പുരുഷലിംഗവും സ്ത്രീലിംഗവും പിന്നെ മൂന്നാം ലിംഗവും ...കൂടാതെ കംഗാരുവിന് സമാനമായ സഞ്ചിയും ..ശാസ്ത്ര ലോകത്തിന് അത്ഭുതമായ ഈ ജീവിക്ക് ആര്‍സെനിക്ക് എന്ന വിഷത്തെപ്പോലും അതിജീവിക്കാൻ കഴിയുമത്രേ...

കേട്ടാൽ മുത്തശ്ശിക്കഥയിലെ ഫാന്റസി എന്ന് തോന്നിപോകുമെങ്കിലും സംഗതി സത്യമാണ് ..ആണും പെണ്ണും പിന്നെ മൂന്നാം ലിംഗവും കംഗാരുവിന് സമാനമായ സഞ്ചിയുമായി ഒരു ജീവി ജീവിച്ചിരിക്കുന്നു ..മറ്റ് ജീവികള്‍ക്ക് അതിജീവിക്കാന്‍ സാധിക്കാത്ത സാഹചര്യങ്ങളില്‍ ജീവിക്കുന്ന ഇവയ്ക്ക് സ്ത്രീ-പുരുഷ ലിംഗങ്ങൾക്ക് പുറമെ മൂന്നാമതൊരു ലിംഗം കൂടിയുണ്ട് എന്നതാണ് ഏറ്റവും വലിയ പ്രത്യേകത ...

ഒരു ജീവിയില്‍ തന്നെ ആണ്‍ പെണ്‍ ലിംഗത്തിന്‍റെ സ്വഭാവങ്ങള്‍ കാണിക്കുന്ന പ്രതിഭാസങ്ങള്‍ ഒരു പക്ഷെ സാധാരണമാണെന്നു പറയാമെങ്കിലും മൂന്നാമതൊരു ലിംഗത്തിന്റെ സാനിധ്യം കാരണം ശാസ്ത്ര ലോകത്തിന് അത്ഭുതമായിരിക്കുകയാണ് വിര വിഭാഗത്തില്‍പ്പെടുന്ന ഈ ജീവി.

ഇതുകൂടാതെ കംഗാരുവിന് സമാനമായ ഒരു സഞ്ചിയും ഇവയ്ക്കുണ്ട്. അടിയന്തര ഘട്ടങ്ങളില്‍ കുഞ്ഞുങ്ങളെ ഈ സഞ്ചിയിലാക്കിയാണ് ഇവ രക്ഷപ്പെടുന്നത്

കാലിഫോര്‍ണിയയിലെ മോണോ തടാകത്തിലാണ് ഇവയെ കണ്ടെത്തിയിരിക്കുന്നത്. ആര്‍സെനിക് അംശത്തിന്‍റെ അളവ് കൂടിയ വെള്ളത്തില്‍ പോലും ഇവയ്ക്ക് അതിജീവനം സാധ്യമാണെന്നാണ് ഗവേഷകറീ ഏറ്റവും വിസ്മയിപ്പിക്കുന്നത് ..കറന്‍റ് ബയോളജി എന്ന ശാസ്ത്ര സംബന്ധിയായ പ്രസിദ്ധീകരണത്തിലാണ് ഈ വിചിത്ര വിരയെക്കുറിച്ചുള്ള വിവരങ്ങള്‍ പുറത്തുവന്നിരിക്കുന്നത്.

എട്ട് ഇനം വിരകളെയാണ് ഗവേഷകര്‍ പുതിയതായി കണ്ടെത്തിയിരിക്കുന്നത്. ഇതില്‍ ചിലതിന് വേട്ടയാടുന്ന സ്വഭാവമുള്ളവയും മറ്റ് ചിലത് പരാദ സ്വഭാവം പുലര്‍ത്തുന്നതുമാണ്. എക്സ്ട്രീമോഫൈല്‍ വിഭാഗത്തിലാണ് ഇവയെ ഉള്‍പ്പെടുത്തിയിരിക്കുന്നത്. മറ്റ് ജീവികള്‍ക്ക് അതിജീവിക്കാന്‍ കഴിയാത്ത സാഹചര്യങ്ങളില്‍ നിസാരമായി ജീവിക്കുന്നവയാണ് ഇവ.

ഭൂമിക്ക് അടിയിലും അന്‍റാര്‍ട്ടിക് തുന്ദ്രയിലും സമുദ്രാടിത്തട്ടിലും കാണപ്പെടുന്ന വിരകളുടെ വിഭാഗമാണ് ഇപ്പോള്‍ കണ്ടെത്തിയ എട്ട് ഇനം വിരകളും. ജനിതകമായി ഇവയുടെ ഘടനയില്‍ വന്നിട്ടുള്ള മാറ്റങ്ങളെക്കുറിച്ച് പഠനം നടക്കുകയാണ്. അസാധാരണ സാഹചര്യങ്ങളെ അതിജീവിക്കാനുള്ള ഇവയുടെ കഴിവ് മനുഷ്യരാശിക്ക് എത്തരത്തില്‍ പ്രയോജനപ്പെടുത്താമെന്നാണ് ഗവേഷണം.

ഭൂമിയില്‍ സ്വാഭാവികമായി കാണപ്പെടുന്ന വിഷ പദാര്‍ത്ഥമായ ആര്‍സെനിക്കില്‍ പോലും ഇവ അതിജീവിക്കുന്നുവെന്നതാണ് ശാസ്ത്രജ്ഞരെ ഞെട്ടിക്കുന്നത്. ആര്‍സെനിക് അടങ്ങിയ ജലം ഉപയോഗിക്കുന്നത് ഗുരുതര പ്രത്യാഘാതങ്ങള്‍ മനുഷ്യര്‍ക്കുണ്ടാക്കുന്നതാണ്. ഈ വിരകള്‍ ആര്‍സെനികിലെ വിഷാംശത്തെ എങ്ങനെ അതിജീവിക്കുന്നുവെന്ന് കണ്ടെത്തിയാല്‍ മനുഷ്യരില്‍ പല രീതിയിലുണ്ടാവുന്ന വിഷബാധ ചെറുക്കാനാവുമെന്നാണ് ഗവേഷകര്‍ കരുതുന്നത് എന്നും കറന്‍റ് ബയോളജി പ്രസിദ്ധീകരണത്തിൽ പറയുന്നുണ്ട്