കോവിഡ് 19 വ്യാപനത്തെ തുടര്ന്ന് ജോലി നഷ്ടപ്പെട്ടും രോഗബാധയെ തുടര്ന്നും ദുബായില് നിന്ന് സ്വദേശത്തേക്ക് മടങ്ങുന്നവര്ക്കൊരു 'പേര്ഷ്യന് പെട്ടി'; ഹൃദയം നിറയും, നല്കാം നല്ലൊരു കയ്യടി
കോവിഡ് 19 വ്യാപനത്തെ തുടര്ന്ന് ജോലി നഷ്ടപ്പെട്ടും രോഗബാധയെ തുടര്ന്നും ദുബായില് നിന്ന് സ്വദേശത്തേക്ക് മടങ്ങുന്ന പ്രവാസികള്ക്ക് ദുബായ് ആസ്ഥാനമായി പ്രവര്ത്തിക്കുന്ന എമിറേറ്റ്സ് കമ്പനീസ് ഹൗസ് ആണ് വ്യത്യസ്തമായ ഈ 'വിസ്മയപ്പെട്ടി' സമ്മാനിക്കുന്നത്. ഇത് വെറുമൊരു 'പേര്ഷ്യന് പെട്ടി'യല്ല, ദുരിതമഴയ്ക്കൊടുവില് നാടിന്റെ തണലിലേയ്ക്ക് പോകുന്നവര്ക്കുള്ള 'സാന്ത്വനപ്പെട്ടി' കൂടിയാണിത്.
കോവിഡ് ദുരിതം വിതച്ചപ്പോള് ഗള്ഫില് നിന്ന് മടങ്ങുന്ന പ്രിയപ്പെട്ടവരുടെ അവസ്ഥ ഒരു പക്ഷേ, നാട്ടിലുള്ള കൊച്ചുമക്കള്ക്ക് അറിയാന് കഴിയണമെന്നില്ല . അവര്ക്ക് പിതാവോ സഹോദരനോ മറ്റും ഗള്ഫില് നിന്ന് ഒത്തിരി സമ്മാനങ്ങളുമായി തിരിച്ചുവരുന്നെന്നേ അറിയാവൂ. എന്നാല് നാട്ടിലേയ്ക്ക് കൊണ്ടുപോകാന് ഒന്നും വാങ്ങാന് പറ്റാത്ത അവസ്ഥയാണു മടങ്ങിപ്പോകുന്ന മിക്കവരുടേതും.കൈ നിറയെ സമ്മാനങ്ങളും കാത്തിരിക്കുന്ന ആ കുരുന്നുകളെ ഈ സാഹചര്യം വലിയ നിരാശയിലാക്കിയേക്കാം. ഈ സാഹചര്യത്തിലാണ് അവശ്യ വസ്തുക്കള് അടങ്ങിയ 12 കിലോയുടെ പെട്ടി തിരഞ്ഞെടുക്കപ്പെട്ട 50 പേര്ക്ക് ആദ്യഘട്ടത്തില് നല്കുന്നതെന്ന് എമിറേറ്റ്സ് കമ്പനീസ് ഹൗസ് സിഇഒ ഇക്ബാല് മാര്ക്കോണി പറഞ്ഞു.
കുട്ടികള്ക്ക് ചോക്ലേറ്റ്, ബിസ്കറ്റ്, ബദാം, പിസ്ത, ഈത്തപ്പഴം, നിഡോ, ടാങ്ക്, പെര്ഫ്യൂം, ടോര്ച്ച്, ടാല്കം പൗഡര്, ടൈഗര് ബാം, നഖംവെട്ടി തുടങ്ങി 15 ലധികം സാധനങ്ങള് പെട്ടിയിലുണ്ട്. ഇത് ഏറെ സമ്മര്ദങ്ങളനുഭവിച്ച ശേഷം നാട്ടിലേയ്ക്ക് മടങ്ങുന്നവരില് പകരുന്ന ആശ്വാസം നിസാരമല്ല. ഒരു കാലത്ത് ചോദിക്കുന്നവര്ക്കെല്ലാം വാരിക്കോരി നല്കി കൈയയഞ്ഞ് സഹായിച്ചവരുടെ നെടുവീര്പ്പും മനസിലെ നെരിപ്പോടും നിസ്സംഗതയോടെ നോക്കിനിലക്കാന് കഴിയാതിരുന്നതിനാലാണ് ഇത്തരമൊരു പേര്ഷ്യന് പെട്ടി ആശയം നടപ്പിലാക്കിയതെന്ന് കോഴിക്കോട് സ്വദേശിയായ ഇക്ബാല് മാര്ക്കോണി പറഞ്ഞു.
https://www.facebook.com/Malayalivartha
