ഗള്‍ഫ് രാജ്യങ്ങളിലേക്കുള്ള മെഡിക്കല്‍ പരിശോധന നിരക്ക് കുത്തനെ വര്‍ധിപ്പിച്ചു
ഗള്‍ഫ് രാജ്യങ്ങളിലേക്ക് ആദ്യമായി പോകുന്നവര്‍ക്കും പുതിയ വിസയില്‍ വീണ്ടും ജോലിക്ക് പോകുന്നവര്‍ക്കുമാണ് മെഡിക്കല്‍ സര്‍ട്ടിഫിക്കറ്റ് ആവശ്യമായി വരുന്നത്. വര്‍ഷങ്ങള്‍ക്ക് മുമ്പ് വളരെ കുറഞ്ഞ ചിലവിലാണ് ഈ പരിശോധന നടന്നിരുന്നത്. എന്നാല്‍ ഇന്നത്തെ സാഹചര്യം അങ്ങനെയല്ല. ഒരു മാനദണ്ഡവുമില്ലാതെയാണ് വര്‍ഷംതോറും നിരക്ക് വര്‍ധിപ്പിക്കുന്നത്. മെഡിക്കല്‍ സര്‍ട്ടിഫിക്കറ്റിനായി ഗാംകയുടെ (ജി.സി.സി അപ്രൂവ്ഡ് മെഡിക്കല്‍ സെന്‍േറഴ്‌സ് അസോസിയേഷന്‍) ഓഫിസുകളിലാണ് രജിസ്റ്റര്‍ ചെയ്യേണ്ടത്.
കോഴിക്കോട്, എറണാകുളം, മഞ്ചേരി, തിരൂര്‍ തലക്കടത്തൂര്‍ എന്നിവിടങ്ങളിലാണ് ഗാംക ഓഫിസുകളുള്ളത്. ഇവിടെ ഫീസ് അടച്ചതിന് ശേഷം ഇവര്‍ നിര്‍ദേശിക്കുന്ന ആശുപത്രിയിലാണ് മെഡിക്കല്‍ പരിശോധന നടത്തേണ്ടത്. കുറച്ചുനാളുകള്‍ക്ക് മുന്‍പ് അംഗീകാരമുള്ള ഏത് ആശുപത്രിയില്‍നിന്നും ഗള്‍ഫിലേക്കുള്ള മെഡിക്കല്‍ പരിശോധന നടത്താമായിരുന്നു. എന്നാല്‍ ഇപ്പോള്‍ ഗാംകയില്‍നിന്ന് നിര്‍ദേശിക്കുന്ന ആശുപത്രിയില്‍ നടത്തുന്ന പരിശോധന മത്രമേ അംഗീകരിക്കുകയുളളു.
പരിശോധനയില്‍ പരാജയപ്പെടുമെന്ന് ഭീഷണിപ്പെടുത്തി കൂടുതല്‍ തുക ചില ആശുപത്രികള്‍ ഈടാക്കുന്നതായി പരാതിയുണ്ട്. പരാതിപെട്ടാല്‍ യാത്രയെ ബാധിക്കുമെന്നു കരുതി ആരും പുറത്തുപറയാന്‍ തയ്യാറാകില്ല. സര്‍ക്കാര്‍ ഈ വിഷയത്തില്‍ ഇടപെടണുമെന്നാണ് ആവശ്യം. മെഡിക്കല്‍ പരിശോധന നിരക്കില്‍ ഒറ്റയടിക്ക് 1,100 രൂപയുടെ വര്‍ധനയാണ് വരുത്തിയത്. സൗദി അറേബ്യയിലേക്ക് മെഡിക്കല്‍ പരിശോധനക്ക് 4,400 രൂപ ഈടാക്കിയിരുന്ന സ്ഥാനത്ത് ഇപ്പോള്‍ 5,500 രൂപ നല്‍കണം. 4,000 രൂപയായിരുന്ന മറ്റു ഗള്‍ഫ് രാജ്യങ്ങളിലെ പുതിയ നിരക്ക് 5,000 രൂപയാണ്.
https://www.facebook.com/Malayalivartha
