സ്വകാര്യ വ്യക്തികളുടെ സോഷ്യല് മീഡിയ അക്കൗണ്ടുകള് നിരീക്ഷിക്കില്ല; കുവൈത്ത് സൈബര് നിയമത്തില് വ്യക്തത വരുത്തി
വ്യക്തികളുടെ സോഷ്യല് മീഡിയ അക്കൗണ്ടുകള് നിരീക്ഷിക്കില്ലെന്നു കുവൈത്ത് ആഭ്യന്തര മന്ത്രാലയം. സാമൂഹ്യമാധ്യമങ്ങളെ നിയന്ത്രിക്കുന്നതിനായി രാജ്യത്തു പുതിയ സൈബര് നിയമം നടപ്പാക്കിയിട്ടില്ലെന്നും ഇമീഡിയ നിയമം ജനങ്ങളുടെ സ്വകാര്യവിവരങ്ങള് നിരീക്ഷിക്കാനുള്ളതല്ലെന്നും മന്ത്രാലയം വ്യക്തമാക്കി. ഓണ്ലൈന് പത്രങ്ങള്, ഓണ്ലൈന് ചാനലുകള്, സ്വകാര്യ വാര്ത്താ ഏജന്സികള്, ഇ ബുക്ക് തുടങ്ങിയവയുടെ പ്രവര്ത്തനങ്ങളില് സര്ക്കാരിന് കൂടുതല് നിയന്ത്രണവും നിരീക്ഷണവും സാധ്യമാക്കുന്നതാണ് ജനുവരി 12 മുതല് പ്രാബല്യത്തില് വന്ന ഇമീഡിയ നിയമം.
രാജ്യത്തു പുതിയ സൈബര് നിയമം നിലവില് വന്നു എന്ന രീതിയില് പ്രചരിക്കുന്ന വാര്ത്ത അടിസ്ഥാനരഹിതമാണെന്നും ജനുവരി 12 നു പ്രാബല്യത്തില് വന്ന ഇമീഡിയ നിയമം ഇലക്ട്രോണിക് വാര്ത്താ മാധ്യമങ്ങളെ സംബന്ധിക്കുന്നതാണെന്നും ആഭ്യന്തരമന്ത്രാലയം പ്രസ്താവനയില് അറിയിച്ചു.
വ്യക്തികളുടെ സോഷ്യല് മീഡിയ അക്കൗണ്ടുകളില് നുഴഞ്ഞു കയറി വിവരങ്ങള് ശേഖരിക്കാനും ഓണ്ലൈന് ഇടപെടലുകള് നിരീക്ഷിക്കാനും സര്ക്കാരിന് അധികാരം നല്കുന്ന നിയമം നിലവില് വന്നു എന്നായിരുന്നു കഴിഞ്ഞ ദിവസം ചില ഓണ്ലൈന് മാധ്യമങ്ങള് റിപ്പോര്ട്ട് ചെയ്തത്. വ്യക്തികളുടെ സ്വകാര്യതയിലേക്കു നുഴഞ്ഞു കയറാന് രാജ്യത്തെ ഒരു നിയമവും ആരെയും അനുവദിക്കുന്നില്ലെന്നു ആഭ്യന്തര മന്ത്രാലയം വക്താവ് മുഹമ്മദ് അല് അവ്വാശ് പറഞ്ഞു.
https://www.facebook.com/Malayalivartha