2017-ല്‍ യു.എ.ഇയില്‍ ദാനധര്‍മ വര്‍ഷാചരണം
പ്രസിഡന്റ് ശൈഖ് ഖലീഫ ബിന്‍ സായിദ് ആല്‍ നഹ്യാന്‍ യു.എ.ഇയുടെ ദാനധര്‍മ വര്‍ഷമായി 2017-നെ പ്രഖ്യാപിച്ചു. യു.എ.ഇ ദാനധര്‍മങ്ങളുടെ രാജ്യമാണെന്ന് ശൈഖ് ഖലീഫ പറഞ്ഞു. ഈ നാടിന്റെ ജന്‍മം മുതല്‍ ആരംഭിച്ചതാണ് ദാനവും ധര്‍മവും. വായന വര്‍ഷാചരണം 2016 സമാപിക്കുന്നതോടെ ദാനധര്‍മ വര്‍ഷാചരണം 2017-ല്‍ ആരംഭിക്കും. ദാനധര്‍മങ്ങള്‍ ചെയ്യാനും മറ്റുള്ളവരെ സഹായിക്കാനും രാജ്യവും ജനതയും പുലര്‍ത്തുന്ന നിലപാട് ഉയര്‍ത്തിക്കാട്ടുകയാണ് വര്‍ഷാചരണത്തിന്റെ ലക്ഷ്യമെന്ന് അദ്ദേഹം പറഞ്ഞു. ദാനധര്‍മ വര്‍ഷം ആചരിക്കുന്നത് മൂന്ന് മുഖ്യ അടിസ്ഥാനങ്ങളെ കേന്ദ്രീകരിച്ചാണ്. ഇതില്‍ ഒന്നാമത്തേത് സ്വകാര്യ സ്ഥാപനങ്ങള്‍ നടത്തുന്ന സാമൂഹിക പദ്ധതികളെ ഏകോപിപ്പിച്ച് രാജ്യപുരോഗതിക്കും വികസനത്തിനുമായി പ്രയോജനപ്പെടുത്തുകയെന്നതാണ്. രാജ്യത്തിന്റെ വികസനത്തിലേക്കുള്ള മുന്നേറ്റത്തില്‍ സംഭാവന നല്‍കാനും സമൂഹത്തെ സേവിക്കുന്നതിലുള്ള ഉത്തരവാദിത്തം പൂര്‍ത്തീകരിക്കാനും സ്വകാര്യ മേഖയില്‍ സാമൂഹിക ഉത്തരവാദിത്ത ബോധം വളര്‍ത്തുകയും ചെയ്യും. രണ്ടാമത്തേത് സന്നദ്ധപ്രവര്‍ത്തനത്തിനുള്ള താല്‍പര്യം പ്രോത്സാഹിപ്പിക്കുകയും സന്നദ്ധപ്രവര്‍ത്തകരെ പരിശീലിപ്പിച്ച് വിവിധ മേഖലകളില്‍ ഫലപ്രദമായ സേവനങ്ങള്‍ ലഭ്യമാക്കുകയുമാണ്. രാജ്യത്തെ സേവിക്കാനുള്ള പ്രതിബദ്ധതയും കൂറും വരും തലമുറയില്‍ ദൃഢമാക്കുക എന്നതാണ് മൂന്നാമത്തേത്.
ജീവകാരുണ്യ പ്രവര്‍ത്തനങ്ങള്‍ക്കും ലോകത്തെ നിര്‍ഭാഗ്യവാന്മാരായ മനുഷ്യരെ സഹായിക്കുന്ന കാര്യത്തിലും അറിയപ്പെടുന്ന രാജ്യമാണ് യു.എ.ഇ. ലോകത്തെ പ്രമുഖ മനുഷ്യ സ്‌നേഹിയായിരുന്ന ശൈഖ് സായിദ് ബിന്‍ ആല്‍ നഹ്യാന്റെ കാല്‍പ്പാടുകള്‍ പിന്‍പറ്റുന്നവരാണ് ഇവിടുത്തെ ജനങ്ങള്‍. ജീവകാരുണ്യമനുഷ്യ സ്‌നേഹ പ്രവര്‍ത്തനങ്ങളില്‍ മഹത്തായ മുന്നേറ്റം യു.എ.ഇ നടത്തിയിട്ടുണ്ടെന്നും ശൈഖ് ഖലീഫ കൂട്ടിച്ചേര്‍ത്തു.
2017 ദാനധര്‍മ വര്‍ഷമായി ആചരിക്കാനുള്ള ശൈഖ് ഖലീഫയുടെ നിര്‍ദേശം പ്രാവര്‍ത്തികമാക്കാനുള്ള സമഗ്രമായ ആസൂത്രണ രേഖ തയാറാക്കാന്‍ യു.എ.ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാശിദ് ആല്‍ മക്തൂം ആവശ്യപ്പെട്ടു. ഇതു വഴി സ്വകാര്യ, പൊതു മേഖലകളിലെ വ്യക്തികള്‍ക്കും സ്ഥാപനങ്ങള്‍ക്കും യു.എ.ഇയുടെ വികസന പ്രക്രിയയില്‍ ഫലപ്രദമായ രീതിയില്‍ പങ്കാളിത്തം വഹിക്കാന്‍ സാധിക്കും. രാജ്യത്തിന്റെ വികസന പ്രയാണത്തില്‍ സ്വകാര്യ മേഖലയുടെ പങ്കാളിത്തം അതി പ്രധാനമായതിനാല്‍ ദാനധര്‍മ വര്‍ഷത്തിന്റെ പരിപാടികളും സംരംഭങ്ങളും സ്വകാര്യ മേഖലയെ സവിശേഷമായി ലക്ഷ്യം വെക്കുന്നതാണെന്ന് ശൈഖ് മുഹമ്മദ് എടുത്ത് പറഞ്ഞു. ജീവകാരുണ്യ പ്രവര്‍ത്തനങ്ങള്‍ വ്യാപിപ്പിക്കുന്നതിന് ഒരു വര്‍ഷം അനുവദിച്ചത് ലോകത്തെ മനുഷ്യ സ്‌നേഹ പ്രവൃത്തികളില്‍ മുന്നില്‍ നില്‍ക്കുന്ന യു.എ.ഇയുടെ സ്ഥാനം വ്യക്തമാക്കുന്നതിനായിട്ടാണ്.
ഇതിന് യു.എ.ഇ പ്രസിഡന്റ് ശൈഖ് ഖലീഫ ബിന്‍ സായിദ് ആല്‍ നഹ്യാന്‍, അബൂദബി കിരീടാവകാശിയും യു.എ.ഇ സായുധ സേനാ ഡെപ്യൂട്ടി സുപ്രീം കമാന്‍ഡറുമായ ജനറല്‍ ശൈഖ് മുഹമ്മദ് ബിന്‍ സായിദ് ആല്‍ നഹ്യാന്‍ എന്നിവര്‍ക്ക് നന്ദി പറയുന്നതായും ശൈഖ് മുഹമ്മദ് അറിയിച്ചു.
യു.എ.ഇ നേതാക്കളില്‍നിന്നും രാജ്യത്തെ ഉദാരമതികളായ ജനങ്ങളില്‍നിന്നും അറബ് മേഖലക്കും ലോകത്തിനാകെയും സ്‌നേഹത്തിന്റെയും സൗഹാര്‍ദത്തിന്‍െയും പ്രത്യാശയുടെയും സന്ദേശമാണ് ദാനധര്‍മ വര്‍ഷാചരണമെന്നും അദ്ദേഹം പറഞ്ഞു.
https://www.facebook.com/Malayalivartha
