അടിച്ചു മാറ്റലുകളുടെ ഈ ലോകത്ത് തനിക്ക് കിട്ടിയ അഭിനന്ദനങ്ങള് യഥാര്ഥ അവകാശിക്ക് പങ്കുവച്ചുകൊണ്ട് ആല്വിന് പറയുന്നു, ആ വരികള് എന്റേതല്ല!
ആല്വിന് ഇമ്മട്ടിയാണ് ടിക്ടോക്കിലെ ഇപ്പോഴത്തെ താരം. കക്ഷിയെ വൈറല് ആക്കിയതാരെന്നോ, നമ്മുടെ സ്വന്തം കലക്ടര് ബ്രോ പ്രശാന്ത് ഐഎഎസും. ബാഹുബലിയിലെ ധീവര... എന്ന പേരില് പ്രശസ്തമായ ഗാനത്തിന്, നമ്മള് സ്വപ്നത്തില് പോലും കാണാത്ത മലയാളം വരികളുമായി ടിക്ടോക്കില് എത്തിയ ആല്വിനെ കലക്ടര് ബ്രോ സ്വന്തം എഫ്ബി വാളിലേക്ക് ചേര്ത്തു.
ഹര്ത്താലിന്റെ കാര്യത്തില് മലയാളികള് സ്വീകരിച്ചിരിക്കുന്ന സമീപനത്തെപ്പറ്റി പറഞ്ഞു, ആര് എന്ത് പറഞ്ഞാലും നമുക്ക് കേള്ക്കാന് ഇഷ്ടമുള്ളതേ ചിലര് കേള്ക്കൂ. മനസ്സിലാക്കൂ... എന്ന് കുറിച്ച കലക്ടര് ബ്രോ, അസംഘടിതമേഖലയില് തൊഴിലെടുക്കുന്നവര്ക്ക് ഹര്ത്താലുകള് ഉയര്ത്തുന്ന മാനസിക സംഘര്ഷങ്ങള് ചൂണ്ടിക്കാട്ടിക്കൊണ്ട്, അവരുടെ ആശങ്കകള് അടുത്തറിയുന്നവര് അതേക്കുറിച്ച് പറഞ്ഞ് മനസ്സിലാക്കാന് ശ്രമിക്കുമ്പോള് കാട്ടുന്ന നിഷേധാത്മകനിലപാടുകളെ കുറിച്ച് നിരാശയോടെ പരാമര്ശിക്കുകയാണ് ഇങ്ങനെ; അവര്ക്ക് ജീവന് മരണ പ്രശ്നമാണ് തൊഴിലും അതില്ലാതാക്കുന്ന നിര്ബന്ധിത സമരങ്ങളും. സഹികെട്ട് അതൊന്ന് പറഞ്ഞ് പോയാലോ, ചിലരുടെ കര്ണ്ണപുടത്തില് ശബ്ദതരംഗമായി അത് പതിയുന്നത് വേറെന്തോ ആയിട്ടാണ്. മനസ്സിലാക്കേണ്ടതിന്റെ ആവശ്യകതയെ ഊന്നിപ്പറയാന് കൂടെ ഉദാഹരണമായി ചേര്ത്തത് ആല്വിന് ഇമ്മട്ടി ചെയ്ത ധീവര എന്ന ഗാനത്തിന്റെ ടിക് ടോക് വീഡിയോ ആയിരുന്നു.
ഇത്രയും വലിയ ഫിലോസഫി ഇത്രയും ലളിതമായി പറഞ്ഞ് തന്ന ആല്വിന് ഇമ്മട്ടിക്ക് അഭിനന്ദനം എന്ന് കലക്ടര് കുറിക്കുക കൂടി ചെയ്തപ്പോള്, ആല്വിന് അതിന് കമന്റ് രൂപത്തില്, അഭിനയം മാത്രമേ എന്റേതുള്ളൂ വരികള് മറ്റാരുടെയോ ആണ് എന്നറിയിച്ചു. ആ സത്യസന്ധമായ ഉത്തരത്തിനു കയ്യടിച്ച ജനങ്ങള് ആല്വിനെ വൈറല് ആക്കി. അമേരിക്കയിലെ ഫ്ലോറിഡയില് മൂന്നാം സെമസ്റ്റര് നഴ്സിംഗ് വിദ്യാര്ഥിയാണ് ആല്വിന്. നാട്ടില് തൃശൂര് ആണ് സ്വദേശം. കഴിഞ്ഞ ഒരു വര്ഷമായി ടിക് ടോക്കില് സജീവമായ ആല്വിന് നടന്നതൊക്കെയും ഒരത്ഭുതം എന്ന് വിചാരിക്കാനേ കഴിയുന്നുള്ളൂ.
''നേരമ്പോക്കിന് വേണ്ടി ഇടക്കിടക്കു ടിക് ടോക്ക് വീഡിയോകള് ചെയ്യാറുണ്ട്. എന്നാല് വൈറല് ആയി മാറിയത് ഇപ്പോഴാണ്. കലക്ടര് ബ്രോയുടെ ഒരു ആരാധകനാണ് ഞാന്. അതുകൊണ്ട് തന്നെ അദ്ദേഹം എന്റെ വീഡിയോ ഷെയര് ചെയ്തുകണ്ടപ്പോള് വലിയ സന്തോഷമായി.
കളക്ടര് ബ്രോയുടെ കുറിപ്പ് ഇങ്ങനെ:
വിളിച്ചതാരായാലും ഹര്ത്താല് നന്നായാ മതി എന്ന ഉദാത്ത ചിന്തയാണ് പലര്ക്കും. ഏതാനും മാസങ്ങളായി കേരളം സഹിക്കാവുന്നതിനും അപ്പുറത്തെ കോപ്രായങ്ങള് കാണുന്നു, സഹിക്കുന്നു. നിര്ബന്ധിതമായി കായികബലം ഉപയോഗിച്ച് അടിച്ചേല്പ്പിക്കുന്ന ബഹളങ്ങള്ക്കും സമരങ്ങള്ക്കുമിടയില് ചവിട്ടിമെതിക്കപ്പെടുന്നവന് നമ്മുടെ കണ്ണില് പെടാത്തത് കൊണ്ടാണ് കാര്യത്തിന്റെ ഗൗരവം മനസ്സിലാവാത്തത്.
നിര്ബന്ധിത ഹര്ത്താലും ബന്ദും അന്നന്നത്തെ കഞ്ഞിക്ക് വകയുണ്ടാക്കുന്നവന്റെ, ദിവസക്കൂലിക്കാരന്റെ വയറ്റത്താണ് അടിക്കുന്നത്. അസംഘടിതനാണവന്. ഇന്ത്യയിലെ ഏറ്റവും കൂടുതല് തൊഴിലാളികളും കച്ചവടക്കാരും സേവനമേഖലയില് പ്രവര്ത്തിക്കുന്നവരും അസംഘടിതരാണ്. അവര്ക്ക് ജീവന് മരണ പ്രശ്നമാണ് തൊഴിലും അതില്ലാതാക്കുന്ന നിര്ബന്ധിത സമരങ്ങളും. സഹികെട്ട് അതൊന്ന് പറഞ്ഞ് പോയാലോ, ചിലരുടെ കര്ണ്ണപുടത്തില് ശബ്ദതരംഗമായി അത് പതിയുന്നത് വേറെന്തോ ആയിട്ടാണ്. കമ്മിസംഘികോങ്ങിസുടാപ്പി മുദ്രകുത്തല് യോജന തുടങ്ങുകയായി. ഈ പാവങ്ങള് പറയുന്നത് ജീവിക്കാന് അനുവദിക്കണം എന്നാണ്. വേറൊന്നുമല്ല.
ആര് എന്ത് പറഞ്ഞാലും നമുക്ക് കേള്ക്കാന് ഇഷ്ടമുള്ളതേ ചിലര് കേള്ക്കൂ. മനസ്സിലാക്കൂ. അതുകൊണ്ടാണ് ഈയിടെയായി ഒന്നും പറയാത്തത്.
ഇത്രയും വലിയ ഫിലോസഫി ഇത്രയും ലളിതമായി പറഞ്ഞ് തന്ന ആല്വിന് ഇമ്മട്ടിക്ക് അഭിനന്ദനം.
ബ്രോസ്വാമി
ആല്വിന് ഇമ്മട്ടി തുടര്ന്ന് പറയുന്നു, ഇവിടെ സൗത്ത് ഫ്ലോറിഡ മുഴുവന് ഞാന് ഇപ്പോള് താരമായി മാറിയിരിക്കുകയാണ്. ഇവിടുത്തെ മലയാളികളുടെ കടുത്ത പിന്തുണയുണ്ട്. നാട്ടിലും എല്ലാവരും തികഞ്ഞ പ്രോത്സാഹനമാണ്. ഭാവിയില് സിനിമയില് കയറണം എന്നാണ് ആഗ്രഹം. അഭിനയ മോഹിയായതിനാലാണ് ഇത്തരത്തില് വീഡിയോകള് ചെയ്യാന് തുടങ്ങിയത്. അതിനെല്ലാം മികച്ച പ്രതികരണം ലഭിക്കുന്നു എന്നതില് സന്തോഷം'' ആല്വിന് ഇമ്മട്ടി പറയുന്നു.
പഠനശേഷം സിനിമ മോഹം വളരെ ഗൗരവമായി മുന്നോട്ട് കൊണ്ട് പോകാനാണ് ആല്വിന് ആഗ്രഹിക്കുന്നത്. ഒപ്പം ആ പാട്ടിന് കളക്ടര് ബ്രോ പറഞ്ഞത്ര വലിയ ഫിലോസഫി ഉണ്ടെന്ന് താന് അറിഞ്ഞിരുന്നില്ല എന്നും പാട്ടിന്റെ മലയാളം വരികള് എഴുതിയ വ്യക്തി ആരായാലും അദ്ദേഹത്തിന് തനിക്ക് ലഭിച്ച അഭിനന്ദനങ്ങള് താന് പങ്കുവയ്ക്കുന്നു എന്നും ആല്വിന് പറയുന്നു.അടിച്ചു മാറ്റലുകളുടെ ഈ ലോകത്ത് തനിക്ക് കിട്ടിയ അഭിനന്ദനങ്ങള് യഥാര്ഥ അവകാശിക്ക് പങ്കുവച്ചുകൊണ്ട് ആല്വിന് മാതൃകയാവുകയാണ്.
https://www.facebook.com/Malayalivartha
