പ്രളയവഴികള് അതിജീവിച്ച് പിറന്നവനു പേരിട്ടു, നോഹ
അമ്മയുടെ ഉദരത്തില് കിടന്നു പ്രളയവഴികള് താണ്ടിയ കുഞ്ഞിന് അവരിട്ട പേര് നോഹ. ബൈബിളിലെ പ്രളയസ്മൃതികളില് അതിജീവനത്തിന്റെ പേരുകുറിച്ച നോഹയുടെ നാമം. പ്രസവവേദനയുടെ കടുത്തുനില്ക്കവേ വെള്ളം കയറിയ വീട്ടില്നിന്നു വാഹനത്തിലും കൂട്ടിക്കെട്ടിയ വഞ്ചിയിലും കിടന്ന് ആശുപത്രിയിലേക്ക് നടത്തിയ യാത്ര കുഞ്ഞുനോഹയുടെ അമ്മ ഗ്രീനയ്ക്കും ഭര്ത്താവ് ബാബു ഡിനോയ്ക്കും മറക്കാനാവില്ല.
അവര്ക്കു മുന്നില് മാലാഖമാരെപ്പോലെ സഹായമൊരുക്കിയ നാട്ടുകാര്ക്കും ആ നിമിഷങ്ങള് അവിസ്മരണീയം. പ്രതിസന്ധികളെ തോല്പിച്ചു തുഴഞ്ഞുനീങ്ങിയപ്പോള് കാരുണ്യമായും സ്നേഹമായും കൂട്ടുചേര്ന്ന അനേകരോടു നന്ദിയര്പ്പിച്ചായിരുന്നു കഴിഞ്ഞ ദിവസം നോഹയുടെ മാമ്മോദീസ.
പ്രളയം ആരംഭിച്ചപ്പോഴെ മൂഴിക്കുളം കണ്ണമ്പുഴ ബാബുവിന്റെ വീട്ടില് വെള്ളം കയറിയിരുന്നു. പ്രസവസമയം അടുത്ത ഗ്രീനയുമായി ദുരിതാശ്വാസ ക്യാംപിലേക്കു പോകേണ്ടെന്നു തീരുമാനിച്ചാണ് മൂഴിക്കുളത്തുനിന്നു വാഹനത്തില് ആശുപത്രിയിലേക്കു യാത്ര തുടങ്ങിയത്.
കുട്ടമശേരിയിലെത്തിയപ്പോഴേക്കും വാഹനങ്ങള് പോകാനാവാത്ത വിധം റോഡില് ജലനിരപ്പുയര്ന്നു. പ്രതിസന്ധിയിലായ ഗ്രീനയ്ക്കും കുടുംബത്തിനും തോമസ് ചീരകത്തില് എന്നയാള് തന്റെ വീട്ടില് അഭയമൊരുക്കി.പ്രസവവേദന കൂടിയതോടെ നാട്ടുകാര് ഒത്തുചേര്ന്ന് രണ്ടു വഞ്ചികള് കൂട്ടിക്കെട്ടി അതില് കട്ടില് കെട്ടിവച്ചു പൂര്ണഗര്ഭിണിയായ ഗ്രീനയെ അതിലേക്കു മാറ്റി.
ആശുപത്രി ലക്ഷ്യമാക്കിയുള്ള തുഴച്ചിലില് നാട്ടുകാര് പിന്തുണയായി. പൊയ്ക്കാട്ടുശേരി വരെയുള്ള രണ്ടു കിലോമീറ്റര് ദൂരം വള്ളത്തില്. ശേഷം വാഹനത്തില് അങ്കമാലിയിലെ എല്എഫ് ആശുപത്രിയിലേക്ക്. മണിക്കൂറുകള്ക്കകം സുഖപ്രസവം.
സോഫ്റ്റ് വെയര് എന്ജിനിയറാണ് ബാബു ഡിനോ. ഗ്രീന നഴ്സാണ്. മൂഴിക്കുളം സെന്റ് മേരീസ് ഫൊറോന പള്ളിയിലായിരുന്നു നോഹയുടെ മാമ്മോദീസ. കുറുമശേരി ബെര്ട്ടോണി ആശ്രമത്തിലെ ഫാ. ജോബി തയ്യില് കാര്മികനായി.
https://www.facebook.com/Malayalivartha
