നോർക്ക പ്രൊഫഷണൽ ആൻഡ് ബിസിനസ്‌ മീറ്റിന്റെ തുടർ നടപടികൾക്കായി ടാസ്ക് ഫോഴ്സ് രൂപീകരിക്കുമെന്ന് മന്ത്രി പി രാജീവ്‌. മീറ്റിന്റെ ഭാഗമായ അവസാന സെഷനിൽ പ്രതിനിധികളുമായി സംസാരിക്കുകയായിരുന്നു അദ്ദേഹം. ടാലെന്റ്റ് പൂൾ ഗ്രോത്തിൽ രാജ്യത്ത് ഒന്നാമതാണ് കേരളം, ഇതിനനുസൃതമായി നിക്ഷേപക മേഖലയിലും വൈജ്ഞാനിക മേഖലയിലും ഈ ശേഷി പ്രയോജനപ്പെടുത്തുകയാണ് മീറ്റിന്റെ ലക്ഷ്യങ്ങളിലൊന്ന്.

നിലവിൽ സംസ്ഥാനത്ത് പത്ത് ക്യാമ്പസ്‌ പാർക്കുകൾ അനുവദിച്ചിട്ടുണ്ട്. ഈ സാമ്പത്തിക വർഷം അൻപത് ക്യാമ്പസ്‌ പാർക്കുകൾ കൂടി അനുവദിക്കും. കൂടാതെ പ്രൈവറ്റ് ഇൻഡസ്ട്രിയൽ പാർക്കുകൾക്ക് കൂടി അനുമതി നൽകിയിട്ടുണ്ട്. ഏത് വ്യവസായങ്ങൾക്കും ആവശ്യമായ രീതിയിൽ കോഴ്സുകൾ രൂപകല്പന ചെയ്യുന്ന നിലയിൽ കേരളത്തിലെ ഉന്നത വിദ്യാഭ്യാസ മേഖല മാറിയിട്ടുണ്ട്.

ലിങ്ക്ടിന്റെ പ്രൊഫൈൽമാറ്റക്കണക്ക് അനുസരിച് കേരളത്തിലേക്ക് വലിയ രീതിയിലുള്ള റിവേഴ്‌സ് മൈഗ്രേഷൻ നടക്കുന്നുണ്ട്. ഇവരുടെ മാനവവിഭവശേഷി സംസ്ഥാനത്തിന് ഗുണകരമാവുന്ന വിധത്തിൽ പ്രയോജനപ്പെടുത്തുവാൻ ലക്ഷ്യം വെക്കുന്നുണ്ട്. പ്രകൃതി, മനുഷ്യൻ,വ്യവസായം എന്നതാണ് സംസ്ഥാനത്തിന്റെ നയം. വലിയ തോതിൽ ഭൂമി ആവശ്യമുള്ളതും മലിനീകരണ സാധ്യത ഉള്ളതുമായ വ്യവസായങ്ങൾക്ക് കേരളത്തിൽ സാധ്യതയില്ല.

എന്നാൽ ഇത്തരത്തിൽ അല്ലാത്ത വ്യവസായങ്ങൾക്ക് വൻസാധ്യതയാണ് കേരളത്തിൽ ഉള്ളത്. കഴിഞ്ഞ പത്തുവർഷത്തിനിടെ ഏറ്റവും കൂടുതൽ പണിമുടക്ക് നടന്നിട്ടുള്ള സംസ്ഥാനങ്ങളുടെ പട്ടികയിൽ ആദ്യ സ്ഥാനങ്ങളിലൊന്നും കേരളമില്ലെന്ന് മന്ത്രി പറഞ്ഞു. നോർക്ക പ്രൊഫഷണൽ ആൻഡ് ബിസിനസ്‌ ലീഡേർഷിപ് മീറ്റിന്റെ രണ്ടാം എഡിഷൻ അടുത്ത വർഷം നടത്തുമെന്നും മന്ത്രി അറിയിച്ചു.