വേനൽക്കാല ഷെഡ്യൂളിൽ നിരവധി എയർ ഇന്ത്യ വിമാനങ്ങൾ സർവീസ് അവസാനിപ്പിച്ചതും പ്രവാസികൾക്ക് കനത്ത തിരിച്ചടിയായിരുന്നു. അതിനിടെ ഗള്‍ഫ് യാത്രക്കാരെ വിമാനക്കമ്പനി കൂടുതല്‍ പ്രതിസന്ധിയിലാകുമെന്ന റിപ്പോര്‍ട്ടുകളാണ് പുറത്തുവരുന്നത്. ഗള്‍ഫിലേക്കുള്ള സര്‍വീസുകള്‍ വെട്ടിച്ചുരുക്കുകയാണ് എയര്‍ ഇന്ത്യ. യുഎഇ, ഖത്തര്‍, ഒമാന്‍ എന്നിവിടങ്ങളിലേക്കുള്ള വിമാന സര്‍വീസുകളിലാണ് എയര്‍ ഇന്ത്യയുടെ ഈ നടപടി.

ചില വിമാനങ്ങള്‍ രണ്ടാഴ്ചത്തേക്ക് റദ്ദാക്കിയിട്ടുമുണ്ട്. ഡല്‍ഹി-മസ്‌ക്കത്ത്, ഡല്‍ഹി-ദുബായ്, ഡല്‍ഹി-അബുദാബി എന്നീ സെക്ടറിലെ വീക്കിലി വിമാന സര്‍വീസുകളാണ് രണ്ടാഴ്ച്ചത്തേക്ക് റദ്ദാക്കാന്‍ തീരുമാനിച്ചു. എന്താണ് ഇത്രയും സര്‍വീസുകള്‍ കുറയ്ക്കാന്‍ കാരണം എന്ന ചോദ്യവും ഉയരുകയാണ്.നിലവില്‍ സര്‍വീസുകള്‍ കുറയ്ക്കുന്നത് താല്‍ക്കാലിക നടപടിയാണ് എന്നാണ് എയര്‍ ഇന്ത്യ ഉദ്യോഗസ്ഥര്‍ നല്‍കുന്ന സൂചന.

ശനിയാഴ്ചകളില്‍ ഡല്‍ഹിയില്‍ നിന്ന് മസ്‌കത്തിലേക്ക് സര്‍വീസ് നടത്തിയിരുന്ന വിമാനം ഏപ്രില്‍ 29 മുതല്‍ മെയ് 27 വരെ സര്‍വീസ് നടത്തില്ല. ട്രാവല്‍ ഏജന്റുമാര്‍ക്ക് എയര്‍ ഇന്ത്യ നല്‍കിയ സര്‍ക്കുലറിലാണ് ഇക്കാര്യം പറയുന്നത്. മാത്രമല്ല, ഞായറാഴ്ചകളിലെ ഡല്‍ഹി-ദോഹ സര്‍വീസ് ഏപ്രില്‍ 30 മുതല്‍ മെയ് 28 വരെയുണ്ടാകില്ല. ഡല്‍ഹി-ദുബായ് സര്‍വീസ് മെയ് 2 മുതല്‍ മെയ് 30 വരെയും ഡല്‍ഹി അബുദാബി വിമാനം മെയ് 3 മുതല്‍ 31 വരെയുമുണ്ടാകില്ല.

പെരുന്നാളിന് ശേഷം ഗള്‍ഫിലേക്കുള്ള കൂടുതല്‍ സര്‍വീസുകള്‍ വെട്ടിക്കുറയ്ക്കുമെന്നാണ് ഒരു ഉദ്യോഗസ്ഥര്‍ നൽകുന്ന വിവരം. എയര്‍ ഇന്ത്യ വീണ്ടും ടാറ്റ ഗ്രൂപ്പ് ഏറ്റെടുത്തതോടെ അന്താരാഷ്ട്ര സര്‍വീസുകള്‍ വര്‍ധിപ്പിക്കാന്‍ പദ്ധതിയുണ്ട്. കൂടുതല്‍ വിമാനങ്ങള്‍ വാങ്ങാനും തീരുമാനിച്ചു. അതേസമയം, ജീവനക്കാര്‍ വിആര്‍എസ് എടുത്തതോടെ പൈലറ്റുമാരില്ലാത്ത സാഹചര്യം വന്നു. ഇതോടെയാണ് സര്‍വീസുകളില്‍ മൊത്തം അഴിച്ചുപണി നടത്തുന്നത്. താല്‍ക്കാലിക അടിസ്ഥാനത്തില്‍ വിദേശ പൈലറ്റുമാരെ നിയമിക്കാന്‍ കമ്പനി ശ്രമിക്കുന്നുണ്ട്.

അതേസമയം, തിരുവനന്തപുരത്ത് നിന്നു ദുബായ്, അബുദാബി എന്നിവിടങ്ങളിലേക്ക് എയർ ഇന്ത്യ എക്സ്പ്രസ് സർവീസുകൾ വർധിപ്പിച്ചു. ആഴ്ചയിൽ 5 വീതം സർവീസുകൾ ഉണ്ടായിരുന്നത് 6 എണ്ണമാക്കി.രണ്ടിടങ്ങളിലേക്കും തിങ്കളാഴ്ചകളിലാണു പുതിയ സർവീസ്. ഇതോടെ ദുബായിലേക്ക് തിരുവനന്തപുരത്ത് നിന്നുള്ള പ്രതിവാര സർവീസ് 28 ആയി. അബുദാബിയിലേക്ക് 40 സർവീസുകളാണ് നടത്തുന്നത്.