കുവൈത്തില് പൊതുമാപ്പ് ഇന്നുമുതല് പ്രാബല്യത്തില്, രാജ്യം വിടാന് സന്നദ്ധരായി എത്തുന്നവര്ക്ക് എല്ലാവിധ സഹായങ്ങളും നല്കണമെന്ന് ആഭ്യന്തരമന്ത്രാലയത്തിന്റെ നിര്ദ്ദേശം
കുവൈത്തില് ആഭ്യന്തരവകുപ്പ് പ്രഖ്യാപിച്ച പൊതുമാപ്പ് ഇന്നു മുതല് പ്രാബല്യത്തില്. താമസരേഖകള് ഇല്ലാത്തവര്ക്ക് ശിക്ഷാനടപടികളോ പിഴയോ ഇല്ലാതെ തന്നെ രാജ്യം വിടാന് ആഭ്യന്തരമന്ത്രാലയം അനുവദിച്ച സമയപരിധി ജനുവരി 29 മുതല് ഫെബ്രുവരി 22 വരെയാണ്. രാജ്യം വിടാന് സന്നദ്ധരായി എത്തുന്നവര്ക്ക് എല്ലാവിധ സഹായങ്ങളും നല്കണമെന്ന് വിവിധ വകുപ്പുകള്ക്ക് ആഭ്യന്തരമന്ത്രാലയം നിര്ദേശം നല്കി.
അനധികൃതമായി രാജ്യത്തു കഴിയുന്ന വിദേശികള് ഇളവുകാലം പ്രയോജനപ്പെടുത്തണമെന്ന് ആഭ്യന്തരമന്ത്രാലയം നിര്ദേശിച്ചു. പൊതുമാപ്പ് പ്രയോജനപ്പെടുത്താന് എത്തുന്നവര്ക്ക് നടപടികള് എളുപ്പത്തില് പൂര്ത്തീകരിച്ചു നല്കണമെന്ന് ഇഖാമ വകുപ്പ് ഓഫിസുകള്ക്കും അധികൃതര് നിര്ദേശം നല്കി. താമസരേഖയില്ലാത്തവര്ക്ക് പൊതുമാപ്പിന്റെ ആനുകൂല്യം പ്രയോജനപ്പെടുത്താന് സഹായിക്കാനായി കുവൈത്ത് കെ.എം.സി.സി ഹെല്പ് ഡെസ്ക്കുകള് തുടങ്ങുന്നു.
ഇഖാമ കാലാവധി കഴിഞ്ഞും രാജ്യത്ത് തങ്ങുന്നവരെ ബോധവത്കരിക്കാനും കേസ് സ്പോണ്സര്മാരുമായി സംസാരിക്കാനും പാസ്പോര്ട്ട് ലഭ്യമാക്കാനും പ്രത്യേകസംഘം പ്രവര്ത്തിക്കും. എംബസി പ്രവര്ത്തനസമയത്ത് ഇന്ത്യന് എംബസിയില് കെ.എം.സി.സി ഹെല്പ് ഡെസ്കിന് പ്രത്യേക കൗണ്ടറുണ്ടാവും. അബ്ബാസിയ കെ.എം.സി.സി ഓഫിസ്, കുവൈത്ത് സിറ്റി (ഗ്രാന്ഡ് ഹൈപ്പര്), ഫഹാഹീല് (ഗ്രാന്ഡ് ഹൈപ്പര്), ഫര്വാനിയഖൈതാന് (കെ.എം.സി.സി. ഫര്വാനിയ ഓഫിസ്) എന്നിവിടങ്ങളിലും വൈകീട്ട് ഹെല്പ് ഡെസ്ക് ഉണ്ടാവും. കൂടുതല് വിവരങ്ങള്ക്ക്: 99775898, 55143105.
ഒളിച്ചോട്ട പരാതികളില് ഉള്പ്പെട്ടവരും ഇഖാമ കാലാവധി കഴിയാത്തവരും ആണെങ്കില് പാസ്പോര്ട്ട് കൈവശമുണ്ടെങ്കില് വിമാനത്താവളം, കര അതിര്ത്തികള് എന്നിവയിലൂടെ നേരിട്ട് നാട്ടിലേക്ക് പോകാം. അതേസമയം, താല്ക്കാലിക പാസ്പോര്ട്ട്, എമര്ജന്സി സര്ട്ടിഫിക്കറ്റ് എന്നിവയാണ് കൈവശമുള്ളതെങ്കില് താമസകാര്യ വകുപ്പിലെ ക്രിമിനല് ഇന്വെസ്റ്റിഗേഷന് വിഭാഗത്തിലെത്തി പാസ്പോര്ട്ട് നഷ്ടപ്പെട്ടതായി സത്യവാങ്മൂലം നല്കണം. ഇതിനായി പ്രത്യേക ഫോറം പൂരിപ്പിച്ചുനല്കണം. ഇന്വെസ്റ്റിഗേഷന്വകുപ്പ് അപേക്ഷ പരിശോധിച്ചശേഷം അപേക്ഷകന്റെ ഏകീകൃതനമ്പര് അഥവാ റക്കം മുവഹദ് പുതിയ യാത്രാരേഖയില് രേഖപ്പെടുത്തും. ഇതിനുശേഷം വിമാനത്താവളത്തിലെയോ അതിര്ത്തി കവാടങ്ങളിലെയോ എമിഗ്രഷന് ഉദ്യോഗസ്ഥര്ക്ക് ആളെ തിരിച്ചറിയാനും യാത്രാനടപടിക്രമങ്ങള് എളുപ്പമാക്കാനും വേണ്ടിയാണ് ഏകീകൃത നമ്പര് രേഖപ്പെടുത്തുന്നത്.
കൂടാതെ അവധിയില് പ്രവേശിച്ചിട്ടുള്ള ജീവനക്കാരോട് ജോലിക്ക് ഹാജരാകാനും നിര്ദേശമുണ്ട്. താമസകാര്യ വകുപ്പിന്റെ സര്ക്കുലര് പ്രകാരം ഇഖാമ കാലാവധി കഴിഞ്ഞതിനാല് നിയമലംഘകരായി മാറിയവര് താമസകാര്യ മന്ത്രാലയത്തെയാണ് സമീപിക്കേണ്ടത്. ഇത്തരക്കാരുടെ വിവരങ്ങള് ക്രിമിനല് എവിഡന്സ് വകുപ്പുകളിലേക്കയച്ച് കേസുകളില് ഉള്പ്പെട്ടിട്ടില്ല എന്ന് ഉറപ്പുവരുത്തിയശേഷം താമസകാര്യ വകുപ്പ് ഒരുമാസത്തെ താല്ക്കാലിക ഇഖാമ അനുവദിക്കും. ഇതിനുശേഷം പുതിയ സ്പോണ്സറുടെ കീഴിലേക്ക് മാറുകയോ പിഴകൂടാതെ നാട്ടിലേക്ക് പോകുകയോ ചെയ്യാം.
അപേക്ഷകരുടെ വിവരങ്ങള് മന്ത്രാലയത്തിന്റെ ഡാറ്റാബേസില് ലഭ്യമല്ലെങ്കില് പുതിയ ഫയല് ഉണ്ടാക്കി വിവരങ്ങള് താല്ക്കാലികമായി ഡാറ്റാബേസില് രേഖപ്പെടുത്തണമെന്നും മന്ത്രാലയത്തിന്റെ ഡാറ്റാബേസിലെ വിവരങ്ങളും അപേക്ഷകന്റെ പുതിയ പാസ്പോര്ട്ട് വിവരങ്ങളും തമ്മില് പൊരുത്തക്കേടുകള് ഉണ്ടെങ്കില് പാസ്പോര്ട്ടിനനുസരിച്ച് ഡാറ്റാബേസിലെ വിവരങ്ങള് പുതുക്കണമെന്നും ഉദ്യോഗസ്ഥര്ക്ക് നിര്ദേശം നല്കിയിട്ടുണ്ട്.
https://www.facebook.com/Malayalivartha