പലതരം കാപ്പിച്ചെടികളില്‍ നിന്ന് പല തരത്തില്‍ വ്യത്യസ്തമായ കാപ്പികള്‍ ഉത്പാദിപ്പിക്കുന്നതായി നമുക്കറിയാം. കൃഷി ചെയ്യുന്ന സ്ഥലവും രീതിയും ഒക്കെ അനുസരിച്ച് ഇവയുടെ ഗുണമേന്മയിലും, അതിനാല്‍ത്തന്നെ വിലയിലും മാറ്റം വരാറുമുണ്ട്.

കാപ്പിയെക്കുറിച്ചു പറയുമ്പോള്‍ ലോകത്തില്‍ ഏറ്റവും കൂടുതല്‍ വിലയ്ക്കു വില്‍ക്കുന്ന കാപ്പി ഏതാണെന്നുകൂടി പറയണ്ടേ? \'കോപ്പി ലുവാക്\' എന്ന കാപ്പിക്കാണ് ഏറ്റവും കൂടുതല്‍ വിലയുള്ളത്. അത് ഏത് കാപ്പിവര്‍ഗത്തില്‍ പെട്ടതാണ് എന്ന് ചോദിച്ചാല്‍ ഉത്തരം മുട്ടിപ്പോവുകയേയുള്ളൂ. കാരണം, കോപ്പി ലുവാക് ഏതെങ്കിലും ഒരു പ്രത്യേക തരം കാപ്പിവര്‍ഗം അല്ലെന്നത് തന്നെ.

ദക്ഷിണ ഏഷ്യയിലെ സുമാത്ര, ജാവ തുടങ്ങിയ ദ്വീപുകളില്‍ നിന്നാണ് ഇവ പുറം ലോകത്ത് എത്തുന്നത്. ഇവിടെ മാത്രം കണ്ടുവരുന്ന ഏഷ്യന്‍ പാം സിവറ്റ് എന്ന മാര്‍ജാരവര്‍ഗത്തില്‍പ്പെട്ട ജീവിയാണ് ഈ കാപ്പിക്ക് ഇത്രയും വിലയുണ്ടാകുവാന്‍ കാരണം. കാപ്പിയാണ് ഇവയുടെ ഇഷ്ടഭക്ഷണം.

എന്നാല്‍, കാപ്പിക്കുരുവിന്റെ പുറമേയുള്ള മാംസളമായ ഭാഗം മാത്രമേ ഇവ തിന്നുകയുള്ളൂ. ഇവയുടെ വയറ്റില്‍ എത്തുന്ന കാപ്പിക്കുരുവില്‍ ചില എന്‍സൈമുകളും മറ്റും പ്രവര്‍ത്തിക്കുമെങ്കിലും ഇവയുടെ വിസര്‍ജ്യത്തില്‍ ഈ കാപ്പിക്കുരു അഴുകാതെ കിടക്കും. ഈ കാപ്പിക്കുരു എടുത്ത് സംസ്‌കരിച്ചാണ് കോപ്പി ലുവാക് ആയി മാറ്റുന്നത്. എന്താ ഇപ്പൊ ഒരു കപ്പ് കോപ്പി ലുവാക് കുടിക്കാന്‍ തോന്നുന്നുണ്ടോ?

കോപ്പി ലുവാക് പ്രശസ്തമായതോടെ ഈ ജീവികള്‍ ലുവാക് ക്യാറ്റ് എന്നും അറിയപ്പെടാന്‍ തുടങ്ങി. നല്ല കാപ്പിക്കുരു നോക്കി തിന്നാന്‍ തിരഞ്ഞെടുക്കുന്നതില്‍ സവിശേഷ സാമര്‍ത്ഥ്യം ഉള്ളവയാണ് ഈ ജീവികള്‍ എന്നതും ഇവയുടെ ആമാശയത്തില്‍ വച്ച് നടക്കുന്ന രാസപ്രക്രിയകളും ആണ് ഈ കാപ്പിയെ സവിശേഷമാക്കുന്നത്. ഒരു കിലോഗ്രാം കോപ്പി ലുവാക് വാങ്ങണമെങ്കില്‍ 700 യു.എസ്. ഡോളര്‍ എങ്കിലും കുറഞ്ഞത് നല്‍കേണ്ടിവരും. അതായത് ഏകദേശം 45,000 ഇന്ത്യന്‍ രൂപ.

കോപ്പി ലുവാകിന് ആവശ്യക്കാര്‍ ഏറിയതോടെ കഷ്ടത്തിലായത് പാവം ഈ ജീവികളാണ്. സുമാത്രയിലും മറ്റും ലുവാക് ക്യാറ്റുകളെ വന്‍തോതില്‍ പിടിച്ച് കൂട്ടില്‍ അടച്ചുസൂക്ഷിക്കുന്ന സ്ഥലങ്ങള്‍ ഉണ്ടത്രേ. കാപ്പിക്കുരു പെറുക്കാന്‍ കാടുകേറി നടക്കുന്ന ബുദ്ധിമുട്ട് ഒഴിവാക്കാമല്ലോ!

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha