ഫളക്സിബിള് വര്ക്പെര്മിറ്റ് ഒരുക്കങ്ങള് പൂര്ത്തിയായി വരുന്നതായി ലേബര് മാര്ക്കറ്റ് റെഗുലേറ്റി അതോറിറ്റി അറിയിച്ചു
'ഫളക്സിബിള് വര്ക്പെര്മിറ്റി'നുള്ള ഒരുക്കങ്ങള് പൂര്ത്തിയായി വരുന്നതായി ലേബര് മാര്ക്കറ്റ് റെഗുലേറ്റി അതോറിറ്റി ചീഫ് എക്സിക്യൂട്ടിവ് ഓഫീസര് ഉസാമ അല് അബ്സി പറഞ്ഞു. വിവിധ കാരണങ്ങളാല് വിസയില്ലാതെ ബഹ്റൈനില് തുടരേണ്ടി വന്നവര്ക്ക് നിയമവിധേയമായി തൊഴിലെടുക്കാനുള്ള സാഹചര്യമൊരുക്കുന്നതാണ് 'ഫളക്സിബിള് വര്ക്പെര്മിറ്റ്. ഈ പെര്മിറ്റ് എടുക്കുന്ന തൊഴിലാളികള്ക്ക് പാര്ട്ട് ടൈം ആയോ, മുഴുവന് സമയമോ ഒരു തൊഴിലുടമയുടെയോ ഒന്നിലധികം പേരുടെയോ കീഴില് ജോലി ചെയ്യാം. ഏപ്രില് മുതലാണ് ഇത് പ്രാബല്യത്തില് വരുന്നത്.
രാജ്യത്തിന്റെ സമ്പദ്വ്യവസ്ഥയെയും തൊഴില് വിപണിയെയും ശക്തമാക്കാന് ഈ പദ്ധതി ഉപകരിക്കെമെന്നാണ് പ്രതീക്ഷ. മിഡില് ഈസ്റ്റില് ആദ്യമായാണ് ഇത്തരമൊരു തീരുമാനം കൈക്കൊള്ളുന്നത്. വിവിധ കാരണങ്ങളാല് മതിയായ രേഖകളില്ലാതെ ഇവിടെ തുടരേണ്ടിവന്നവര്ക്ക് നിയമവിധേയമായി രാജ്യത്ത് തുടരാനുള്ള സാഹചര്യമാണ് ഇതുവഴി ഒരുങ്ങുന്നത്. ഫഌ്സിബിള് വര്ക്പെര്മിറ്റിന് അപേക്ഷിക്കേണ്ടത് തൊഴിലാളി തന്നെയാണ്. താമസം, സോഷ്യല് ഇന്ഷൂറന്സ്, ആരോഗ്യ പരിരക്ഷ തുടങ്ങിയ കാര്യങ്ങളുടെ ഉത്തരവാദിത്തം തൊഴിലാളിക്കുതന്നെയായിരിക്കും.
2000 പേര്ക്കാണ് ആദ്യഘട്ടത്തില് പെര്മിറ്റ് നല്കുന്നത്. 2016 സപ്തംബര് 20 വരെയുള്ള കാലത്ത് ജോലി നഷ്ടപ്പെടുകയോ വിസ പുതുക്കാതിരിക്കുകയോ ചെയ്തശേഷവും ബഹ്റൈനില് തുടരുന്നവര്ക്കാണ് ഫളക്സിബിള് പെര്മിറ്റ് എടുക്കാനാവുക. ഹെല്ത്ത് കെയര് ഇനത്തില് 144 ദിനാറും പ്രതിമാസം ഫീസായി 30 ദിനാര് വീതവും നല്കണം. ഇതിനുപുറമെ, നാട്ടിലേക്ക് മടങ്ങാനുള്ള വിമാനടിക്കറ്റിനുള്ള പണവും ഡെപ്പോസിറ്റ് ആയി നല്കേണ്ടി വരും.
https://www.facebook.com/Malayalivartha
