ഖത്തറിലുണ്ടായ വാഹനാപകടത്തില്‍ മലയാളികള്‍ ഉള്‍പ്പെടെ അഞ്ച് മരണം. കൊല്ലം സ്വദേശികളായ മൂന്നുപേരും മറ്റ് രണ്ട് തമിഴ്‌നാട് സ്വദേശികളുമാണ് മരിച്ചത്. അപകടത്തില്‍ മരിച്ച മലയാളി ദമ്പതികളുടെ മൂന്ന് വയസുള്ള കുട്ടി ഗുരുതര പരിക്കേറ്റ് ചികിത്സയിലാണ്. ശക്തികുളങ്ങര കല്ലുംമൂട്ടില്‍ തോപ്പില്‍ റോഷിന്‍ ജോണ്‍ (38), ഭാര്യ ആന്‍സി ഗോമസ് (30), ആന്‍സിയുടെ സഹോദരന്‍ അഴീക്കല്‍ സ്വദേശി ജിജോ ഗോമസ് (34), ഇവരുടെ സുഹൃത്തുക്കളും തമിഴ്‌നാട് സ്വദേശികളുമായ നാഗലക്ഷ്മി ചന്ദ്രശേഖരന്‍ (33), ഭര്‍ത്താവ് പ്രവീണ്‍കുമാര്‍ (38) എന്നിവരാണ് മരിച്ചത്.

റോഷിന്റെയും ആന്‍സിയുടെയും മൂന്ന് വയസുള്ള മകന്‍ ഏദനാണ് ഖത്തര്‍ സിദ്ര മെഡിസിന്‍ ആശുപത്രിയില്‍ ചികിത്സയിലുള്ളത്. ബുധനാഴ്ച രാത്രി ദോഹയില്‍ നിന്ന് 70 കിലോമീറ്റര്‍ അകലെ അല്‍ഖോറിലായിരുന്നു അപകടം. അല്‍ഖോറിലെ ഫ്‌ളൈ ഓവറില്‍ വച്ച് ഇവര്‍ സഞ്ചരിച്ചിരുന്ന വാഹനം അപകടത്തില്‍പ്പെട്ട് പാലത്തില്‍ നിന്ന് താഴേക്ക് വീഴുകയായിരുന്നു. ആശുപത്രിയിലേക്കുള്ള യാത്രാമദ്ധ്യേയാണ് അഞ്ചുപേരും മരിച്ചത്. മൃതദേഹങ്ങള്‍ അല്‍ഖോര്‍ ആശുപത്രി മോര്‍ച്ചറിയിലേയ്ക്ക് മാറ്റിയിരുന്നു.