പ്രവാസി തൊഴിലാളികള്ക്ക് സൗജന്യ ഇന്റര്നെറ്റ് സേവനം ലഭിക്കുന്ന പദ്ധതി നടപ്പിലാകുന്നു
പ്രവാസി തൊഴിലാളികള്ക്ക് തങ്ങളുടെ താമസസ്ഥലത്ത് സൗജന്യ ഇന്റര്നെറ്റ് സേവനം ലഭ്യമാക്കുന്ന പദ്ധതി ഉടന് വരുന്നു. സാങ്കേതിക വിദ്യയുടെ പ്രയോജനം തൊഴിലാളികള്ക്ക് ലഭ്യമാക്കുന്നതാണ് പുതിയ പദ്ധതി. ഗതാഗത വാര്ത്താവിനിമയ മന്ത്രാലയവും തൊഴില് മന്ത്രാലയവും സംയുക്തമായി ചേര്ന്നാണ് ഈ പദ്ധതി നടപ്പിലാക്കുന്നത്.
ഈ പദ്ധതിയിലൂടെ തൊഴിലാളികള്ക്ക് അടിസ്ഥാന ഐ.സി.ടി പരീശീലനും നല്കാനും സാമൂഹിക മാധ്യമ വേദികള് അവര്ക്ക് പരിചയപ്പെടുത്താനും സാധിക്കുമെന്നാണ് ഗതാഗത വാര്ത്താവിനിമയ മന്ത്രാലയം വ്യക്തമാക്കുന്നത്.
വിവിധ സര്ക്കാര്, സ്വകാര്യ സംഘടനകള് സംഭാവന നല്കിയ 15,000 ഓളം കമ്പ്യൂട്ടറുകള് ഉപയോഗിച്ച് പദ്ധതിയുടെ ഗ്രീന് കമ്പ്യൂട്ടര് ക്ലബ്ബ് നവീകരിക്കും. തുടര്ന്ന് തൊഴിലുടമകളുടെ സഹകരണത്തോടെ തൊഴിലാളികളുടെ താമസ സ്ഥലത്ത് 1,500 ഐ.സി.ടി. സൗകര്യം സ്ഥാപിക്കും. ഇന്റര്നെറ്റ് സൗകര്യമുളള പത്ത് കമ്പ്യൂട്ടറുകള് ഉള്ക്കൊള്ളുന്നതാണ് ഒരു ഐ.സി.ടി. ഇതിനായി തൊഴിലുടമ ലേബര് ക്യാമ്പുകളില് പ്രത്യേക സൗകര്യങ്ങള് നല്കണം.
തൊഴിലാളികള്ക്ക് കമ്പ്യൂട്ടറും ഇന്റര്നെറ്റും ഉപയോഗിക്കാനുളള പരിശീലനം പ്രത്യേക പരിശീലനം നേടിയ സന്നദ്ധ പ്രവര്ത്തകര് നല്കും. പദ്ധതിക്കായി ആദ്യ വര്ഷത്തില് 750 ഓളം സന്നദ്ധ പ്രവര്ത്തകരെ നിയമിക്കാനാണ് തീരുമാനം. ഇവര്ക്ക് ഗ്രീന് കമ്പ്യൂട്ടര് ക്ലബ്ബില് അംഗത്വം നല്കുകയും തൊഴിലാളികള്ക്ക് പരിശീലനം നല്കുകയും ചെയ്യും. കഴിവുകളുള്ള തൊഴിലാളികളെ കണ്ടെത്തി അവര്ക്കാകും ആദ്യം പരിശീലനം നല്കുന്നത്.
https://www.facebook.com/Malayalivartha