മൂന്നാം പിണറായി സർക്കാർ എന്നതിലുറച്ച്  പ്രചാരണം കൊഴുപ്പിക്കുകയാണ് എൽഡിഎഫ്. മുഖ്യമന്ത്രി പിണറായി വിജയനടക്കം നേരിട്ടിറങ്ങിയാണ് ഇത്തവണ വോട്ട് പിടിക്കാൻ ശ്രമിക്കുന്നത്. ഭരണവിരുദ്ധ വികാരം കേരളത്തിൽ പിണറായി സർക്കാരിന് തിരിച്ചടിയാകുമെന്ന് രാഷ്ട്രീയ വിലയിരുത്തലുകൾ വരുമ്പോഴും അതൊന്നും കണക്കിലെടുക്കേണ്ടതില്ലെന്ന ആത്മവിശ്വാസത്തിൽ എൽഡിഎഫ് തയ്യാറായിക്കഴിഞ്ഞു. നാളെ മുതൽ  മുഖ്യമന്ത്രി പിണറായി വിജയന്റെ തെരഞ്ഞെടുപ്പ് പ്രചരണം  ആരംഭിക്കാനിരിക്കുന്നു.

ഏപ്രിൽ മൂന്നു വരെ 48 കേന്ദ്രങ്ങളിൽ മുഖ്യമന്ത്രി പര്യടനം നടത്തും. പത്തനംതിട്ട ജില്ലയിലാണ് മുഖ്യമന്ത്രിയുടെ പര്യടനത്തിന്റെ തുടക്കം. ഒരു ദിവസം നാല് പൊതുയോഗങ്ങളിൽ മുഖ്യമന്ത്രി പങ്കെടുക്കും. സിപിഎം ജനറൽ സെക്രട്ടറി എം.എ ബേബി, പി.ബി അംഗങ്ങളായ പ്രകാശ്‌ കാരാട്ട്‌, ബൃന്ദാ കാരാട്ട്‌, വിജൂ കൃഷ്‌ണൻ, മറിയം ധാവ്‌ളെ, സുഭാഷിണി അലി തുടങ്ങിയവരും വിവിധയിടങ്ങളിൽ പൊതുയോഗങ്ങളിൽ സംസാരിക്കും. മുഖ്യമന്ത്രിയുടെ നേരിട്ടുള്ള പരിപാടികൾ ജനങ്ങളിൽ കൂടുതൽ ആത്മവിശ്വാസം ഉണ്ടാക്കുമെന്നാണ് വിലയിരുത്തൽ. 

നവകേരള സൃഷ്ടിക്കായി ജനങ്ങളെ ചേർത്തുനിർത്തിക്കൊണ്ട് ഇടതുപക്ഷ ജനാധിപത്യ മുന്നണി കരുത്തോടെ മുന്നേറുമെന്ന് സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ മാസ്റ്റർ പ്രതികരണം അതിന്റെ ഏറ്റവും വലിയ തെളിവാണ്. വികസന പ്രവർത്തനങ്ങളെ തള്ളിപ്പറയുന്നവർക്ക് വരാനിരിക്കുന്ന തിരഞ്ഞെടുപ്പിൽ ജനങ്ങൾ കനത്ത തിരിച്ചടി നൽകുമെന്നും, 110-ലധികം സീറ്റുകൾ നേടി എൽ.ഡി.എഫ് തുടർച്ചയായ മൂന്നാം ഭരണത്തിലേക്ക് നീങ്ങുമെന്നും അദ്ദേഹം ആത്മവിശ്വാസം പ്രകടിപ്പിച്ചു. വികസന വിരുദ്ധ നിലപാടുകൾ സ്വീകരിക്കുന്ന പ്രതിപക്ഷത്തിന് ജനമനസ്സുകളിൽ സ്ഥാനമുണ്ടാകില്ലെന്ന് അദ്ദേഹം കൂട്ടിച്ചേർത്തു. പ്രതിപക്ഷ നേതാവ് വി.ഡി. സതീശനെതിരെ രൂക്ഷമായ വിമർശനമാണ് അദ്ദേഹം ഉന്നയിച്ചത്.

പാലക്കാട് ഡീൽ സംബന്ധിച്ച് സതീശൻ ഉന്നയിക്കുന്ന ആരോപണങ്ങൾ തികച്ചും അടിസ്ഥാനരഹിതമാണെന്നും സതീശൻ പറയുന്നത് മുഴുവൻ നുണയാണെന്നും അദ്ദേഹം പരിഹസിച്ചു. സതീശന്റെ ഇത്തരം നുണപ്രചാരണങ്ങൾ മറുപടി പോലും അർഹിക്കുന്നില്ല എന്നും അദ്ദേഹം വ്യക്തമാക്കി. പടലപ്പിണക്കങ്ങളിൽ ഉലയുന്ന യു.ഡി.എഫിന് ജനങ്ങളെ അഭിമുഖീകരിക്കാൻ ഭയമാണെന്നും, വികസനത്തിന് വോട്ട് ചെയ്യുന്ന ജനത ഇടതുപക്ഷത്തിനൊപ്പം ഉറച്ചുനിൽക്കുമെന്നും എം.വി. ഗോവിന്ദൻ മാസ്റ്റർ വ്യക്തമാക്കി.