സ്കൂൾ അവധിയും വിഷു, പെരുന്നാൾ ഉൽസവ സീസണും ഒരുമിച്ച് എത്തിയതോടെ നിരവധി പ്രവാസികളാണ് നാട്ടിലേക്ക് തിരിക്കാൻ ഒരുങ്ങിയത്. എന്നാൽ ടിക്കറ്റ് നിരക്ക് കണ്ടതോടെ പലരും യാത്ര മാറ്റിവയ്ച്ചു. ദിവസങ്ങൾക്കുള്ളിൽ തന്നെ മൂന്നിരട്ടിയിലേറെയാണ് നിരക്ക് വർധിച്ചത്. വേനൽക്കാല ഷെഡ്യൂളിൽ നിരവധി എയർ ഇന്ത്യ വിമാനങ്ങൾ സർവീസ് അവസാനിപ്പിച്ചതും പ്രവാസികൾക്ക് കനത്ത തിരിച്ചടിയായി. എന്നാൽ നിരക്ക് കുത്തനെ ഉയർന്നിരിക്കുന്ന ഈ സമയത്ത് പ്രവാസികൾക്ക് വമ്പൻ ഓഫർ പ്രഖ്യാപിച്ചിരിക്കുകയാണ് എയർ ഇന്ത്യ എക്സ്പ്രസ്സ്.

കേരളത്തിലെ പ്രധാനപ്പെട്ട രണ്ട് സെക്റ്ററുകളിലേക്കാണ് ഈ ഓഫർ. കൊച്ചി, കോഴിക്കോട് എന്നീ സെക്ടറിലേക്കാണ് നിരക്ക് ഇളവ് പ്രഖ്യാപിച്ചിരിക്കുന്നത്. 240 റിയാലിന് വൺവെ ടിക്കറ്റ് നിങ്ങൾക്ക് സ്വന്തമാക്കാം. സൗദിയിലെ വിവിധ സ്ഥലങ്ങളിൽ നിന്നും സർവീസ് കേരളത്തിലേക്ക് ഉണ്ട്. ഇന്ത്യ രൂപ 5500ൽ താഴെ വരും നിരക്ക്. കിഴക്കൻ സൗദിയിൽ നിന്നും കോഴിക്കോട് സെക്ടറിലേക്ക് ഏറ്റവും കുറഞ്ഞ നിരക്ക്.

240 റിയാൽ ഓഫർ ഈ മാസം പല ദിവസങ്ങളിലും ലഭിക്കും. ഏപ്രിൽ 25, 26, ദിവസങ്ങളിൽ 240 റിയാലിന് ടിക്കറ്റ് ലഭിക്കും, ഏപ്രിൽ 27, 30 തിയ്യതികളിൽ 350 റിയാലിനും ദമാമിൽ നിന്ന് കരിപ്പൂരിലേക്ക് ടിക്കറ്റുകൾ ലഭിക്കും. രാത്രി 12:10 ന് ദമാമിൽ നിന്ന് വരുന്ന വിമാനം രാവിലെ 07:05 നാണ് കോഴിക്കോട് എത്തുക.ഹാൻഡ് ബാഗിന് പുറമെ 30 കിലോ ലഗേജും കൊണ്ട് പോകാൻ സാധിക്കും.

ദമാമിൽ നിന്ന് കൊച്ചിയിലേക്ക് ഏപ്രിൽ 11 മാത്രമാണ് ഈ ഓഫർ ലഭിക്കുക. ആഴ്ചയിൽ ഒരു സർവ്വീസ് മാത്രമാണ് കൊച്ചിയിലേക്ക് നടത്തുക. ദമാമിൽ നിന്ന് എക്സ്പ്രസ്സ് സർവീസ് മാത്രമേ കൊച്ചിയിലേക്ക് നടത്തുന്നുള്ളു. ഏപ്രിൽ 25 നിരക്ക് കുറവ് കാണിക്കുന്നുണ്ട്. ചില ദിവസങ്ങളിൽ 500 റിയാൽ വരെ കാണിക്കുന്നുണ്ട്. ടിക്കറ്റുകൾ വാങ്ങാനായി ട്രാവർ ഏജൻസികളെയോ അല്ലെങ്കിൽ എയർ ഇന്ത്യ എക്സ്പ്രസ്സ് വെബ്സൈറ്റ് സന്ദർശിക്കാം.

അതേസമയം, യു.എ.ഇ.യിൽ നിന്ന് കേരളത്തിലേക്ക് ഏതാനും മാസങ്ങളായി ശരാശരി 7000 രൂപയ്ക്ക് ലഭിച്ചിരുന്ന ടിക്കറ്റിന് വിഷുവിനോട് അടുത്ത ദിവസങ്ങളിൽ നിരക്ക് 15000 രൂപയോളമാണ്. പെരുന്നാളിന് അടുത്ത ദിവസങ്ങളിൽ ഈ നിരക്ക് പിന്നെയും ഉയർന്ന് 20000 രൂപയിലേറെയാകുന്നുണ്ട്. വിഷു ദിവസം ഇതേ സെക്ടറിൽ യാത്ര ചെയ്യാനുള്ള നിരക്ക് 24,266 രൂപയാണ്.

പെരുന്നാളിനോട് അടുത്ത ദിവസങ്ങളിലും 22,000 രൂപക്ക് മുകളിലാണ് നിരക്ക്. ഏറ്റവും ചെലവ് കുറഞ്ഞ എയർ ഇന്ത്യ എക്സ്പ്രസിന്റെ നിരക്കാണ് ഇതെങ്കിൽ മറ്റു വിമാനങ്ങളിലേത് ഒട്ടും താങ്ങാനാവാത്ത നിരക്കാണ്. അടുത്ത ദിവസങ്ങളിൽ നിരക്ക് ഇനിയും വർധിക്കും. ഉത്സവകാലത്ത് നാടണയാൻ കൊതിക്കുന്ന സാധാരണ പ്രവാസികൾക്കും, നാട്ടിലെ സ്കൂളവധിക്ക് ഗൾഫിലേക്ക് പറക്കാൻ ഒരുങ്ങുന്ന കുടുംബങ്ങൾക്കും ടിക്കറ്റിന് മാത്രം വൻതുകയാണ് ചെലവ് വരിക.