കേരള മുഖ്യമന്ത്രി പിണറായി വിജയന്റെ ബഹ്‌റൈന്‍ സന്ദര്‍ശനത്തിന് ഇന്ന് തുടക്കമാകുന്നു
മുഖ്യമന്ത്രിയായ ശേഷം ബഹ്‌റൈനിലേക്കുളള പിണറായി വിജയന്റെ ആദ്യ യാത്രയാണിത്. മൂന്ന് ദിവസത്തെ സന്ദര്‍ശനത്തിനായാണ് അദ്ദേഹം ബഹറൈനില്‍ എത്തിയത്. ബഹ്‌റൈന്‍ കിരീടാവകാശിയായ പ്രിന്‍സ് സല്‍മാന്‍ ബിന്‍ ഹമദ് ആല്‍ ഖലീഫയുടെ അതിഥിയായാണ് മുഖ്യമന്ത്രി എത്തുന്നത്. മുഖ്യമന്ത്രിയുടെ മാധ്യമ ഉപദേഷ്ടാവ് ജോണ്‍ ബ്രിട്ടാസ്, പ്രിന്‍സിപ്പല്‍ സെക്രട്ടറി നളിനി നെറ്റോ എന്നിവരും പിണറായിയെ അനുഗമിക്കുന്നുണ്ട്. കേരളത്തിലെ പ്രവാസി വകുപ്പ് കൈകാര്യം ചെയ്യുന്നത് മുഖ്യമന്ത്രി ആയതിനാല്‍ ഗള്‍ഫ് പ്രവാസികളുടെ പൊതുവിലുളള പ്രശ്‌നങ്ങള്‍ അദ്ദേഹത്തിന് മുന്നില്‍ നേരിട്ടും നിവേദനമായും അറിയിക്കാനുളള തീരുമാനങ്ങള്‍ സംഘടനകള്‍ നടത്തിയിട്ടുണ്ട്.
വ്യാഴാഴ്ച കാലത്ത് മുഖ്യമന്ത്രി രാജാവ് ഹമദ് ബിന്‍ ഈസ ആല്‍ ഖലീഫ, പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ ഖലീഫ, കിരീടാവകാശി എന്നിവരുമായി കൂടിക്കാഴ്ച നടത്തും. മുഖ്യമന്ത്രിയോടുള്ള ആദരസൂചകമായി ബഹ്‌റൈന്‍ വിദേശകാര്യമന്ത്രി ശൈഖ് ഖാലിദ് ബിന്‍ അഹമ്മദ് ബിന്‍ മുഹമ്മദ് ആല്‍ ഖലീഫ വിരുന്നൊരുക്കും. വൈകീട്ട് അഞ്ചര മണിക്ക് കേരളീയ സമാജത്തിന്റെ 70-ാം വാര്‍ഷികാഘോഷ പരിപാടികള്‍ തുടങ്ങും. ഇതിന്റെ ഉദ്ഘാടനം മുഖ്യമന്ത്രി നിര്‍വഹിക്കും.
പ്രഥമ കൈരളി ബഹ്‌റൈന്‍ എക്‌സലന്‍സ് അവാര്‍ഡുകള്‍ വെള്ളിയാഴ്ച കാലത്ത് 9.30ന് മുഖ്യമന്ത്രി വിതരണം ചെയ്യും. ചടങ്ങ് നടക്കുന്നത് ഡിപ്‌ളോമറ്റ് റാഡിസണ്‍ ഹോട്ടലിലാണ്. വ്യവസായവാണിജ്യ രംഗത്തെ പ്രഗല്‍ഭരെ ചടങ്ങില്‍ നല്‍കി ആദരിക്കും. പ്രമുഖ പ്രവാസി വ്യവസായി ഡോ. രവി പിള്ള അധ്യക്ഷനായ ജൂറിയാണ് പുരസ്‌കാര ജേതാക്കളെ തെരഞ്ഞെടുത്തത്. മികച്ച സാമൂഹിക പ്രവര്‍ത്തകനുള്ള പുരസ്‌കാരവും ചടങ്ങില്‍ സമ്മാനിക്കും. പുരസ്‌കാര ജേതാക്കളെ ചടങ്ങില്‍ പ്രഖ്യാപിക്കും.
പ്രവാസി സമൂഹം മുഖ്യമന്ത്രിക്ക് ഒരുക്കുന്ന പൗരസ്വീകരണം നടക്കുന്നത് വെള്ളിയാഴ്ച വൈകീട്ട് അഞ്ചുമണിക്കാണ്. ഇതും കേരളീയസമാജത്തിലാണ്്. 'പ്രതിഭ' നേതാവ് സി.വി.നാരായണന്‍ ജന.കണ്‍വീനറും കേരളീയ സമാജം അധ്യക്ഷന്‍ പി.വി.രാധാകൃഷ്ണപിള്ള ചെയര്‍മാനുമായ വിപുലമായ കമ്മിറ്റിയാണ് ഈ പരിപാടിയുടെ ഒരുക്കങ്ങള്‍ക്ക് മേല്‍നോട്ടം വഹിച്ചത്. വെള്ളിയാഴ്ചത്തെ മുഖ്യമന്ത്രിയുടെ പരിപാടിയില്‍ ബാബുല്‍ ബഹ്‌റൈന്‍, മനാമ സൂഖ്, കിങ് ഫഹദ് കോസ്വെ, ബഹ്‌റൈന്‍ മ്യൂസിയം തുടങ്ങിയ സ്ഥലങ്ങളുടെ സന്ദര്‍ശനവും ഉള്‍പ്പെടുത്തിയിട്ടുണ്ട്. ശനിയാഴ്ച രാത്രിയാണ് അദ്ദേഹം മടങ്ങുന്നത്.
https://www.facebook.com/Malayalivartha
