ക്രിസ്മസ് കഥ പറയുന്നിടത്ത് മലബാറിനെന്തു കാര്യം? പൊതുവേ മലബാറില്‍ ഡിസംബറിന്റെ തണുപ്പാണ് ക്രിസ്മസ് ആഘോഷങ്ങള്‍ക്കും. അങ്ങനെ മലബാറിന് ക്രിസ്മസ് ഒരു വലിയ ആഘോഷമല്ലെങ്കിലും, പക്ഷേ മലയാളനാട്ടില്‍ ആദ്യമായൊരു കേക്കുണ്ടാക്കിയത് മലബാറുകാരാണ്.

അന്ന് മധ്യകേരളവും തിരുവിതാംകൂറും മാത്രം രാജഭരണത്തിലായിരുന്നു. മലബാറുകാര്‍ ബ്രിട്ടീഷുകാരുടെ ഭരണത്തിന്‍ കീഴിലും. തലങ്ങും വിലങ്ങും നടക്കുന്ന വെള്ളക്കാരെകണ്ടു പരിചയിച്ചവരാണ് അന്നേ മലബാറുകാര്‍. ബ്രൗണ്‍ എന്ന സായിപ്പിന് കണ്ണൂര്‍ അഞ്ചരക്കണ്ടിയില്‍ തോട്ടമുണ്ടായിരുന്നു. സായിപ്പിനു വേണ്ടി വിശേഷരുചികള്‍ തയാറാക്കിനല്‍കിയിരുന്നത് മാമ്പള്ളി ബാപ്പുവാണ്.

ഒരിക്കല്‍ ബാപ്പുവിന് സായിപ്പ് ഒരു കഷ്ണം കേക്കു നല്‍കി. അതുപോലൊരു കേക്ക് നിര്‍മിച്ചുതരാമോ എന്നു ചോദിച്ചുവത്രേ. അതേ തുടര്‍ന്ന് ബാപ്പു ഉണ്ടാക്കിയ കേക്ക് സായിപ്പിനെ ഞെട്ടിച്ചു. അത്ര രുചിയുള്ള കേക്ക് ഈ ജന്മത്തു കഴിച്ചിട്ടില്ലെന്ന് സായിപ്പ് പറഞ്ഞു.

ഇംഗ്ലണ്ടില്‍ കേക്കിന്റെകൂട്ടു തയാറാക്കാന്‍ റമ്മാണ് ഉപയോഗിച്ചിരുന്നത്. പക്ഷേ ബാപ്പു ആ കൂട്ടൊന്നു മാറ്റിപ്പിടിച്ചു. അന്നും ഇന്നും മലബാറില്‍ കശുമാവുകള്‍ സുലഭമായിരുന്നു. കശുമാങ്ങ പറിച്ചെടുത്ത് വാറ്റിയ ചാരായമാണ് ബാപ്പു കേക്കിന്റെ കൂട്ടില്‍ ചേര്‍ത്തതെന്നത് അങ്ങാടിപ്പാട്ടാണ്.

ബാപ്പുവിന്റെ കേക്കില്‍ മയങ്ങിയ സായിപ്പ് ഉടന്‍ ഒരു ഡസന്‍ കേക്കു കൂടി നിര്‍മിക്കാന്‍ ബാപ്പുവിനോട് ആവശ്യപ്പെട്ടുവത്രേ. മമ്പള്ളി ബാപ്പുവാണ് 1880-ല്‍ കേരളത്തിലാദ്യമായി ഒരു ബേക്കറി തുടങ്ങിയത്. തലശ്ശേരിയിലെ മമ്പള്ളി ബേക്കറിയില്‍ തുടങ്ങിയ പാരമ്പര്യം തലമുറകളിലൂടെ കേരളം മുഴുവന്‍ ഒഴുകിപ്പരന്നു. ബാപ്പുവിന്റെ മകന്‍ ഗോപാലന്‍ കോഴിക്കോട്ട് മിഠായിത്തെരുവില്‍ മോഡേണ്‍ ബേക്കറി തുറന്നു. കൊച്ചിയില്‍ കൊച്ചിന്‍ ബേക്കറിയും തിരുവനന്തപുരം പുളിമൂട്ടില്‍ ശാന്ത ബേക്കറിയും നാഗര്‍കോവിലില്‍ ടോപ്‌സ് ബേക്കറിയും മധ്യതിരുവിതാംകൂറില്‍ ബെസ്റ്റ് ബേക്കറിയുമായി വ്യാപിച്ചതായാണ് ചരിത്രം.

ഇംഗ്ലിഷ് പത്രം വാങ്ങാന്‍ കൊച്ചി രാജാവിന്റെ കൊട്ടാരത്തില്‍നിന്നു വരുന്ന കാര്‍ മമ്പള്ളിക്കാരുണ്ടാക്കുന്ന ബ്രഡ്ഡും വാങ്ങിയാണ് എന്നും തിരിച്ചുപോവുക. മൗണ്ട് ബാറ്റണ്‍ അടക്കമുള്ള വൈസ്രോയിമാര്‍ക്ക് ഒരുക്കിയ പാര്‍ട്ടിയില്‍ രുചി വിളമ്പിയ ചരിത്രവും മമ്പള്ളിക്കാര്‍ക്കുണ്ട്. ഇത്തവണ ക്രിസ്മസിനു കേക്കു മുറിച്ചു കഴിക്കുമ്പോള്‍ അഭിമാനത്തോടെ ഈ ചരിത്രവും ഓര്‍ക്കാം.