മരുഭൂമിയിലെ ആട്ടിടയന്മാര്ക്ക് സംരക്ഷണം വാഗ്ദാനം ചെയ്ത് മുന്‍സിപ്പാലിറ്റി പരിസ്ഥിതി മന്ത്രാലയം
മരുഭൂമിയില്‍ താമസിക്കുന്ന ആട്ടിടയന്മാര്ക്ക് സംരക്ഷണവും പിന്തുണയും വാഗ്ദാനം ചെയ്ത് മുന്‍സിപ്പാലിറ്റി പരിസ്ഥിതി മന്ത്രാലയം. ഖത്തര്‍ ചാരിറ്റി, ഷെയ്ഖ് ഥാനി ബിന്‍ അബ്ദുല്ലാഹ് ഫൗണ്ടേഷന്‍ ഫോര്‍ ഹ്യുമാനിറ്ററേിയന്‍ സര്‍വ്വീസസ്(റാഫ്), ഖത്തര്‍ റെഡ് ക്രസന്റ്, ഷെയ്ഖ് ഈദ് ചാരിറ്റബിള്‍ ഫൗണ്ടേഷന്‍, വാസല്‍ കമ്പനി എന്നിവയുടെ സഹകരണത്തോടെയാണ് മന്ത്രാലയം ക്യാമ്പയിന്‍ സംഘടിപ്പിക്കുന്നത്.
ക്യാമ്പയിനിന്റെ ആരംഭഘട്ടത്തില്‍ ഫാമുകളില്‍ തൊഴിലെടുക്കുന്ന സെക്യൂരിറ്റി ഗാര്‍ഡുകളെയും 400-ഓളം ആട്ടിടയന്‍മാരെയുമാണ് ഉള്‍പ്പെടുത്തുന്നത്. ക്യാമ്പയിനില്‍ കഠിനമായ കാലാവസ്ഥയില്‍ സ്വയം സംരക്ഷിക്കുന്നതിനുളള മാര്‍ഗങ്ങളെകുറിച്ച് അവബോധം നല്‍കും. തൊഴിലാളികളുടെ പ്രാദേശിക ഭാഷയിലുള്ള ബുക്ക്‌ലെറ്റ്, ബ്‌ളാങ്കറ്റ്, ടോര്‍ച്ച്, ജാക്കറ്റ് എന്നിവ അടങ്ങിയ ഷെപ്പേര്‍ഡ് ബാഗ് ക്യാമ്പില്‍ വിതരണം ചെയ്യും. അടുത്ത ഞായറാഴ്ച ആരംഭിക്കുന്ന പരിപാടി 19ന് അവസാനിക്കും.
ഖത്തര്‍ റെഡ് ക്രസന്റ് ആട്ടിടയന്മാരുടെ ആരോഗ്യ സുരക്ഷിതത്വത്തിനായുള്ള അവബോധ പ്രഭാഷണങ്ങളും മെഡിക്കല്‍ ടെസ്റ്റുകളും നടത്തും. പ്രഥമ ശുശ്രൂഷകളെകുറിച്ചും ഇവര്‍ക്ക് അവബോധം നല്‍കും. ചില മെഡിക്കല്‍ ഉപകരണങ്ങളും ഇവര്‍ക്ക് നല്‍കും. തെരഞ്ഞെടുക്കപ്പെടുന്ന മികച്ച ആട്ടിടയന്മാര്ക്ക് ചാരിറ്റികളുടെ ചെലവില്‍ ഉംറ ചെയ്യാനുള്ള അവസരവും ലഭിക്കും. സമൂഹത്തിലെ ഇത്തരം മേഖലകളില്‍ ജോലി ചെയ്യന്നവരോടുള്ള ബഹുമാനവും അവര്‍ക്ക് നല്‍കുന്ന ശ്രദ്ധയുമാണ് ഈ ക്യാമ്പ് തെളിയിക്കുന്നത്. ഇത് വിജയം കണ്ടാല്‍ കൂടുതല്‍ മേഖലകളിലേക്ക് കൂടി ഇത്തരം ശ്രമങ്ങള്‍ വ്യാപിപ്പിക്കുമെന്ന് റാഫ് പ്രതിനിധി അബ്ദുല്ലാഹ് അല്‍ മഹ്മൂദ് പറഞ്ഞു.
https://www.facebook.com/Malayalivartha
