അര്‍ദ്ധനഗ്‌നയായ യുവതി കുരിശിന് ചുവട്ടില്‍ ബിക്കിനി ധരിച്ച് പോസ് ചെയ്ത് നില്‍ക്കുന്ന പരസ്യം വിവാദത്തില്‍. തങ്ങളുടെ ബിക്കിനി ബ്രാന്‍ഡിന് യേശുക്രിസ്തുവിനേക്കാള്‍ ആയുസുണ്ടെന്നും 38 വര്‍ഷങ്ങള്‍ പിന്നിട്ടുവെന്നും അവകാശപ്പെട്ട് ഒരു ബിക്കിനി ബ്രാന്‍ഡ് നല്‍കിയ പരസ്യമാണ് വന്‍ വിവാദത്തിലായിരിക്കുന്നത്. ടാബു കമ്പനിയാണ് പരസ്യം നല്‍കിയിരിക്കുന്നത്. ക്രിസ്തുമത വിശ്വാസികളും പുരോഹിതന്മാരും പരസ്യം നല്‍കിയ താബു കമ്പനിക്കെതിരെ കടുത്ത എതിര്‍പ്പുമായി രംഗത്തെത്തിയിട്ടുണ്ട്. കമ്പനിയുടെ മുപ്പത്തെട്ടാം വാര്‍ഷികം പ്രമാണിച്ച് പുറത്തിറക്കിയ ചൂടന്‍ പോസ്റ്റര്‍ സ്വിറ്റ്‌സര്‍ലാന്റില്‍ ഉടനീളം സ്ഥാപിച്ചിട്ടുണ്ട്.

മതപരമായ വിശ്വാസത്തെ ഹനിക്കുന്നതാണ് ഈ പരസ്യമെന്ന് സ്വിസ് ഇവാന്‍ജെലിക്കല്‍ അലയന്‍സ് വക്താവായ തോമസ് ഹാനിമാന്‍ പറയുന്നു. അസംബന്ധങ്ങള്‍ നിറഞ്ഞ പരസ്യമാണിതെന്നും അദ്ദേഹം ചൂണ്ടിക്കാട്ടുന്നു. ജീസസിന്റെ പേരുപയോഗിച്ച് ശ്രദ്ധ നേടാമെന്നാണ് ടാബു കമ്പനി പ്രതീക്ഷിച്ചിരുന്നതെന്നും എന്നാല്‍ അതിനവര്‍ക്ക് സാധിച്ചിട്ടില്ലെന്നാണ് താന്‍ കരുതുന്നതെന്നും സൂറിച്ചിലെ കത്തോലിക്ക് ചര്‍ച്ചിന്റെ കമ്മ്യൂണിക്കേഷന്‍ ആന്റ് കള്‍ച്ചറിന്റെ ചുമതലയുള്ള സൈമന്‍ സ്‌പെന്‍ഗ്ലര്‍ പറയുന്നു.

അതേസമയം, ടെക്‌സ്‌റ്റൈല്‍ പ്രൊഡക്ഷനിലെ ധാര്‍മികതയ്ക്ക് വേണ്ടി പോരാടുന്ന കമ്പനിയാണ് തന്റേതെന്നാണ് ബിക്കിനി കമ്പനിയുടെ ഉടമയായ ഗിയാനി ഡെ നിക്കോള പ്രതികരിക്കുന്നത്. ഇപ്പോഴത്തെ പരസ്യത്തിലെ മോഡല്‍ തന്റെ മകളായ വലേറിയ ഡി നിക്കോളയാണെന്നും അദ്ദേഹം വെളിപ്പെടുത്തി. തങ്ങളുടെ പുതിയ ക്യാപെയിനിന് പോസിറ്റീവ് ആയ ഫീഡ്ബാക്കാണ് ലഭിച്ചുകൊണ്ടിരിക്കുന്നതെന്നും ഇതിനു മുമ്പും കമ്പനി ഇത്തരം വിവാദ പരസ്യങ്ങളുടെ പേരില്‍ വാര്‍ത്തകളില്‍ നിറഞ്ഞിട്ടുണ്ടെന്നും കമ്പനി ഉടമയായ ഗിയാനി ഡെ നിക്കോള പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha