ശബരിമല ദര്ശനത്തിനെത്തിയ പ്രവാസിയുടെ പഴ്സ് 'പറന്നു'പോയത് ഒരു ലക്ഷം രൂപയുടെ കനേഡിയന് ഡോളറുമായി; എന്നാല് യാത്ര മുടങ്ങാതിരുന്നത് നാദിര്ഷയുടെ സത്യസന്ധത മൂലം!
ശബരിമല ദര്ശനത്തിനായി കാനഡയില് നിന്നെത്തിയ അമര്നാഥ് നെടുമ്പാശേരിയിലാണ് വിമാനമിറങ്ങിയത്. അദ്ദേഹം ടാക്സിയില് ആലുവ റെയില്വേ സ്റ്റേഷന് സ്ക്വയറിലെത്തി. ഡ്രൈവര്ക്കു പോക്കറ്റ് മണി നല്കാന് എടുത്ത പഴ്സ് കാറിനു മുകളില് വച്ചു മറന്നു. പിന്നീട് മുറിയില് എത്തിയപ്പോഴാണ് അക്കാര്യം ഓര്മ വന്നത്.
ഉടന് പൊലീസില് അറിയിച്ചു. എസ്ഐ മുഹമ്മദ് ബഷീര് റെയില്വേ സ്റ്റേഷന് പരിസരത്തെ സിസിടിവി ദൃശ്യങ്ങള് പരിശോധിച്ചപ്പോള് പഴ്സുമായി കാര് നീങ്ങുന്നതു കണ്ടു. കാറുമായി ബന്ധപ്പെട്ട് അന്വേഷണങ്ങള് നടത്തിയെങ്കിലും ഓടുന്ന കാറിനു മുകളില് നിന്നു പഴ്സ് എവിടെയെങ്കിലും വീണുപോയോയെന്ന് വ്യക്തമായില്ല.
ഇതിനിടെയാണ് തോട്ടുമുഖം പള്ളിക്കുഴി നാദിര്ഷ സ്റ്റേഷനില് എത്തിയത്. കോഴിക്കട നടത്തുന്ന നാദിര്ഷയും സുഹൃത്തുക്കളും റോഡില് നില്ക്കുമ്പോഴാണ് ഓടുന്ന കാറിനു മുകളില് നിന്നു പഴ്സ് കണ്മുന്നില് പറന്നുവീണത്.
ഒരു ലക്ഷം രൂപയുടെ കനേഡിയന് ഡോളര്, 25,000 ഇന്ത്യന് രൂപ, 5 ഡെബിറ്റ് കാര്ഡുകള്, കാനഡയിലെ ഡ്രൈവിങ് ലൈസന്സ്, ഹെല്ത്ത് കാര്ഡ് തുടങ്ങിയവയായിരുന്നു പഴ്സിനുള്ളില്. റോഡിന്റെ പല ഭാഗത്തു ചിതറി വീണ നോട്ടുകള് നാദിര്ഷയും കൂട്ടുകാരും പെറുക്കിയെടുത്തു പൊലീസ് സ്റ്റേഷനില് എത്തിച്ചു.
അപ്പോള് തന്നെ അമര്നാഥിനെ വരുത്തി കൈമാറി. സന്തോഷസൂചകമായി അമര്നാഥ് 100 കനേഡിയന് ഡോളര് നാദിര്ഷയ്ക്കു സമ്മാനിച്ചു. കണ്ണൂര് പരിയാരം സ്വദേശി അമര്നാഥ്, ശബരിമല ദര്ശനത്തിന് 5 ദിവസത്തേക്ക് കാനഡയില് നിന്നെത്തിയതാണ്. 21 വര്ഷമായി അവിടെ ചാര്ട്ടേഡ് അക്കൗണ്ടന്റാണ് അമര്നാഥ്.
സ്വന്തമായി വീടില്ലാത്ത നാദിര്ഷ വാടക വീട്ടിലാണ് കഴിയുന്നത്.
https://www.facebook.com/Malayalivartha
