പൊതുമാപ്പിനുളള ആദ്യ ദിനത്തില്‍ അഞ്ഞൂറോളം ഇന്ത്യക്കാരാണ് റിയാദിലെ ഇന്ത്യന്‍ എംബസിയിലും ജിദ്ദയിലെ ഇന്ത്യന്‍ കോണ്‍സുലേറ്റിലുമായി അപേക്ഷ നല്‍കിയത.് എമര്‍ജന്‍സി സര്‍ട്ടിഫിക്കറ്റിന് (ഇസി) നേരത്തെ മുന്നൂറ്റിയന്‍പതു പേര്‍ അപേക്ഷിച്ചിരുന്നു. ഇനി അപേക്ഷിക്കുന്നവര്‍ക്ക് ഇസി സൗജന്യമായി നല്‍കുമെന്ന് എംബസി അറിയിച്ചു. ജിദ്ദയ്ക്കു പുറത്ത് തബൂക്ക്, മദീന, യാന്‍ബു, മക്ക, തായിഫ്, ഖുന്‍ഫുദ, അല്‍ബാഹ, ബിഷ, അബ്ഹഖമീസ് മുഷൈത്ത്, നജ്‌റാന്‍, ജിസാന്‍ എന്നിവിടങ്ങളിലാണു സഹായകേന്ദ്രങ്ങളുള്ളത്. ഇസി അപേക്ഷ സ്വീകരിക്കുമെങ്കിലും വിതരണം എംബസിയോ കോണ്‍സുലേറ്റോ വഴിയായിരിക്കും. ജിദ്ദയിലുള്ളവര്‍ക്കു രണ്ടുദിവസത്തിനകവും പുറത്തുള്ളവര്‍ക്ക് ഒരാഴ്ചയ്ക്കകവും ഇസി ലഭിക്കും. മൂന്നുമാസമാണു പൊതുമാപ്പ് കാലാവധി. സൗദി ആഭ്യന്തര മന്ത്രാലയം സജ്ജമാക്കിയ 98 പ്രത്യേക കേന്ദ്രങ്ങളില്‍ വിവിധ രാജ്യക്കാരായ നൂറുകണക്കിന് അപേക്ഷകര്‍ ആദ്യദിവസമെത്തി. മറ്റു രാജ്യങ്ങളിലെ നയതന്ത്ര കാര്യാലയങ്ങളും സഹായകേന്ദ്രമൊരുക്കി രംഗത്തുണ്ട്. 

പൊതുമാപ്പിന് അപേക്ഷിക്കുന്നവരെ സഹായിക്കുന്നതിനായി എംബസിയിലും കോണ്‍സുലേറ്റിലും 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം തുറന്നു. എംബസി നമ്പര്‍: 800 2471232. കോണ്‍സുലേറ്റ്: 800 2440003. വാട്‌സാപ്: 055 6122301. ജിദ്ദയിലെ ഇന്ത്യന്‍ കോണ്‍സുലേറ്റിനു കീഴില്‍ 11 സഹായകേന്ദ്രങ്ങള്‍ ആരംഭിച്ചതായി കോണ്‍സല്‍ ജനറല്‍ മുഹമ്മദ് നൂര്‍ റഹ്മാന്‍ ഷെയ്ഖ് അറിയിച്ചു. രാവിലെ ഒന്‍പതു മുതല്‍ അഞ്ചുവരെയാണു സമയം. ഇഖാമയില്ലാത്തവര്‍ എന്‍ട്രിബോഡിങ് നമ്പരാണു നല്‍കേണ്ടത്. തുടര്‍ന്ന് കംപ്യൂട്ടര്‍ നല്‍കുന്ന അപ്പോയ്ന്റ്‌മെന്റ് നമ്പരും തീയതിയും സമയവും സ്ഥലവും അനുസരിച്ച് പാസ്‌പോര്‍ട് ഓഫിസിലെത്തിയാല്‍ വിടുതല്‍ ലഭിക്കും. പൊതുമാപ്പ് ഉപയോഗപ്പെടുത്തുന്നവര്‍ത്ത് തിരിച്ച് വരുന്നതിനും നിയമം അനുവാദം നല്‍കുന്നു.