ഗര്‍ഭിണിയാണോയെന്ന് ഇനി നിങ്ങളുടെ സ്മാര്‍ട്ട് ഫോണ്‍ പറയും
നിങ്ങള്‍ ഗര്‍ഭിണിയാണോയെന്ന് ഇനി സ്മാര്‍ട്ട് ഫോണിലൂടെ അറിയാം. ജര്‍മനിയിലെ യൂണിവേഴ്‌സിറ്റി ഓഫ് ഹനോവറിലെ ഹനോവര്‍ സെന്റര്‍ ഫോര്‍ ഒപ്ടിക്കല്‍ ടെക്‌നോളജീസിലെ ശാസ്ത്രജ്ഞരാണ് സ്മാര്‍ട്ട് ഫോണുകളില്‍ ഉപയോഗിക്കാവുന്ന ഒപ്ടിക്കല്‍ സെന്‍സര്‍ നിര്‍മ്മിച്ചത്. ഗര്‍ഭിണിയാണോ എന്നറിയുവാനുള്ള പരിശോധനയും പ്രമേഹരോഗ പരിശോധനയും അടക്കം നിരവധി ബയോമോളിക്യുലാര്‍ ടെസ്റ്റുകളില്‍ ഉപയോഗപ്രദമാണ് പുതിയ കണ്ടെത്തല്‍.
സ്മാര്‍ട്ട് ഫോണിലെ ഒരു ആപ്ലിക്കേഷന്‍ ഉപയോഗിച്ച് ഒപ്ടിക് സെന്‍സര്‍ പ്രവര്‍ത്തിപ്പിച്ച് ഫലമറിയാനാവും. രക്തം, മൂത്രം, ഉമിനീര്‍, വിയര്‍പ്പ്, ശ്വാസം തുടങ്ങിയവയും പരിശോധിച്ച് ഫലമറിയുവാനും ഇതേ വിദ്യയിലൂടെ കഴിയും. സെന്‍സര്‍ റീഡിങ്ങുകള്‍ ജിപിഎസ് സിഗ്‌നലുമായി ബന്ധിപ്പിച്ച് ഉപയോക്താക്കളെ തൊട്ടടുത്ത മെഡിക്കല്‍ സ്‌റ്റോറിലേക്കോ ഹോസ്പിറ്റലിലേക്കോ ആമ്പുലന്‍സിലേക്കോ എത്തിക്കാനാവുമെന്നും ഗവേഷകര്‍ പറയുന്നു.
സര്‍ഫേസ് പ്ലാസ്‌മോണ്‍ റെസൊണന്‍സിന്റെ ഒപ്റ്റിക്കല്‍ പ്രതിഭാസമാണ് സെന്‍സറുകളില്‍ ഉപയോഗിച്ചിരിക്കുന്നത്. സാധാരണ ലാബുകളില്‍ ഉപയോഗിക്കുന്ന, സര്‍ഫേസ് പ്ലാസ്‌മോണ്‍ റെസൊണന്‍സ് പ്രയോജനപ്പെടുത്തുന്ന ഉപകരണങ്ങളില്‍ ഒരു ലൈറ്റ് ഡിറ്റക്ടറും പ്രകാശത്തിന്റെ ഒരു ഉറവിടവും ആവശ്യമാണ്. ഇവ രണ്ടും നിലവില്‍ സ്മാര്‍ട്ട് ഫോണുകളിലുണ്ടെന്നതിനാല്‍ ഇവ പ്രയോജനപ്പെടുത്തി ഇത്തരം ടെസ്റ്റുകള്‍ സ്മാര്‍ട്ട് ഫോണുകളില്‍ നടത്താനാവുമെന്നാണ് ഗവേഷകര്‍ പറയുന്നത്. ഒപ്ടിക് എക്‌സ്പ്രസില്‍ പഠനം പ്രസിദ്ധീകരിച്ചിട്ടുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
