പ്രവാസികൾക്കാകെ തലവേദനയായിരിക്കുകയാണ് എയർ ഇന്ത്യ എക്‌സ്പ്രസിന്റെ സോഫ്റ്റ് വെയർ നവീകരണം. ഇതുമൂലം ബുദ്ധിമുട്ടിലായിരിക്കുന്നത് പ്രവാസികളും ട്രാവൽ ഏജൻസികളുമാണ്. നാട്ടിൽ കുടുംബത്തോടൊപ്പം നോമ്പു തുറക്കാൻ എത്തിയവർ ഇതോടെ തിരിച്ചു പോകാൻ ആകെ പെട്ടിരിക്കുകയാണ്.വിമാനകമ്പനികളുടെ വെബ്‌സൈറ്റിൽ ദിവസങ്ങളായി പല വിവരങ്ങളും ലഭ്യമല്ല.

റിസർവേഷൻ വിവരങ്ങളും, യാത്രാ റദ്ദാക്കൽ വിവരങ്ങളും വെബ്‌സൈറ്റിലില്ല. ഇത് യാത്രക്കാരെ വലിയ രീതിയിൽ വലക്കുന്നു. സോഫ്റ്റ് വെയർ നവീകരണം നടക്കുന്നുണ്ട്. രണ്ട് ദിവസം കൊണ്ട് എല്ലാ പ്രശ്നങ്ങളും പരിഹരിക്കും യാത്രക്കാർ ക്ഷമിക്കണം എന്ന് എയർ ഇന്ത്യ അധികൃതർ അറിയിച്ചിരുന്നു. എന്നാൽ പത്ത് ദിവസത്തിലധികം ആയിട്ടും സെെറ്റിലെ കാര്യങ്ങൾ അവതാളത്തിൽ തന്നെ തുടരുകയാണ്.

പല സേവനങ്ങളുടെ നിരക്കും കുത്തനെ ഉയർത്തിയതായി വെബ്‌സൈറ്റിൽ കാണിക്കുന്നുണ്ട്. കുട്ടികൾക്കായുള്ള പ്രത്യേക ടിക്കറ്റ് നിരക്ക് വെബ്‌സൈറ്റ് നവീകരണത്തിന്റെ ഭാഗമായി ആദ്യം തന്നെ കാണാതെ പോയിരുന്നു. ഇതിനെ കുറിച്ചുള്ള വലിയ വിശദീകരണം ഒന്നും ഇതുവരെ എത്തിയിട്ടില്ല. നേരത്തേ ടിക്കറ്റെടുത്തവരുടെ റിസർവേഷൻ വിവരങ്ങൾ എല്ലാം സാധാരണയായി സെെറ്റിൽ കാണേണ്ടതാണ്. എന്നാൽ ഇപ്പോൾ അതൊന്നും സെെറ്റിൽ കാണുന്നില്ല. വിവരങ്ങൾ അറിയുന്നതിന് വേണ്ടി കോൾസെന്ററിലേക്ക് വിളിച്ചാലും അവർക്ക് വ്യക്തമായ മറുപടിയൊന്നുമില്ല.