14 കാരിയായ മകൾ വീട്ടുകാർ അറിയാതെ കൂട്ടുകാരികൾക്കൊപ്പം റസ്​റ്റോറൻറിൽ പോയി. ഇതറിഞ്ഞ അമ്മ മകളെ മുറിയിൽ പൂട്ടിയിട്ടു. ഒടുവിൽ കുട്ടി ഇൻസ്​റ്റാഗ്രാമിലൂടെ പൊലീസിനെ വിവരമറിയിച്ചു. ദുബായിലാണ് സംഭവം. സ്​കൂളിൽ നിന്ന്​ മുങ്ങിയാണ്​ കുട്ടികൾ റസ്​റ്റോറൻറിൽ പോയത്​. കുട്ടിയെ അമ്മ മർദ്ദിക്കുകയും സ്കൂളിൽ വിടാതെ രണ്ടുദിവസം പൂട്ടിയിടുകയും ചെയ്തു.

അമ്മ മർദ്ദിക്കുന്നത് കുട്ടിയുടെ പിതാവ് കണ്ടെങ്കിലും പ്രതികരിച്ചില്ല. രക്ഷപ്പെടാൻ വേറെ വഴിയില്ലാതിരുന്ന കുട്ടി ഇൻസ്​റ്റാഗ്രാമിലൂടെ പൊലീസിനെ കാര്യം അറിയിച്ചു. കുട്ടി ​ഐപാഡ്​ വഴിയാണ്​ പൊലീസുമായി ബന്ധ​പ്പെട്ടതെന്ന്​ ദുബൈ പൊലീസിലെ മനുഷ്യാവകാശ വിഭാഗം ഡയറക്​ടർ ബ്രിഗേഡിയർ മുഹമ്മദ്​ അൽ മുർ പറഞ്ഞു. കുട്ടി വിവരമറിയിച്ച ഉടൻതന്നെ പൊലീസ്​ എത്തി കുട്ടിയെ മോചിപ്പിക്കുകയായിരുന്നു.

പിതാവ് ഇതെല്ലാം കണ്ടിട്ടും ഇടപെട്ടില്ലെന്നും​ കുട്ടികളുടെയും സ്​ത്രീകളുടെയും സുരക്ഷക്കായുള്ള വിഭാഗം ഡയറക്​ടർ ലഫ്​. കേണൽ സയ്യിദ്​ റഷീദ്​ അൽ ഹെലി പറഞ്ഞു. കുട്ടിയെ അച്ചടക്കം പഠിപ്പിക്കുകയായിരുന്നു ലക്ഷ്യമെന്നാണ്​ അമ്മ പറഞ്ഞത്. കൗമാരക്കാരായ കുട്ടികളോട്​ മാതാപിതാക്കൾ ഇങ്ങനെയല്ല പെരുമാറേണ്ടതെന്ന്​ ബ്രിഗേഡിയർ മുഹമ്മദ്​ അൽ മുർ പറഞ്ഞു. സുഹൃത്തുക്കളെപ്പോലെ വേണം കുട്ടികളെ കരുതാൻ. സംഭവം ആവർത്തിച്ചാൽ ശിക്ഷാ നടപടികൾ സ്വീകരിക്കേണ്ടിവരുമെന്ന്​ അദ്ദേഹം കുട്ടിയുടെ അമ്മക്ക്​ മുന്നറിയിപ്പ്​ നൽകുകയും ചെയ്തു.