബിദ് പറയുന്നു.