കുവൈത്തില് മലയാളികളടക്കമുള്ള തൊഴിലാളികള് ഇന്ത്യന് എംബസിയില് പരാതിയുമായെത്തി
നിര്മാണ മേഖലയില് പ്രവര്ത്തിക്കുന്ന പ്രമുഖ കമ്പനിയായ ഖറാഫി നാഷനല് കമ്പനിലെ തൊഴിലാളികളാണ് ആറുമാസമായി ശമ്പളം കിട്ടുന്നില്ലെന്ന പരാതിയുമായി ഇന്ത്യന് എംബസിയില് എത്തിയത്. കമ്പനിയുടെ ശുഐബ ക്യാമ്പിലുള്ള 200 ഓളം ഇന്ത്യന് തൊഴിലാളികള് കമ്പനി യൂണിഫോമില് മൂന്ന് ബസുകളിലായാണ് എംബസിയില് പരാതി ബോധിപ്പിക്കാനത്തെിയത്.
വിവിധ രാജ്യക്കാരായ 1500ഓളം തൊഴിലാളികള് ക്യാമ്പില് ദുരിത ജീവിതം നയിക്കുകയാണെന്നും ശമ്പളം നല്കാത്തതിനോടൊപ്പം ശുചീകരണപ്രവൃത്തികള് മുടങ്ങിയതുള്പ്പെടെയുളള പ്രശനങ്ങള് തൊഴിലാളികള് എംബസിയെ അറിയിച്ചു. എംബസി പരാതി രേഖപ്പെടുത്തുകയും കമ്പനി അധികൃതരെ വിളിപ്പിച്ച് തൊഴിലാളികളുമായി ചര്ച്ചക്ക് അവസരമൊരുക്കുകയും ചെയ്തു. ഈ മാസം 22നും മാര്ച്ച് ഒന്നിനും മുടങ്ങിയ ശമ്പള കുടിശ്ശിക നല്കാമെന്ന് കമ്പനി അധികൃതര് ഉറപ്പുനല്കി.
ജോലി രാജിവെച്ച് പോയവരുടെ ശമ്പള കുടിശ്ശികയും ആനുകൂല്യങ്ങളും സംബന്ധിച്ച പൂര്ണ വിവരങ്ങള് ഒരാഴ്ചക്കുള്ളില് അറിയിക്കണമെന്നും എംബസി കമ്പനി അധികൃതര്ക്ക് നിര്ദേശം നല്കിയിട്ടുണ്ട്. സ്ഥാനപതി സുനില് ജെയിന്, ഡെപ്യൂട്ടി ചീഫ് ഓഫ് മിഷന് സുബാഷിഷ് ഗോള്ഡര് എന്നിവരാണ് ചര്ച്ചയില് പങ്കെടുത്തത്. ഒരാഴ്ചക്കുള്ളില് എംബസി പ്രതിനിധികള് ക്യാമ്പ് സന്ദര്ശിക്കുമെന്ന് തൊഴിലാളികള്ക്ക് സ്ഥാനപതി ഉറപ്പുനല്കിയിട്ടുണ്ട്.
https://www.facebook.com/Malayalivartha
