പാവറട്ടിയില് അമ്മയെ വെട്ടിക്കൊലപ്പെടുത്തിയ കേസില് മകന് കസ്റ്റഡിയില്
തൃശൂര് പാവറട്ടിയില് അമ്മയെ വെട്ടിക്കൊലപ്പെടുത്തിയ കേസില് മകന് കസ്റ്റഡിയില്. തകരന് വീട്ടില് പരേതനായ ചെറിയാന്റെ ഭാര്യ ഡോളി (70) ആണ് കൊല്ലപ്പെട്ടത്. സംഭവത്തില് മകന് ബെന്ഹറിനെ (46)യാണ് പൊലീസ് അറസ്റ്റുചെയ്തത്. ഇന്ന് രാവിലെ പത്തുമണിയോടെയായിരുന്നു സംഭവം. വീട്ടിലെ പറമ്പില് ജോലിചെയ്യുകയായിരുന്ന ഡോളിയെ ബെന്ഹര് പിന്നീലൂടെയെത്തി കെട്ടിപ്പിടിച്ച് കഴുത്തറുക്കുകയായിരുന്നു. പിന്നാലെ വീടിനകത്തുപോയി വെട്ടുകത്തി എടുത്തുകൊണ്ടുവന്ന് ഡോളിയുടെ തലയ്ക്ക് ആഴത്തില് വെട്ടിപരിക്കേല്പ്പിക്കുകയും ചെയ്തു. ഗുരുതരമായി പരിക്കേറ്റ ഡോളിയെ ആദ്യം പാവറട്ടിയിലെ സ്വകാര്യ ആശുപത്രിയിലും പിന്നീട് മെഡിക്കല് കോളേജിലേക്കും മാറ്റി. മെഡിക്കല് കോളേജില് ചികിത്സയിലിരിക്കെ 11.30 ഓടെയാണ് മരിച്ചത്.
ഇവരുടെ പറമ്പില് ജോലിക്ക് വന്ന സമീപവാസിയായ അറയ്ക്കല് ഡേവിസ് സംഭവം കണ്ട് ബെന്ഹറിനെ പിടിച്ചുമാറ്റാന് ശ്രമിച്ചിരുന്നു. എന്നാല് ഇയാളെയും ബെന്ഹര് ആക്രമിക്കുകയായിരുന്നു. ആക്രമണത്തില് കത്തികൊണ്ട് ഡേവിസിന്റെ കൈക്കും പരിക്കേറ്റതായാണ് വിവരം. പ്രതി ബെന്ഹറിന് മാനസിക പ്രശ്നമുണ്ടെന്നും ബെന്ഹറും അമ്മയും തമ്മില് വഴക്കുകള് ഉണ്ടാകാറുണ്ടെന്നും പാവറട്ടി പഞ്ചായത്തംഗം വര്ഗീസ് പറഞ്ഞു. സംഭവത്തില് പൊലീസ് കേസെടുത്ത് അന്വേഷണം ആരംഭിച്ചു. കൊലപാതകത്തിലേക്ക് നയിച്ച കൃത്യമായ കാരണവും പ്രകോപനവും എന്താണെന്ന് ഇതുവരെ വ്യക്തമായിട്ടില്ല.
https://www.facebook.com/Malayalivartha
