ഇന്ത്യന്‍ വനിതാ ഗാര്‍ഹിക തൊഴിലാളി റിക്രൂട്‌മെന്റ് കുവൈത്ത് പുനരാരംഭിക്കും
2015 മുതല്‍ മുടങ്ങിയ ഇന്ത്യയിലെ വനിതാ ഗാര്‍ഹികത്തൊഴിലാളികളുടെ റിക്രൂട്‌മെന്റ് പുനരാരംഭിക്കാന്‍ കുവൈത്ത് നടപടികള്‍ തുടങ്ങിയതായി ആഭ്യന്തര മന്ത്രാലയത്തിലെ ഗാര്‍ഹികത്തൊഴില്‍ വകുപ്പ് ഡയറക്ടര്‍ മുഹമ്മദ് അല്‍ അജ്മി അറിയിച്ചു. ഇതിനായി പ്രത്യേക സമിതിയെ ചുമതലപ്പെടുത്തിയിട്ടുണ്ട്. വനിതാ ഗാര്‍ഹികത്തൊഴിലാളികളെ റിക്രൂട്ട് ചെയ്യുമ്പോള്‍ സ്‌പോണ്‍സര്‍ 750 ദിനാര്‍ ബാങ്ക് ഗാരന്റി അടയ്ക്കണമെന്ന് ഇന്ത്യ ഉപാധി വച്ചിരുന്നു. ഈ നിര്‍ദേശം അംഗീകരിക്കാന്‍ കുവൈത്ത് വിസമ്മതിച്ചതോടെ ഗാരന്റി നിര്‍ദേശം പിന്‍വലിക്കാന്‍ ഇന്ത്യ നിര്‍ബന്ധിതരായി. ഇതേ തുടര്‍ന്ന് വനിതാ ഗാര്‍ഹികത്തൊഴിലാളി റിക്രൂട്‌മെന്റ് കുവൈത്ത് നിര്‍ത്തിവയ്ക്കുകയായിരുന്നു. പല രാജ്യങ്ങളും വനിതാ ഗാര്‍ഹികത്തൊഴിലാളികളെ അയയ്ക്കുന്നതു നിര്‍ത്തലാക്കിയതോടെയുണ്ടായ ഗാര്‍ഹികത്തൊഴിലാളി ക്ഷാമത്തെതുടര്‍ന്നാണ് ഇന്ത്യയില്‍നിന്നു റിക്രൂട്‌മെന്റ് പുനരാരംഭിക്കാന്‍ കുവൈത്ത് തയ്യാറായത്.
കുവൈത്തിലെത്തുന്ന വനിത ഗാര്‍ഹികത്തൊഴിലാളികള്‍ പല വിധത്തിലും ചൂഷണം ചെയ്യപ്പെടുന്നത് ഒഴുവാക്കാനാണ് ഇന്ത്യ കടുത്ത നടപടികള്‍ സ്വീകരിച്ചത്. തൊഴിലിടത്തിലെ പ്രശ്‌നവുമായി ബന്ധപ്പെട്ടു തിരിച്ചു പോകേണ്ടിവന്നാല്‍ പ്രയോജനപ്പെടുത്തുന്നതിനാണ് ബാങ്ക് ഗാരന്റി നിര്‍ദേശിച്ചിരുന്നത്. 30 വയസ്സില്‍ താഴെ പ്രായമുള്ളവര്‍ക്ക് ഗാര്‍ഹിക തൊഴിലിനു പോകാന്‍ അനുമതിയില്ല. പുതിയ ഗാര്‍ഹികത്തൊഴില്‍ നിയമം തൊഴിലാളിയുടെയും തൊഴിലുടമയുടെയും റിക്രൂട്ടിങ് ഓഫിസുകളുടെയും അവകാശങ്ങള്‍ സംരക്ഷിക്കുന്നതാണെന്നും ി കുവൈത്ത് ഗാര്‍ഹികത്തൊഴില്‍ വകുപ്പ് ഡയറക്ടര്‍ മുഹമ്മദ് അല്‍ അജ്മി പറഞ്ഞു.
https://www.facebook.com/Malayalivartha
