വ്യാജ യാത്രാരേഖകള്‍ എളുപ്പത്തില്‍ തിരിച്ചറിയുന്നതിനുള്ള നൂതന സംവിധാനങ്ങള്‍ ദുബായ് അന്താരാഷ്ട്ര വിമാനത്താവളത്തില്‍ സജ്ജമാക്കിയിട്ടുണ്ട്. ഇമിഗ്രേഷന്‍ വകുപ്പിനുകീഴിലുള്ള രേഖാ പരിശോധനാ കേന്ദ്രത്തിന്റെ സഹായത്തോടെയാണ് ഈ സംവിധാനം നടപ്പിലാക്കുന്നത്. 2016 ജനുവരി മുതല്‍ 2017 ജനുവരി വരെയുള്ള കാലയളവില്‍ 718 വ്യാജ പാസ്‌പോര്‍ട്ടുകളാണ് കണ്ടെത്തിയത്. തിരുത്തലുകള്‍ വരുത്തിയ 20 പാസ്‌പോര്‍ട്ടും ആള്‍മാറാട്ടം നടത്തിയ 417 പേരെയും കണ്ടെത്തി.

സുരക്ഷാസംവിധാനം ശക്തമാക്കുന്നതിനും യാത്രികരുടെ രേഖകള്‍ കൃത്യമായി പരിശോധിച്ച് ഉറപ്പുവരുത്താനും ഈ സംവിധാനം സഹായിക്കും. എക്‌സ്‌പോയ്ക്കായി എത്തുന്ന ലക്ഷക്കണക്കിന് സഞ്ചാരികളെക്കൂടി മുന്നില്‍കണ്ടാണ് ഇത്തരം സംവിധാനങ്ങള്‍ ഒരുക്കിയതെന്ന് രേഖാപരിശോധനാ വിഭാഗം തലവന്‍ അഖീല്‍ അഹമ്മദ് അല്‍ നജ്ജാര്‍ പറഞ്ഞു. 1,700 ജീവനക്കാരെയാണ് ഇതിനായി നിയോഗിച്ചിരിക്കുന്നത്. ഇവര്‍ക്ക് പ്രത്യേക പരിശീലനവും നല്‍കിയിട്ടുണ്ട്. സാങ്കേതിക സംവിധാനങ്ങളുടെ സഹായത്തോടെ അഞ്ചുമിനിറ്റ് കൊണ്ട് കൃത്രിമ പാസ്‌പോര്‍ട്ടുകള്‍ തിരിച്ചറിയാന്‍ ഇവര്‍ക്ക് സാധിക്കും.