ഗള്‍ഫില്‍ വച്ച് മരിക്കുന്ന പ്രവാസി മലയാളികളുടെ മൃതദേഹം സൗജന്യമായി നാട്ടിലെത്തിക്കുന്ന പദ്ധതിക്ക് തുടക്കം
ഗള്‍ഫില്‍ വച്ച് മരിക്കുന്ന പ്രവാസി മലയാളികളുടെ മൃതദേഹം സൗജന്യമായി നാട്ടിലെത്തിക്കുന്ന പദ്ധതിക്ക് തുടക്കമായി. കണ്ണൂര്‍ സ്വദേശിയായ ലെസ്ലി ഐസക്കിന്റെ മൃതദേഹം നാട്ടിലെത്തിച്ചതിലൂടെയാണ് ഗള്‍ഫില്‍ വെച്ച് മരിക്കുന്ന പ്രവാസി മലയാളികളുടെ ഭൗതിക ശരീരം നാട്ടിലെത്തിക്കുന്നതിനുള്ള നോര്‍ക്ക് റൂട്ട്‌സ് പദ്ധതിക്ക് തുടക്കമായത്. തൊഴില്‍ ഉടമയുടെയോ എംബസിയുടെയോ സഹായം ലഭിക്കാതെ വരുന്ന സാഹചര്യത്തിലാണ് നോര്‍ക്ക റൂട്ട്‌സ് സൗജന്യമായി മൃതശരീരം നാട്ടിലെത്തിക്കുക. ഈ പദ്ധതിയില്‍ ഉള്‍പ്പെടുത്തി ദമ്മാമില്‍ മരിച്ച കണ്ണൂര്‍ പഴയങ്ങാടി സ്വദേശി ലെസ്ലി ഐസക്കിന്റെ ഭൗതിക ശരീരം ഇത്തിഹാദ് വിമാനത്തില്‍ നാട്ടിലെത്തിച്ചു.
മൃതദേഹം സൗജന്യമായി നാട്ടിലെത്തിക്കുന്ന നോര്‍ക്കയുടെ സേവനം നിലവില്‍ വന്നശേഷമുള്ള ആദ്യത്തെ മൃതദേഹമാണ് ഇന്ന് ദമ്മാമില്‍ നിന്ന് നാട്ടിലേക്ക് കൊണ്ടുപോയത്. കോഴിക്കോട് വിമാനത്താവളത്തില്‍ തിങ്കളാഴ്ചയെത്തുന്ന മൃതദേഹം നോര്‍ക്കയുടെ സൗജന്യ ആംബുലന്‍സ് സേവനം ഉപയോഗിച്ച്‌ വീട്ടിലെത്തിക്കും. ഹൃദയാഘാതം മൂലം മരിച്ച ലെസ്ലിയുടെ മൃതദേഹം നാട്ടിലെത്തിക്കുന്നതിനുള്ള നടപടിക്രമങ്ങള്‍ ദമ്മാമില്‍ പൂര്‍ത്തിയാക്കിയത് നവോദയ സാംസ്‌കാരിക വേദിയുടെ പ്രവര്‍ത്തകരായിരുന്നു.
നോര്‍ക്കയുടെ ഈ പദ്ധതി പ്രയോജനപ്പെടുത്താന്‍ ഗള്‍ഫ് രാജ്യങ്ങളില്‍ മരിക്കുന്ന പ്രവാസി മലയാളികളുടെ ബന്ധുക്കളോ സുഹൃത്തുക്കളോ നോര്‍ക്കയില്‍ അപേക്ഷ സമര്‍പ്പിച്ചാല്‍ മതിയാകുമെന്ന് നോര്‍ക്ക വ്യക്തമാക്കി.
https://www.facebook.com/Malayalivartha
