ഹോട്ടലില്‍ പോയി ഭക്ഷണം കഴിക്കുക, അതുകൊണ്ട് പോക്കറ്റിലേക്ക് കാശ് വരുക...ഇത് രണ്ടും കൂടി ഒരുമിച്ച് നടക്കുമെന്ന് തോന്നുന്നില്ല! ഹോട്ടലില്‍ കയറി കഴിച്ചാല്‍ പോക്കറ്റില്‍ നിന്നും കാശ് പോകാറാണ് പതിവ്. എന്നാല്‍ റിക്ക് ആന്റോഷ് എന്ന ന്യൂജേഴ്‌സിക്കാരന്റെ കാര്യത്തില്‍ ആ പതിവ് തെറ്റി. എങ്ങനെയെന്നല്ലേ?

ഈ മാസം ആദ്യമാണ് സംഭവം നടന്നത്. ഒരു ദിവസം ഉച്ചയ്ക്ക് വിശന്നപ്പോള്‍ ഭക്ഷണം കഴിക്കാനായി റിക്ക് കയറിയത് ന്യൂയോര്‍ക്കിലെ ഗ്രാന്‍ഡ് സെന്‍ട്രല്‍ ഒയിസ്റ്റര്‍ ബാറിലാണ്. ചെന്നയുടന്‍ തന്നെ, കഴിക്കാനായി ഒയിസ്റ്റര്‍ (മുത്തുച്ചിപ്പി) പാന്‍ റോസ്റ്റും ഓര്‍ഡര്‍ ചെയ്തു. പിന്നെയാണ് നാടകീയ സംഭവങ്ങളുടെ തുടക്കം.

കഴിച്ചു തുടങ്ങിപ്പോള്‍ കട്ടിയുള്ള എന്തിലോ കടിച്ചു. പല്ലിളകി പോന്നതോ ഫില്ലിങ് അടര്‍ന്നു പോയതോ ആണെന്നാണ് റിക്ക് കരുതിയത്. പല്ലില്‍ തട്ടിയ സാധനം വായില്‍ നിന്ന് പുറത്തെടുത്തു നോക്കി. മുത്തുച്ചിപ്പിക്കുള്ളില്‍ ഒളിഞ്ഞിരുന്ന അപൂര്‍വമായ മുത്താണ് റിക്കിന് ലഭിച്ചതെന്ന് മനസ്സിലായ റിക്ക് ഞെട്ടി.

റസ്റ്ററന്റ് ജീവനക്കാരോട് അപ്പോഴൊന്നും പറഞ്ഞില്ലെങ്കിലും പിന്നീട് ഫോണ്‍ വിളിച്ച് റിക്ക് കാര്യങ്ങളന്വേഷിച്ചു. കഴിഞ്ഞ ഇരുപത്തിയെട്ട് വര്‍ഷത്തിനിടയില്‍, റസ്റ്ററന്റില്‍ വിളമ്പിയ ഒയിസ്റ്ററിനുള്ളില്‍ നിന്ന് ഒരിക്കല്‍ മുത്ത് ലഭിച്ചിരുന്നുവെന്ന് റിക്കിനോട് ജീവനക്കാര്‍ വ്യക്തമാക്കി. അപ്പോള്‍ മുത്ത് ലഭിക്കുന്ന രണ്ടാമത്തെയാള്‍ താനാണെന്ന് റിക്കിനു മനസ്സിലായി.

റിക്ക് ആന്റോഷിനു ലഭിച്ച മുത്തിന് അധികം വലിപ്പമൊന്നുമില്ല. പയറുമണിയുടെ ആകൃതിയിലുള്ള മുത്തിന് മുകളിലായി ചെറിയ കറുത്ത പാടുമുണ്ട്. മുത്തിനു മുകളിലുള്ള ചെറിയ കറുത്ത പാടുകള്‍ പലതും മായ്ക്കാന്‍ കഴിയുന്നവയാണെന്ന് മുത്ത് വ്യാപാരികള്‍ വ്യക്തമാക്കി. മുത്തിന്റെ കൃത്യമായ വില നിശ്ചയിക്കുന്നത് അതിന്റെ തിളക്കവും ആകൃതിയുമൊക്കെ അടിസ്ഥാനമാക്കിയാണ്.

റിക്കിന് ലഭിച്ച മുത്തിന്റെ മതിപ്പുവില ഏകദേശം രണ്ടരലക്ഷത്തിലധികമാണ്. ആയിരം രൂപയുടെ ഭക്ഷണം കഴിക്കാനിറങ്ങിയ റിക്ക് ആന്റോഷിനെ ഭാഗ്യദേവത കടാക്ഷിച്ചത് മുത്തിന്റെ രൂപത്തിലാണ്. എന്തായാലൂം ഇനിയും ഇവിടെയെത്തി ഭാഗ്യം പരീക്ഷിക്കാന്‍ തന്നെയാണ് റിക്ക് ആന്റോഷിന്റെ തീരുമാനം.