എയര്പോര്ട്ടിന്റെ 4 കി.മീ. ചുറ്റളവില് 24 മണിക്കൂറും പ്രവര്ത്തിക്കുന്ന സ്ക്വാഡിന്റെ നിരീക്ഷണം
തിരുവനന്തപുരം എയര്പോര്ട്ടിന്റെ നാലു കിലോമീറ്റര് ചുറ്റളവില് മാലിന്യങ്ങള് നിക്ഷേപിക്കുന്നില്ലെന്ന് ഉറപ്പാക്കുന്നതിന്റെ ഭാഗമായി 24 മണിക്കൂറും പ്രവര്ത്തിക്കുന്ന എയര്പോര്ട്ട് സ്ക്വാഡിന്റെ നിരീക്ഷണം ഏര്പ്പെടുത്തിയതായി കോര്പറേഷന് സെക്രട്ടറി മനുഷ്യാവകാശ കമ്മിഷനെ അറിയിച്ചു. കമ്മിഷന് ചെയര്പഴ്സന് ജസ്റ്റിസ് അലക്സാണ്ടര് തോമസിന്റെ നിര്ദേശാനുസരണമാണ് നടപടി.
കഴിഞ്ഞവര്ഷം ഏപ്രില് 15 ന് തിരുവനന്തപുരം വിമാനത്താവളത്തിന് സമീപം ഒമാന് എയര്വേയ്സ് വിമാനത്തില് പരുന്തിടിച്ച് എന്ജിന് കേടുപാട് സംഭവിച്ചതുമായി ബന്ധപ്പെട്ട വാര്ത്തകളുടെ അടിസ്ഥാനത്തില് സമര്പ്പിച്ച പരാതിയിലാണ് കര്ശന നടപടി സ്വീകരിക്കാന് നിര്ദേശം നല്കിയത്. പ്രദേശത്തെ വീടുകളില് അജൈവമാലിന്യം ശേഖരിച്ച് പൂര്ണതോതില് സംസ്കരിക്കുന്നതിന് ഹരിതകര്മ സേനയെ നിയോഗിച്ചതായി റിപ്പോര്ട്ടില് പറയുന്നു. പ്രദേശത്തെ വീടുകളില് കിച്ചണ് ബിന് സംവിധാനം ഏര്പ്പെടുത്തിയിട്ടുണ്ട്. ജൈവമാലിന്യ സംസ്കരണത്തിന് വള്ളക്കടവ് സുലൈമാന് സ്ട്രീറ്റ്, എന്എസ് ഡിപ്പോ എന്നിവിടങ്ങളില് അഞ്ചു എയറോബിക് ബിന് സ്ഥാപിച്ചിട്ടുണ്ട്.
കമ്മിഷന് കേസ് പരിഗണിച്ചപ്പോള് നഗരസഭാ ഹെല്ത്ത് ഇന്സ്പെക്ടര് ഹാജരായി. ഭാവിയില് ഇത്തരം അപകടങ്ങള് ഒഴിവാക്കുന്നതിനായി വിമാനത്താവളത്തിന് സമീപമുള്ള പ്രദേശങ്ങളില് യാതൊരു കാരണവശാലും അജൈവ മാലിന്യങ്ങള് നിക്ഷേപിക്കുന്നില്ലെന്ന് നഗരസഭാ അധികൃതര് ഉറപ്പാക്കണമെന്ന് ജസ്റ്റിസ് അലക്സാണ്ടര് തോമസ് നിര്ദേശിച്ചു. മനുഷ്യാവകാശ പ്രവര്ത്തകനായ രാഗം റഹീം സമര്പ്പിച്ച പരാതിയിലാണ് നടപടി.
https://www.facebook.com/Malayalivartha
