മെറിന്റെ മൃതദേഹം നാട്ടിലെത്തിക്കുന്നതിനുള്ള തടസങ്ങള്‍ നീങ്ങി! പൊംപാനോ ബീച്ച്‌ ആശുപത്രിയില്‍ നടത്തിയ മെറിന്റെ കൊറോണ പരിശോധനാ ഫലം നെഗറ്റീവ്; പോസ്റ്റുമോര്‍ട്ട നടപടികള്‍ പൂര്‍ത്തിയാക്കി മൃതദേഹം ഇന്ന് ബന്ധുക്കള്‍ക്ക് െകെമാറും
അമേരിക്കയില്‍ ഭര്‍ത്താവിന്റെ അതിക്രൂരതയ്ക്ക് ഇരയായ മലയാളി നേഴ്‌സ് മോനിപ്പളളി ഊരാളില്‍ മെറിന്‍ ജോയി (28) ന്റെ മൃതദേഹം ഇന്ത്യയിലേക്ക് കൊണ്ടുവരുന്നതിനുളള അനുമതിക്കായി കുടുംബാഗങ്ങള്‍ ഇന്നലെ എംബസിയെ സമീപിച്ചു.
പൊംപാനോ ബീച്ച്‌ ആശുപത്രിയില്‍ നടത്തിയ മെറിന്റെ കൊറോണ പരിശോധനാ ഫലം നെഗറ്റീവായതോടെ മൃതദേഹം നാട്ടിലെത്തിക്കുന്നതിനുള്ള തടസങ്ങള്‍ നീങ്ങിയതായി അമേരിക്കയിലുളള ബന്ധുക്കള്‍ പറഞ്ഞു. പോസ്റ്റുമോര്‍ട്ട നടപടികള്‍ പൂര്‍ത്തിയാക്കി മൃതദേഹം ഇന്ന് ബന്ധുക്കള്‍ക്ക് െകെമാറും. മെറിന്റെ മൃതദേഹം പ്രത്യേക പ്രാര്‍ത്ഥനക്കും കുടുംബാഗങ്ങള്‍ക്കും സഹപ്രവര്‍ത്തകര്‍ക്കും ആദരാഞ്ജലികള്‍ അര്‍പ്പിക്കാനുമായി നാളെ ഫ്‌ളോറിഡയിലെ താമ്ബ ക്‌നാനായ കത്തോലിക്കാ പളളിയില്‍ പൊതുദര്‍ശനത്തിന് വയ്ക്കും.
മെറിന്റെ പിതാവ് ജോയിയുടെ ന്യൂയോര്‍ക്കിലും ഫ്‌ളോറിഡയിലുമായുളള മാതൃസഹോദരങ്ങളെ പോലീസ് വിളിച്ചുവരുത്തി മൊഴി രേഖപ്പെടുത്തി. മെറിന്‍ ജോലി ചെയ്തിരുന്ന കിഴക്കന്‍ ഫ്‌ളോറിഡയിലെ ബ്രോവാഡ് ഹെല്‍ത്ത് കോറല്‍ സ്പ്രിങ്‌സ് ആശുപത്രി അധികൃതരും നടപടികള്‍ വേഗത്തിലാക്കാന്‍ സഹകരിച്ചുവെന്ന് ബന്ധുക്കള്‍ പറഞ്ഞു.
പോലീസ് ആശുപത്രിയിലും പാര്‍ക്കിങ് ഏരിയായിലുളള സി.സി.ടി.വികള്‍ പരിശോധിക്കുകയും ആശുപത്രി അധികൃതരുടെയും നേഴ്‌സുമാരുടെയും സെക്യൂരിറ്റി ജീവനക്കാരന്റെയും മൊഴി രേഖപ്പെടുത്തിയതായി മെറിനൊപ്പം ജോലി ചെയ്തിരുന്ന മലയാളി നഴ്‌സ് പറഞ്ഞു. പോലീസ് കസ്റ്റഡിയില്‍ ആശുപത്രിയില്‍ കഴിയുന്ന മെറിന്റെ ഭര്‍ത്താവ് ചങ്ങനാശേരി ആഞ്ഞിലിക്കാതറയില്‍ നെവിന്‍ (ഫിലിപ് മാത്യു - 34) ന്റെ പരുക്ക് സാരമുളളതല്ല.
ആക്രമണത്തിനുശേഷം ഹോട്ടല്‍ മുറിയില്‍ സ്വയം മുറിവേല്‍പിച്ച നിലയില്‍ കണ്ടെത്തിയ നെവിന്‍ പോലീസ് കാവലിലാണ്. ഇന്നലെ നെവിനില്‍ നിന്ന് അന്വേഷണ ഉദ്യോഗസ്ഥര്‍ വിവരങ്ങള്‍ ശേഖരിച്ചു.
തിങ്കളാഴ്ചത്തേക്ക് ജുഡീഷ്യല്‍ കസ്റ്റഡിയില്‍ ഹാജരാക്കുമെന്നാണ് സൂചന.മെറിന്റെ മോനിപ്പളളിയിലെ വീട്ടിലേക്ക് വിളിച്ച്‌ പ്രതിപക്ഷ നേതാവ് രമേശ് ചെന്നിത്തല പിതാവ് ജോയിയെ അനുശോചനം അറിയിച്ചു. ഡി.സി.സി െവെസ് പ്രസിഡന്റ് ബിജു പുന്നത്താനം വീട്ടിലെത്തി രമേശ് ചെന്നിത്തലയുടെ അനുശോചനം ടെലിഫോണിലൂടെ ജോയിയെ അറിയിക്കുകയായിരുന്നു.
സമൂഹ മാധ്യമങ്ങളിലൂടെ മെറിനെതിരെ നടത്തി വരുന്ന അപകീര്‍ത്തിപരമായ സന്ദേശങ്ങളില്‍ പിതാവ് ജോയി പ്രതിപക്ഷ നേതാവിനോട് പരാതി പറഞ്ഞു. കേന്ദ്രമന്ത്രി വി. മുരളീധരന്‍ ഫോണില്‍ മെറിന്റെ പിതാവ് ജോയിയുമായി സംസാരിച്ചു. വിദേശകാര്യ മന്ത്രാലയത്തിന്റെ ഇടപെടല്‍ ഉണ്ടാകുമെന്ന് മന്ത്രി പിതാവിന് ഉറപ്പുനല്‍കി.
ബി.ജെ.പി നേതാക്കളായ ലിജിന്‍ ലാല്‍, വേണുക്കുട്ടന്‍, ടി.എ ഹരിക്യഷ്ണന്‍, സി.എം പവിത്രന്‍, സനോജ് കുമാര്‍, അശ്വന്ത് മാമലശേരി, ടി.സി രാധാക്യഷ്ണന്‍ എന്നിവരാണ് വീട്ടിലെത്തിയത്.
https://www.facebook.com/Malayalivartha
