ഗ്രാമവാസികള് മുതലയ്ക്ക് ക്ഷേത്രം നിര്മിക്കുന്നു, മുതലയുടെ ശവസംസ്കാരത്തിന് എത്തിയത് 500 ഗ്രാമവാസികള്
ചത്തീസ്ഗഡിലെ ബെമെത്ര ജില്ലയിലെ ബാവമൊഹാത്ര ഗ്രാമത്തിലെ കുളത്തില് ചത്തു പൊങ്ങിയ മുതലയെ അടക്കം ചെയ്യാന് ഒത്തു കൂടിയത് 500 ഗ്രാമവാസികള്. ദൈവത്തിന്റെ അവതാരമായാണ് ഗ്രാമവാസികള് ഈ മുതലയെ കണ്ടിരുന്നത്.
ഏകദേശം 130 വയസ് കണക്കാക്കപ്പെടുന്ന ഈ മുതലയ്ക്ക് ഗംഗാരാം എന്ന പേരാണ് ഗ്രാമവാസികള് ഇട്ടിരുന്നത്. ആചാരപരമായ ചടങ്ങുകള്ക്കു ശേഷമാണ് ഗ്രാമവാസികള് മുതലയുടെ സംസ്ക്കാരം നടത്തിയത്.
മുതല കിടന്നിരുന്ന കുളത്തിലാണ് ഗ്രാമവാസികളെല്ലാം കുളിച്ചിരുന്നത്. ആരെയും ഉപദ്രവിക്കുവാന് മുതല ശ്രമിച്ചിരുന്നില്ലെന്നും കുട്ടികള്ക്കു പോലും ഗംഗാരം പ്രിയപ്പെട്ടവനായിരുന്നുവെന്നും എല്ലാവരും ദൈവത്തിന്റെ അവതാരമായാണ് ഗംഗാരാമിനെ കണ്ടിരുന്നതെന്നും ഗ്രാമവാസികളിലൊരാള് പറഞ്ഞു.
ഗ്രാമവാസികള് നല്കുന്ന അരിയും മറ്റ് ഭക്ഷണങ്ങളുമാണ് ഗംഗാരം കഴിച്ചിരുന്നത്. ആരെങ്കിലും കുളത്തില് നീന്താന് ഇറങ്ങിയാല് ഗംഗാരം കുളത്തിന്റെ ഒരു വശത്തേക്കു മാറി കിടക്കുമായിരുന്നു.
250 കിലോഗ്രാം ഭാരമുണ്ടായിരുന്ന മുതലയെ സംസ്ക്കരിക്കുവാന് വനംവകുപ്പ് അധികൃതര് ഗ്രാമവാസികള്ക്ക് അനുമതി നല്കിയിരുന്നു. ഗംഗാരാമിന്റെ ഓര്മയ്ക്ക് ക്ഷേത്രം നിര്മിക്കുവാനുള്ള തീരുമാനത്തിലാണ് ഗ്രാമവാസികളെല്ലാവരും.
https://www.facebook.com/Malayalivartha