കുവൈത്തില് പൊതുമാപ്പ് പ്രഖ്യാപിച്ചതോടെ മലയാളികളടക്കം ആശങ്കയില്
കുവൈത്തില് ഏപ്രില് ഒന്നു മുതല് 30 വരെ സര്ക്കാര് പൊതുമാപ്പ് പ്രഖ്യാപിച്ചു. പൊതുമാപ്പ് കാലയളവില് രാജ്യം വിട്ടു പോകാത്തവര്ക്ക് കടുത്ത ശിക്ഷ നടപ്പിലാക്കുമെന്ന് കുവൈത്ത് ഉപ പ്രധാനമന്ത്രിയും വിദേശകാര്യ മന്ത്രിയുമായ അനസ് അല് സലേഹ് കഴിഞ്ഞ ദിവസം മുന്നറിയിപ്പ് നല്കി. നൂറു കണക്കിന് മലയാളികളടക്കം ഇന്ത്യക്കാര് വലിയ ആശങ്കയിലും ഉത്കണ്ഠയിലുമാണ്. കൊറോണ പശ്ചാത്തലത്തില് ഇന്ത്യയിലേക്ക് വിമാന സര്വീസ് റദ്ദാക്കിയ സാഹചര്യത്തില് പൊതുമാപ്പ് കാലാവധി തീരുന്നതിന് മുമ്ബ് എങ്ങനെ നാട്ടിലെത്താന് കഴിയുമെന്നതാണ് ആശങ്ക.
എന്നാല് ഞായറാഴ്ച ഈജിപ്ത് എയര് വിമാനത്തില് 303 ഈജിപ്തുകാരെ കുവൈത്തില് നിന്നും കൊണ്ടുപോയി. ഈജിപ്ത് എംബസിയും ഈജിപ്ത് എയറും സംയുക്തമായിട്ടാണ് ഒഴിപ്പിക്കല് ദൗത്യം വിജയകരമായി നിര്വഹിക്കുന്നത്. ഇതിനകം 1293 ഈജിപ്തുകാരെ ഒഴിപ്പിച്ചതായിട്ടാണ് റിപ്പോര്ട്ട്.
കുവൈത്തില് കുടുംബ സന്ദര്ശന വിസയിലും വാണിജ്യ വിസയിലുമെത്തി കാലാവധിക്ക് മുമ്ബ് മടങ്ങി പോകാന് കഴിയാത്തവരും കുടിയേറ്റ നിയമലംഘനം നടത്തിയതിന്റെ പേരില് നാട് കടത്തുന്നവരും ഇതില് ഉള്പ്പെടുന്നു.
അതേസമയം, മാനുഷിക പരിഗണന നല്കി അത്യാവശ്യമായി ഈജിപ്തിലേക്ക് മടങ്ങി പോകേണ്ടവര്ക്കും യാത്രക്കുള്ള അവസരം ഒരുക്കുകയാണെന്നും ഏവിയേഷന് അധികൃതര് അറിയിച്ചു.സമാനമായി മറ്റു രാജ്യക്കാരെ ഒഴിപ്പിക്കുന്നത് സംബന്ധിച്ച ചര്ച്ചകള് നയതന്ത്ര തലത്തില് തുടരുന്നുണ്ട്. അതാത് രാജ്യങ്ങളിലെ സര്ക്കാരിന്റെയും എംബസ്സിയുടെയും തീരുമാനം അനുസരിച്ചു ഒഴിപ്പിക്കല് ആരംഭിക്കുകയും ചെയ്യും.
കുവൈത്ത് എയര്വേസ് വിമാനത്തില് സര്ക്കാരിന്റ ചെലവില് നാട് കടത്തല് കേന്ദ്രത്തില് കഴിയുന്ന ഇന്ത്യക്കാരെ മുംബൈയിലെത്തിക്കാന് നടത്തിയ ശ്രമം വിഫലമായി.കൊറോണ രോഗം പടരുന്ന പശ്ചാത്തലത്തില് നാട് കടത്തുന്നവരുടെ കൊറോണ രോഗ പരിശോധന സര്ട്ടിഫിക്കറ്റ് ഹാജരാക്കാതെ വിമാനത്തിന് അനുമതി നല്കാന് കഴിയില്ല എന്ന് ഇന്ത്യന് സര്ക്കാര് നിലപാട് അറിയിച്ചതോടെയാണ് ഈ ശ്രമം മുടങ്ങിയത്.
പ്രത്യേക വിമാനങ്ങള് ഇന്ത്യയിലേക്കു പുറപ്പെടുന്നതിനുള്ള ക്രമീകരണങ്ങള് കുവൈത്ത് അന്താരാഷ്ട്ര വിമാനത്താവളത്തില് പൂര്ത്തിയാക്കി പുറപ്പെടുന്നതിനുള്ള അവസാന ശ്രമങ്ങള്ക്കിടയിലാണ് ഇന്ത്യയില് നിന്നുള്ള അന്തിമ തീരുമാനം കുവൈത്തിനെ അറിയിച്ചത്.
എന്നാല് ഇതു സംബന്ധിച്ച നയതന്ത്ര തല ചര്ച്ചകള് തുടരുന്നതായും നിബന്ധനകള് അനുസരിച്ചു നടപടികള് പൂര്ത്തിയാക്കി നാടു കടത്തല് കേന്ദ്രത്തില് കഴിയുന്നവരെ ഇന്ത്യയില് എത്തിക്കുന്നതിനുള്ള ശ്രമം തുടരുകയുമാണ്.കുടിയേറ്റ നിയമലംഘനം ഉള്പ്പെടെ വിവിധ കുറ്റകൃത്യങ്ങളില് പിടിയിലായി നാടുകടത്തല് കേന്ദ്രങ്ങളില് കഴിന്നവരെയാണ് സര്ക്കാര് ചെലവില് നാടുകടത്തുന്നത്.
കുവൈത്തിലെ ജയിലുകളിലും നാടുകടത്തല് കേന്ദ്രങ്ങളിലും നിലവിലുള്ള തിരക്ക് കുറയ്ക്കുന്നതിന്റെ ഭാഗമായിട്ടാണ് വിദേശികളുടെ നാടു കടത്തല് ആരംഭിച്ചിട്ടുള്ളത്. താമസ കുടിയേറ്റ നിയമം ലംഘിച്ചവരും സ്പോണ്സറില് നിന്നും ഒളിച്ചോടിയവരും, സ്വമേധയാ മാന് പവര് അതോറിറ്റിക്ക് മുന്നില് കീഴടങ്ങിയവരെയുമാണ് നാടുകടത്തുന്നത്. ഇന്ത്യ, ബംഗ്ലാദേശ്, ശ്രീലങ്ക എന്നീ രാജ്യങ്ങള് അംഗീകരിക്കുന്ന മുറക്ക് തടവുകാരെ നാട് കടത്തുന്നതിനാണ് നീക്കം. നാടുകടത്തല് കേന്ദ്രത്തില് കഴിയുന്നവരില് നിരവധി മലയാളികളും ഉള്പ്പെടുന്നു.
https://www.facebook.com/Malayalivartha
