47 വര്ഷമായി വാര്ത്തകള് എത്തിച്ച് വാര്ത്താതാരമായ പുള്ളിക്കാനം ബസിന് സ്വീകരണമൊരുക്കുന്നു നാട്ടുകാര്
പുലര്കാല സമയത്ത് ചൂടുള്ള വാര്ത്തകളുമായി കല്ലും മണ്ണും നിറഞ്ഞതും വളഞ്ഞുപുളഞ്ഞു കിടക്കുന്നതുമായ റോഡിലൂടെ കിഴക്കന് മലയോരമേഖലയിലേക്ക് സര്വ്വീസ് നടത്തിയിരുന്ന ആനവണ്ടി സര്വീസിന് ഇപ്പോള് 47 വയസ്. കോട്ടയത്തുനിന്നു പാലാ, ഈരാറ്റുപേട്ട വഴി കടന്നുപോകുന്ന ഏറ്റവും പഴക്കം ചെന്ന ബസ് സര്വീസുകളിലൊന്നും മലയോര മേഖലയിലേക്കുള്ള ആദ്യകാല ബസുമാണു പത്രവണ്ടി എന്നറിയപ്പെടുന്ന പുള്ളിക്കാനം ബസ്.
കോട്ടയം-വാഗമണ് സര്വീസിനു തുടക്കമാകുന്നത് 1971-ലാണ്. അക്കാലത്ത് വാഗമണ് റൂട്ടിലോടിയിരുന്ന സ്വകാര്യ ബസ് വിദ്യാര്ഥികളെ കയറ്റാന് കഴിയാത്തതിനാല് രാവിലെ 8.30നുള്ള വാഗമണ്- ഈരാറ്റുപേട്ട ട്രിപ്പ് നിര്ത്തലാക്കി. വെള്ളികുളം സ്കൂളിലെ കുട്ടികള്ക്കടക്കം യാത്രാ സൗകര്യം ഇല്ലാതായി. ഇതോടെ സ്കൂളിലെ ഹെഡ്മാസ്റ്ററുടെ നേതൃത്വത്തില് ഒരു പറ്റം ആളുകള് കെഎസ്ആര്ടിസി സര്വീസിനായി തിരുവനന്തപുരത്തേക്ക് യാത്രതിരിച്ചു.
അന്നത്തെ പൂഞ്ഞാര് എംഎല്എയും ഗതാഗത മന്ത്രിയുമായിരുന്ന കെ.എം. ജോര്ജിനെ വിവരം ധരിപ്പിക്കുകയും മന്ത്രി ഇടപെട്ട് കോട്ടയം ഡിപ്പോയില് നിന്നു വാഗമണിലേക്ക് ബസ് ആരംഭിക്കുകയുമായിരുന്നു. പാലാ, ഈരാറ്റുപേട്ട ഡിപ്പോകള് അന്ന് നിലവിലില്ലായിരുന്നു.പുതുതായി തുടങ്ങിയ കെഎസ്ആര്ടിസി ബസിന് രാജകീയ സ്വീകരണമാണ് വഴിനീളെ ഒരുക്കിയിരുന്നത്. പുള്ളിക്കാനം എസ്റ്റേറ്റ് തൊഴിലാളികളുടെ സൗകര്യാര്ഥം ബസ് പിന്നീട് പുള്ളിക്കാനത്തേക്ക് നീട്ടി.
സര്വീസ് നിന്നുപോകാതിരിക്കാനായി യാത്ര ചെയ്യാതെ ആളുകള് വെറുതെ ടിക്കറ്റ് എടുക്കുന്നതു പതിവായിരുന്നുവെന്നു പഴമക്കാര് പറയുന്നു. 47 വര്ഷമായി ഓടുന്ന ഈ ബസ് അന്നും ഇന്നും പത്രവണ്ടി' എന്നാണ് അറിയപ്പെടുന്നത്. കോട്ടയത്തുനിന്നും രാവിലെ ബസ് എടുത്താല് നിറയെ പത്രക്കെട്ടുകളാണ്. ഏറ്റുമാനൂര് തൊട്ട് പുളളിക്കാനം വരെയുള്ള സ്ഥലങ്ങളിലേക്കുള്ള അമ്പതിലധികം പത്രക്കെട്ടുകള് കാണും സീറ്റിനടിയില്. തിരിച്ച് പുള്ളിക്കാനം പോസ്റ്റ് ഓഫീസിലേതടക്കം എഴുത്തുകള് കോട്ടയം ഹെഡ് പോസ്റ്റ് ഓഫീസിലേക്ക് എത്തിക്കുന്നതും ഈ ബസില് തന്നെ.
പാലാ ഡിപ്പോ ആരംഭിച്ചപ്പോള് പാലായില്നിന്നും പിന്നീട് ഈരാറ്റുപേട്ട ഡിപ്പോയില്നിന്നുമാണ് ബസ് ഓപ്പറേറ്റ് ചെയ്യുന്നത്. അക്കാലത്ത് ബസിലെ ജീവനക്കാര് യാത്രക്കാര്ക്ക് കുടുംബാംഗങ്ങളെ പോലെയായിരുന്നു. പുള്ളിക്കാനം എസ്റ്റേറ്റിലേക്കുള്ള തൊഴിലാളികളായിരുന്നു കൂടുതലും ബസിലെ യാത്രക്കാര്. തമിഴ്നാട്ടില്നിന്നും ട്രെയിനിലെത്തുന്ന തൊഴിലാളികള് പുലര്ച്ചെ കോട്ടയത്തെ സ്റ്റാന്ഡില് നിന്നും പുള്ളിക്കാനം ബസില് കയറിയാണ് എസ്റ്റേറ്റിലെത്തിയിരുന്നത്. പുലര്ച്ചെ 4.15-ന് കോട്ടയത്തുനിന്നും പുറപ്പെടുന്ന ബസ് 7.30-നു പുള്ളിക്കാനത്ത് എത്തും.ഉച്ചകഴിഞ്ഞ് 3.25-ന് ഈരാറ്റുപേട്ടയില്നിന്നും പുള്ളിക്കാനത്തിനു പുറപ്പെടുന്ന ബസ് തിരിച്ച് 5.40-നു പുള്ളിക്കാനത്തുനിന്നും കോട്ടയത്തേക്കു പുറപ്പെടും.
പതിനായിരം രൂപയ്ക്കു മുകളില് ഇപ്പോഴും ബസിനു കളക്ഷനുണ്ട്. പത്രവണ്ടി എന്ന ഓമനപ്പേരിലറിയപ്പെടുന്ന പ്രിയപ്പെട്ട ബസിന് വാഗമണില് സ്വീകരണം നല്കാനൊരുങ്ങുകയാണ് നാട്ടുകാര്.
https://www.facebook.com/Malayalivartha