വാടക ഇടപാടുകള് നിയന്ത്രിക്കാന് ദുബൈയില് ഏകീകൃത വാടകചട്ടം ഭൂ വകുപ്പ് പുറത്തിറക്കി
മാര്ച്ച് മുതല് ദുബൈയില് വാടക ഇടപാടുകള് നിയന്ത്രിക്കാന് ഏകീകൃത വാടകചട്ടം ദുബൈ ഭൂ വകുപ്പ് പുറത്തിറക്കി. കെട്ടിട ഉടമയും വാടകക്കാരും ഉള്പ്പെടെ കരാറില് ഏര്പ്പെടുന്ന എല്ലാ കക്ഷികളുടെയും ഉത്തരവാദിത്വങ്ങള് നിഷ്കര്ഷിക്കുന്നതാണ് നിയമം. എല്ലാവരുടെയും അവകാശങ്ങള് സംരക്ഷിച്ച് മികച്ച പരസ്പര ബന്ധം സാധ്യമാക്കുക എന്നതാണ് ഈ സംവിധാനത്തിന്റെ ലക്ഷ്യമെന്ന് അധികൃതര് പറഞ്ഞു.
ഈ നിയമപ്രകാരം കെട്ടിടത്തിന്റെ എല്ലാവിധ അറ്റകുറ്റപ്പണികളും തീര്ത്തുകൊടുക്കേണ്ടത് ഉടമയുടെ ഉത്തരവാദിത്വമാണ്. എന്നാല് ഇരു കക്ഷികളുടെയും സമ്മതത്തോടെ ഉത്തരവാദിത്വം വാടകക്കാരെ ഏല്പ്പിക്കാന് വ്യവസ്ഥയുണ്ട്. പക്ഷെ ഇത് നിര്ബന്ധിച്ച് ഏല്പ്പിക്കുന്നതാവരുത്. ചില പ്രത്യേക സന്ദര്ഭങ്ങളില് കാലാവധി തീരും മുന്പേ വാടകക്കാരെ ഒഴിപ്പിക്കാന് കെട്ടിട ഉടമക്ക് അധികാരമുണ്ട്.
വാടകക്കാര് കെട്ടിടം മറ്റാര്ക്കെങ്കിലും വാടകക്ക് നല്കുന്നതും അനധികൃത, നിയമവിരുദ്ധ പ്രവര്ത്തനങ്ങള് നടത്തുന്നതും വീട്ടില് നിന്ന് പുറത്താവാന് കാരണമാവും. തയ്യാറാക്കിയ വാടക കരാറിന്റെ പകര്പ്പുകള് വാടകക്കാരും വസ്തു ഉടമകളും കൈവശം സൂക്ഷിക്കേണ്ടത് നിര്ബന്ധമാണ്.
https://www.facebook.com/Malayalivartha
