മിസിസ് മഹാരാഷ്ട്രാപട്ടം അന്വേഷിച്ച് പോകേണ്ടയാള് വന്ന് മിസിസ്സ് കേരളയായതിനെ കുറിച്ച് എന്തുപറയാന്...?
മുംബൈയില് നിന്ന് 25 കൊല്ലം മുന്പു കുടുംബത്തോടൊപ്പം തൃശൂരിലേക്കു ജീവിതം പറിച്ചുനട്ട സിന്ധി പെണ്കുട്ടി, മലയാളി പെണ്കൊടികളെ മറികടന്നു മിസിസ് കേരളയായി.
കേരള സാരിയും അന്നനടയും. രണ്ടും റോമയ്ക്കു ശീലമുള്ളതല്ല. ഹൈ ഹീല് ചെരുപ്പണിഞ്ഞു റാംപില് നടന്നുള്ള മുന്പരിചയവുമില്ല. ആകെ കയ്യിലുള്ളത് പച്ച മലയാളവും കട്ട ആത്മവിശ്വാസവും. രണ്ടും തരാതരം ഉപയോഗിച്ച റോമ മന്സൂറിന് (32) മിസിസ് കേരള പുരസ്കാരം.
വസ്ത്രവ്യാപാരിയായ അച്ഛന് സുന്ദറിനും അമ്മ ലതയ്ക്കുമൊപ്പമാണ് റോമയും കേരളത്തിലേക്കു ജീവിതം പറിച്ചുനട്ടത്. തൃശൂര് ഹോളിഫാമിലി, കാല്ഡിയന് എന്നിവിടങ്ങളില് വിദ്യാഭ്യാസം. വൃത്തിയായി മലയാളം പറയാനും എഴുതാനും ശീലിച്ചതോടെ മാതൃഭാഷ മലയാളവും മാതൃനാട് കേരളവുമായി.
നര്ത്തകിയെന്ന നിലയില് അറിയപ്പെട്ടു തുടങ്ങിയപ്പോഴേക്കും 2011-ല് വിവാഹം കഴിഞ്ഞു. കുടുംബവും നോക്കി കുട്ടികളെയും വളര്ത്തി റോമയെ വീട്ടിലിരുത്താന് മന്സൂര് തയാറായിരുന്നില്ല. ആക്ടീവ് ആകൂ എന്ന ഭര്ത്താവിന്റെ ഉപദേശം സ്വീകരിച്ച് സൂംബ നൃത്തം ആരംഭിച്ചു.രണ്ടരവര്ഷം മുന്പ് നൃത്തപരിശീലനത്തില് ലൈസന്സ് എടുത്തു. പൂങ്കുന്നത്തെ ജോഷീസ് അള്ട്ടിമേറ്റ് ജിമ്മില് സൂംബ നൃത്ത ക്ലാസെടുത്തു തുടങ്ങി. ഒപ്പം ഫിറ്റ്നസ് പരിശീലനവും.
മിസിസ് കേരള ബോള്ഡ് ആന്ഡ് ബ്യൂട്ടിഫുള് മത്സരത്തെക്കുറിച്ചു കേട്ടതോടെ രണ്ടും കല്പ്പിച്ചിറങ്ങി. കേരള സാരിയുടുക്കാന് പഠിച്ചു, ഷൂസ് ധരിച്ചു ശീലിച്ച കാലുകളില് ഹൈ ഹീല് ചെരുപ്പണിഞ്ഞ് അന്നനടത്തം പരിശീലിച്ചു. ഫലം ഒന്നാം സ്ഥാനം ഒപ്പം പോന്നു.വിവാഹശേഷം വീട്ടില് കുത്തിയിരിക്കുന്നതില് 'ത്രില്' ഇല്ലെന്നു തോന്നിയ നിമിഷത്തിനു റോമ ഇപ്പോള് നന്ദി പറയുന്നു. റോമയുടെ മകള് മെഹക് ബേബി ക്വീന് മത്സരത്തില് ജേത്രിയാണ്.
https://www.facebook.com/Malayalivartha
