തായ്‌ലന്‍ഡിലെ ഫുക്കെറ്റില്‍ നിന്ന് ന്യൂഡല്‍ഹിയിലേക്ക് പറക്കുന്നതിനിടെ എയര്‍ ഇന്ത്യ വിമാനം ആകാശച്ചുഴിയില്‍ പെട്ട സംഭവത്തില്‍ വലിയ രീതിയിലുള്ള അവ്യക്തതകള്‍ നിലനില്‍ക്കുന്നതായി വ്യോമയാന വിദഗ്ധന്‍ ജേക്കബ് കെ. ഫിലിപ്പ്. 13 യാത്രക്കാര്‍ക്കും നാല് കാബിന്‍ ക്രൂ അംഗങ്ങള്‍ക്കും പരുക്കേറ്റ ഈ അപകടത്തിന്റെ കൃത്യമായ സമയത്തെക്കുറിച്ചോ അത് സംഭവിച്ച സ്ഥലത്തെക്കുറിച്ചോ മാധ്യമ റിപ്പോര്‍ട്ടുകളില്‍ വ്യക്തതയില്ല.

രണ്ടു സെക്കന്‍ഡില്‍ താഴെ സമയത്തിനുള്ളില്‍ വിമാനം അപ്രതീക്ഷിതമായി 300 അടിയോളം താഴേക്കു പതിച്ചതാണ് എയര്‍ ഇന്ത്യ വിമാനത്തിലെ അപകടത്തിന് കാരണമായതെന്ന് വ്യക്തമാണ്. എന്നാല്‍ അപകടം എവിടെ വച്ചാണ്, ഏതു നേരത്തായിരുന്നു എന്ന കാര്യത്തില്‍ ഇപ്പോഴും അവ്യക്തത തുടരുകയാണ്. സാധാരണ കാലാവസ്ഥാ വ്യതിയാനം (Turbulence) കൊണ്ട് മാത്രമാണോ അതോ സാങ്കേതിക തകരാറുകള്‍ മൂലം വിമാനത്തിന്റെ മൂക്ക് താഴേക്ക് കുതിച്ചതാണോ ഈ പെട്ടെന്നുള്ള പതിനത്തിന് വഴിവെച്ചത് എന്ന് അറിയാന്‍ വിശദമായ അന്വേഷണം അത്യാവശ്യമാണ്. ജേക്കബ് കെ ഫിലിപ്പിന്റെ നിരീക്ഷണങ്ങള്‍ ഇങ്ങനെ:
വിമാന ട്രാക്കിങ് സൈറ്റായ ഫ്‌ലൈറ്റ് റഡാര്‍24 പരിശോധിച്ചാല്‍ വിമാനം മിക്ക സമയത്തും 34,000, 37,000 അടി ഉയരങ്ങളില്‍ സമാധാനപരമായി പറന്നതായി കാണാം. രാവിലെ 10 മണിക്ക് ശേഷം ഡല്‍ഹി ലക്ഷ്യമാക്കി താഴാന്‍ തുടങ്ങിയ വിമാനം 10.40-ന് മഥുരയ്ക്ക് മീതെയും തുടര്‍ന്ന് 11.07-ഓടെ ഡല്‍ഹിയിലും സുരക്ഷിതമായി ലാന്‍ഡ് ചെയ്തു. എന്നാല്‍ റിപ്പോര്‍ട്ടുകളില്‍ പറയുന്ന 300 അടിയുടെ പെട്ടെന്നുള്ള പതിനം ഇതില്‍ ദൃശ്യമല്ല.