ഒമാനില്‍ കാര്‍ അപകടത്തില്‍പ്പെട്ട് മലയാളിയായ ആറുവയസ്സുകാരിക്ക് ദാരുണാന്ത്യം. എറണാകുളം പാലാരിവട്ടം സ്വദേശികളായ ടാക്കില്‍ ഫ്രാന്‍സിസ് ഓലാറ്റുപുറത്തിന്റെയും ഭവ്യ വര്‍ഗീസിന്റെയും മകളായ അല്‍ന ടകിന്‍(6) ആണ് മരിച്ചത്. സ്‌കൂളില്‍ നിന്ന് മടങ്ങവേ ചൊവ്വാഴ്ചയാണ് അപകടമുണ്ടായത്. സീബ് ഇന്ത്യന്‍ സ്‌കൂളിലെ രണ്ടാം ക്‌ളാസ് വിദ്യാര്‍ത്ഥിനിയാണ് മരിച്ച അല്‍ന ടകിന്‍.

സ്‌കൂളില്‍ നിന്ന് അമ്മയ്ക്കും രണ്ട് സഹോദരങ്ങള്‍ക്കുമൊപ്പം വീട്ടിലേയ്ക്ക് മടങ്ങവേയായിരുന്നു അപകടം. ഇവര്‍ സഞ്ചരിച്ചിരുന്ന കാര്‍ നിയന്ത്രണം വിട്ട് മറിയുകയായിരുന്നു. ആശുപത്രിയിലെത്തിച്ചെങ്കിലും അല്‍നയുടെ ജീവന്‍ രക്ഷിക്കാനായില്ല. കൂടെയുണ്ടായിരുന്ന അമ്മയുടെയും സഹോദരങ്ങളുടെയും പരിക്ക് സാരമുള്ളതല്ല. ഇവര്‍ ആശുപത്രി വിട്ടതിന് പിന്നാലെ നാട്ടിലേയ്ക്ക് തിരിച്ചു.