കുവൈത്ത് ഫാമിലി വിസ ലഭിക്കുന്നതിന് ശമ്പളപരിധി 250 ദീനാറില്‍നിന്ന് 450 ആക്കി
വിദേശികള്‍ക്ക് കുടുംബവിസ ലഭിക്കണമെങ്കില്‍ അടിസ്ഥാന ശമ്പളം ചുരുങ്ങിയത് 450 ദീനാര്‍ ഉണ്ടായിരിക്കണമെന്ന് ആഭ്യന്തരമന്ത്രാലയത്തിന്റെ ഉത്തരവ്. വിദേശ തൊഴിലാളികളുടെ താമസനിയമത്തില്‍ സുപ്രധാന ഭേദഗതി വരുത്തി ഒന്നാം ഉപപ്രധാനമന്ത്രിയും ആഭ്യന്തരമന്ത്രിയുമായ ശൈഖ് മുഹമ്മദ് അല്‍ ഖാലിദ് അല്‍ ഹമദ് അസ്സബാഹ് പുറപ്പെടുവിച്ച പ്രത്യേക ഉത്തരവിലാണ് ഇതുസംബന്ധിച്ച നിര്‍ദേശമുള്ളത്. നിലവില്‍ 250 ദീനാര്‍ അടിസ്ഥാന ശമ്പളമുള്ള ഏതു വിദേശികള്‍ക്കും കുടുംബവിസ ലഭിക്കുമായിരുന്നു. കുടുംബവിസ ലഭിക്കാനുള്ള ശമ്പളനിരക്ക് ഒറ്റയടിക്ക് 250ല്‍നിന്ന് 450 ആയി ഉയര്‍ത്തിയത് രാജ്യത്തെ റിയല്‍ എസ്‌റ്റേറ്റ് മേഖലയിലും പ്രത്യാഘാതങ്ങള്‍ സൃഷ്ടിക്കും.
അതേസമയം, നിലവില്‍ രാജ്യത്ത് കുടുംബവിസയില്‍ കഴിയുന്നവരെയും ഇവിടെ ജനിച്ച മക്കളെയും ഈ നിബന്ധനയില്‍നിന്ന് ഒഴിവാക്കാന്‍ റെസിഡന്‍ഷ്യല്‍ വകുപ്പ് മേധാവിക്ക് അധികാരമുണ്ടാകും.
സര്‍ക്കാര്‍ മേഖലയില്‍ ജോലിചെയ്യുന്ന നിയമോപദേശകര്‍, ജഡ്ജിമാര്‍, പ്രോസിക്യൂഷന്‍ അംഗങ്ങള്‍, സ്‌കൂള്‍ ഡയറക്ടര്‍മാര്‍, അധ്യാപകര്‍, മനഃശാസ്ത്ര വിദഗ്ധര്‍, ലാബ് ടെക്‌നീഷ്യന്മാര്‍, ആരോഗ്യമന്ത്രാലയത്തിലെ നഴ്‌സുമാര്‍, ആംബുലന്‍സ് ജീവനക്കാര്‍, ഹെല്‍ത്ത് ടെക്‌നീഷ്യന്മാര്‍ എന്നിവര്‍ക്ക് ശമ്പളപരിധി ബാധകമാവില്ല. യൂനിവേഴ്‌സിറ്റി ബിരുദധാരികളായ ധനകാര്യ സാമ്പത്തിക വിദഗ്ധര്‍, എന്‍ജിനീയര്‍മാര്‍, പള്ളി ഇമാമുമാര്‍, ബാങ്കുവിളിക്കുന്നവര്‍, ജുമുഅ പ്രഭാഷകര്‍, ഖുര്‍ആന്‍ മനഃപാഠമുള്ളവര്‍ എന്നിവര്‍ക്കും മിനിമം വേതനം ബാധകമാവില്ല. ഡോക്ടര്‍മാര്‍, ഫാര്‍മസിസ്റ്റുകള്‍, പ്രഫസര്‍മാര്‍ എന്നിവര്‍ക്കും ഇളവുണ്ട്.
മാധ്യമപ്രവര്‍ത്തകര്‍, കായികപരിശീലകര്‍, സ്‌പോര്‍ട്‌സ് യൂനിയനുകള്‍ക്കും ക്‌ളബുകള്‍ക്കും കീഴിലെ കളിക്കാര്‍, പൈലറ്റുമാര്‍, എയര്‍ഹോസ്റ്റസുമാര്‍, മൃതദേഹങ്ങളുടെ സംസ്‌കരണ പ്രവര്‍ത്തനങ്ങള്‍ നടത്തുന്നവര്‍ എന്നിവര്‍ക്കും കുടുംബ വിസ ലഭിക്കുന്നതിന് 450 ദീനാര്‍ ശമ്പളം വേണമെന്ന നിബന്ധന ബാധകമാവില്‌ളെന്നും ഉത്തരവില്‍ പറയുന്നു. സര്‍ക്കാര്‍ ഓഫിസുകളിലെയും യൂനിവേഴ്‌സിറ്റികളിലെയും സെക്രട്ടറിമാര്‍ എന്നിവരും ഈ നിബന്ധനയുടെ പരിധിയില്‍ വരില്ല.
കുടുംബ വിസക്കുള്ള ശമ്പളപരിധി വര്‍ധിപ്പിക്കുമെന്ന് സര്‍ക്കാര്‍ നേരത്തേ സൂചിപ്പിച്ചിരുന്നു. നിയമം പ്രാബല്യത്തില്‍ വരുന്നതോടെ ഇന്ത്യക്കാരും മലയാളികളുമുള്‍പ്പെടെ മിതമായ ശമ്പളത്തിന് ജോലിചെയ്യുന്ന വിദേശികളെയായിരിക്കും നേരിട്ട് ബാധിക്കുക.
https://www.facebook.com/Malayalivartha
