അനധികൃത ഓണ്‍ലൈന്‍ വ്യാപാരത്തിനെതിരെ കര്‍ശന നടപടിയുമായി ദുബൈ നഗരസഭ
ഫേസ്ബുക്, വാട്ട്‌സാപ്പ്, ഇന്‍സ്റ്റാഗ്രാം തുടങ്ങിയ വിവിധ സാമൂഹിക മാധ്യമങ്ങളിലൂടെയും വെബ്‌സൈറ്റുകളിലുടെയും നടത്തുന്ന അനധികൃത ഓണ്‍ലൈന്‍ വ്യാപാരത്തിനെതിരെ ദുബൈ നഗരസഭ കര്‍ശന നടപടിക്കൊരുങ്ങുന്നു. വെബ്‌സൈറ്റ് നിരോധിക്കുന്നതുള്‍പ്പെടെയുള്ള ശക്തമായ ശിക്ഷാ നടപടികളെക്കുറിച്ച് തങ്ങള്‍ ആലോചിച്ചുവരുന്നതായി നഗര സഭ ആരോഗ്യ,സുരക്ഷാ വകുപ്പ് ഡയറക്ടര്‍ റെധ ഹസന്‍ സല്‍മാന്‍ പത്രക്കുറിപ്പില്‍ അറിയിച്ചു. പ്രാദേശിക, ഫെഡറല്‍ അധികാരികളുടെ സഹായത്തോടെയായിരിക്കും നടപടി. നിയമപരമായ അനുമതി നേടിയാല്‍ മാത്രമേ യു.എ.ഇയില്‍ വ്യാപാരം നടത്താന്‍ സാധിക്കുകയുളളു. മാത്രമല്ല യു.എ.ഇയില്‍ രജിസ്റ്റര്‍ ചെയ്ത ഉത്പന്നങ്ങള്‍ മാത്രമേ അവിടെ വില്‍ക്കാന്‍ സാധിക്കു. ഇവ ഔട്ട്‌ലെറ്റുകളിലൂടെ വേണം വില്‍ക്കാന്‍. സൗന്ദര്യ വര്‍ധക വസ്തുക്കളുടെയും വ്യക്തി ശുചിത്വ ഉത്പന്നങ്ങളുടെയും അനധികൃതമായി വില്‍പ്പനക്കെതിരെ ഉപഭോക്താക്കളും ജാഗ്രത പാലിക്കണം. ഔട്ട്‌ലെറ്റുകളിലൂടെ വില്‍ക്കുന്ന ഉത്പന്നങ്ങള്‍ 89 ശതമാനവും നിയമം പാലിച്ചുള്ളതാണെന്ന പരിശോധനയില്‍ വ്യക്തമായതായി റെധ ഹസന്‍ പറഞ്ഞു ആരോഗ്യത്തിന് ഹാനികരമായ വസ്തുക്കള്‍ പോലും ഓണ്‍ലൈനിലൂടെ അനധികൃതമായി വില്‍ക്കുന്നുണ്ട്.
https://www.facebook.com/Malayalivartha
