രോഗിയുമായി എത്തിയപ്പോള്‍ കോട്ടയം നഗരത്തിലെ ഗതാഗതക്കുരുക്കില്‍ അകപ്പെട്ടു പോയ ആംബുലന്‍സിന് വഴിയൊരുക്കിയ പോലീസുകാരന്‍ വെള്ളിത്തിരയിലേക്ക്. കോട്ടയം എആര്‍ ക്യാംപിലെ സിവില്‍ പോലീസ് ഓഫീസറും ഏറ്റുമാനൂര്‍ കണ്‍ട്രോള്‍ റൂമിലെ പോലീസുകാരനുമായ രഞ്ജിത്കുമാര്‍ രാധാകൃഷ്ണനാണ് ആംബുലന്‍സിന് വഴിയൊരുക്കി സോഷ്യല്‍മീഡിയയില്‍ ശ്രദ്ധാകേന്ദ്രമായത്. തുടര്‍ന്ന് അദ്ദേഹത്തെ തേടി ഗുഡ് സര്‍വീസ് എന്‍ട്രിയും എത്തിയിരുന്നു.

ആടുപുലിയാട്ടം, തോപ്പില്‍ ജോപ്പന്‍, കുട്ടനാടന്‍ മാര്‍പാപ്പ എന്നീ സിനിമകള്‍ നിര്‍മിച്ച നൗഷാദ് ആലത്തൂര്‍ നിര്‍മിക്കുന്ന 'വൈറല്‍ 2019' എന്ന സിനിമയിലൂടെയാണ് രഞ്ജിത് കുമാര്‍ രാധാകൃഷ്ണന്‍ വെള്ളിത്തിരയിലേക്ക് അരങ്ങേറ്റം കുറിക്കുന്നത്. ഡിസംബര്‍ 26-ന് വൈകുന്നേരം 5.30നാണു ഗുരുതരാവസ്ഥയിലുള്ള രോഗിയുമായി അലാറം മുഴക്കി ആംബുലന്‍സ് എംസി റോഡിലുടെ പുളിമൂട് ജംഗ്ഷനില്‍ എത്തുന്നത്. ഈ സമയം ജീപ്പില്‍ പോകുകയായിരുന്ന രഞ്ജിത്കുമാര്‍ മറ്റൊന്നും നോക്കാതെ ഗതാഗതക്കുരുക്കില്‍ കിടന്ന മറ്റു വാഹനങ്ങള്‍ ഇരുവശങ്ങളിലേക്കും മാറ്റാന്‍ നിര്‍ദേശം നല്കി ആംബുലന്‍സിനു കടന്നു പോകാന്‍ വഴിയൊരുക്കുകയായിരുന്നു.

എംസി റോഡില്‍ ബിഎസ്എന്‍എല്‍ ഓഫീസ് മുതല്‍ പുളിമൂട് ജംഗ്ഷനിലൂടെ തിരുനക്കര മൈതാനം വരെ ഓടിയാണ് ആ ഭാഗത്ത് റോഡിലുണ്ടായിരുന്ന വാഹനങ്ങള്‍ ഇരുവശത്തേക്കും മാറ്റി ആംബുലന്‍സ് കടത്തിവിട്ടത്. ആംബുലന്‍സ് കടത്തിവിടുന്ന ദൃശ്യം ആംബുലന്‍സില്‍ ഉണ്ടായിരുന്നവരില്‍ ആരോ മൊബൈലില്‍ പകര്‍ത്തി സോഷ്യല്‍ മീഡിയായിലുടെ പ്രചരിപ്പിച്ചതോടെയാണ് സംഭവം വൈറലായത്.

സോഷ്യല്‍മീഡിയയിലൂടെ പ്രശസ്തി നേടിയ വ്യക്തികളെയും സംഭവങ്ങളെയും ആധാരമാക്കിയൊരുക്കുന്ന ചിത്രത്തില്‍ ജീവിക്കാനായി മീന്‍ വില്‍ക്കേണ്ടി വന്ന ഹനാനും അഭിനയിക്കുന്നുണ്ട്. എട്ട് നവാഗത സംവിധായകര്‍ ചേര്‍ന്ന് സംവിധാനം ചെയ്യുന്ന ചിത്രത്തിന്റെ സംവിധായകരെയും തിരക്കഥാകൃത്തുകളെയും തെരഞ്ഞെടുത്തത് സോഷ്യല്‍മീഡിയയിലെ ജനകീയ വോട്ടെടുപ്പിലൂടെയാണ്.