മലയാളികളുടെ പ്രിയഭക്ഷണങ്ങളുടെ ലിസ്‌റ്റെടുത്താല്‍ മുമ്പിലുണ്ടാകും പൊറോട്ടയുടെ സ്ഥാനം. കേരളത്തില്‍ മാത്രമല്ല അങ്ങ് ദുബായിലുമുണ്ട് പൊറോട്ടയ്ക്കു പിടി. ഈ പൊറോട്ട പ്രണയം കണക്കിലെടുത്ത് ദുബായിലെ ആദാമിന്റെ ചായക്കടയില്‍ വ്യത്യസ്തമായൊരു പൊറോട്ട അവതരിപ്പിച്ചിരിക്കുകയാണ്.

ബുര്‍ജ് ഗീ പൊറോട്ട എന്നാണ് ഈ പുതിയ വിഭവത്തിന്റെ പേര്, ദുബായിലെ ഏറ്റവും ഉയരം കൂടിയ കെട്ടിടമായ ബുര്‍ജ് ഖലീഫയില്‍ നിന്നു പ്രചോദനമുള്‍ക്കൊണ്ടാണ് ഈ പേരു വന്നതെന്ന് പ്രത്യേകം പറയേണ്ടല്ലോ. ബുര്‍ജ് എന്നാല്‍ ടവര്‍ എന്നാണര്‍ഥം. ടവറിനു സമാനമാണ് ഇവിടെ വിളമ്പുന്ന പൊറോട്ടയും. ഇന്നുവരെ കണ്ടതില്‍ വച്ചേറ്റവും നീളമേറിയ പൊറോട്ടയാണ് ഇവര്‍ അവതരിപ്പിക്കുന്നത്.

നീളത്തില്‍ നിരത്തിവച്ചിരിക്കുന്ന വാഴയിലകളിലേക്കാണ് പൊറോട്ട പകരുന്നത്. ആദാമിന്റെ ചായക്കടയിലെ ഷെഫുമാരായ അരുണും നിതിനും അഫ്‌സറുമാണ് ഈ കിടിലന്‍ പൊറോട്ടയുടെ കണ്ടുപിടിത്തത്തിനു പിന്നില്‍.
ഏഴ് അടിയും അഞ്ച് അടിയും നീളമുള്ള പൊറോട്ടകളാണ് പ്രധാനമായും ഇവിടെ ഉണ്ടാക്കുന്നത്. ഏഴടി നീളമുള്ള പൊറോട്ട പത്തോ പതിനഞ്ചോ പേരടങ്ങിയ സംഘത്തിനും അഞ്ചടി നീളമുള്ള പൊറോട്ട നാലോ അഞ്ചോ പേരടങ്ങുന്നവര്‍ക്കും കഴിക്കാം.

ദുബായിലെ ആഘോഷങ്ങളുടെ കാലമെത്തിയതോടെ എന്തെങ്കിലും സ്‌പെഷലായി ചെയ്യാം എന്ന ചിന്തയില്‍ നിന്നാണ് ബുര്‍ജ് പൊറോട്ടയിലേക്ക് എത്തിച്ചേര്‍ന്നതെന്ന് ആദാമിന്റെ ചായക്കടയുടെ സ്ഥാപകനും സിഇഒയുമായ അനീസ് ആദം പറയുന്നു.

ദുബായില്‍ ക്രിസ്മസ്, ന്യൂ ഇയര്‍ ഷോപ്പിംഗ് ഫെസ്റ്റിവല്‍ ഒക്കെ തുടങ്ങുന്ന സമയമായതുകൊണ്ട് ആദാമിന്റെ ചായക്കടയില്‍ സ്‌പെഷല്‍ ആയി എന്തെങ്കിലും കൊണ്ടുവരണമെന്ന് തീരുമാനിച്ചിരുന്നു. അങ്ങനെയാണ് ബുര്‍ജ് പൊറോട്ട എന്ന ആശയത്തിലേക്കെത്തുന്നത്. ഏറ്റവും നീളമേറിയ പൊറോട്ട എന്നാണ് ഉദ്ദേശിക്കുന്നത്. ഷെഫുമാരായ അരുണും നിതിനുമാണ് ആശയവും ഇതിന്റെ മിക്സിങ്ങുമൊക്കെ കണ്ടുപിടിച്ചത്. സാധാരണയായി പൊറോട്ട കഴിക്കരുതെന്നു ചൂണ്ടിക്കാട്ടി പലരും പറയുന്ന ആരോഗ്യ പ്രശ്‌നങ്ങളൊന്നും ഉണ്ടാകാത്ത വിധമാണ് ബുര്‍ജ് പൊറോട്ട ഉണ്ടാക്കുന്നതെന്നും അദ്ദേഹം പറയുന്നു.

നിരവധി ഗവേഷണം നടത്തിയതിനു ശേഷമാണ് ഈ പൊറോട്ട ഉണ്ടാക്കാന്‍ തീരുമാനിച്ചത്. പാല സാഫ്രണ്‍ മില്‍ക്ക്, നെയ്യ്, ആല്‍മണ്ട് പേസ്റ്റ് എന്നിവ ചേര്‍ത്താണ് ഇതുണ്ടാക്കുന്നത്. നെയ്യിലാണ് പൊറോട്ട റോസ്റ്റ് ചെയ്‌തെടുക്കുന്നത്, അതു കൊണ്ട് ക്രിസ്പിയായ പൊറോട്ടയാണ് ഉണ്ടാകുന്നത്, ആദം പറയുന്നു.