യുദ്ധ ഭൂമിയായ സിറിയയിലെ 'മഞ്ഞ പ്രേമി'
കഴിഞ്ഞ 35 വര്ഷങ്ങളായി ഒരേ ഒരു നിറമുള്ള വസ്ത്രം മാത്രം ധരിച്ച് ശ്രദ്ധനേടുകയാണ് യുദ്ധഭൂമിയായ സിറിയയിലെ അലെപ്പോ സ്വദേശിയായ ഒരു 68-വയസുകാരന്. ഒരു നിറമുള്ള വസ്ത്രം മാത്രം എല്ലാ ദിവസവും ധരിക്കുകയെന്നത് കുറച്ച് ബുദ്ധിമുട്ടുള്ള കാര്യമാണെന്ന് ആരും സമ്മതിക്കും.
1983-ലാണ് മഞ്ഞ നിറമുള്ള വസ്ത്രം മാത്രമേ ധരിക്കൂ എന്ന തീരുമാനം അബു സ്വീകരിക്കുന്നത്.മഞ്ഞ എന്നാല് സ്നേഹത്തിന്റെ പ്രതീകമാണെന്നാണ് ഞാന് വിശ്വസിക്കുന്നതെന്നാണ് അബു വാദിക്കുന്നത്. അദ്ദേഹം താമസിക്കുന്ന മുറിയില് പോലും മഞ്ഞ മയമാണെന്നാണ് റിപ്പോര്ട്ടുകള് സൂചിപ്പിക്കുന്നത്. അടിവസ്ത്രങ്ങള്, തൊപ്പി, പാദരക്ഷകള്, കുട എന്തിനേറെ പറയണം ഉപയോഗിക്കുന്ന മൊബൈല് ഫോണിന്റെ കവര് പോലും മഞ്ഞ നിറമായിരിക്കണമെന്ന് അബുവിന് നിര്ബന്ധമാണ്.
എന്നാല് ഈ മഞ്ഞ സ്നേഹം കാരണം ഇദ്ദേഹം അല്പ്പം ബുദ്ധിമുട്ടുകളും അനുഭവിച്ചിട്ടുണ്ട്. കാരണം മഞ്ഞ വസ്ത്രം മാത്രം ധരിച്ച് എപ്പോഴും പൊതുനിരത്തുകളില് പ്രത്യക്ഷപ്പെടുന്ന ഇദ്ദേഹം സിറിയയുടെ പ്രസിഡന്റായ ബാഷര് അല് ആസാദിന്റെ ചാരനാണെന്ന് കുറച്ചാള്ക്കാര് പറയുമ്പോള് ഭീകരസംഘടനകളായ ഐഎസ്ഐഎസ്, അല്ക്വയ്ദ എന്നിവരുമായി ഇദ്ദേഹത്തിന് ബന്ധമുണ്ടെന്നാണ് മറ്റ് കുറച്ചാള്ക്കാര് പറയുന്നത്.
വര്ഷങ്ങള്ക്കു മുന്പ് 2013-ല് സിറിയന് ലിബറേഷന് ആര്മി അംഗങ്ങള് ഈ മഞ്ഞ മനുഷ്യനെ മര്ദ്ദിക്കുന്നതിന്റെ ദൃശ്യങ്ങള് വൈറലായി മാറിയിരുന്നു. എന്തിനാണ് നീ മഞ്ഞ വസ്ത്രം ധരിക്കുന്നതെന്നും ആര്ക്കു വേണ്ടിയാണ് നീ ചാരവൃത്തി ചെയ്യുന്നതെന്നുമായിരുന്നു ഇവരുടെ ചോദ്യം.
പൊതുനിരത്തുകളില് കൂടി നടക്കുമ്പോള് ആളുകള് എന്റെ അടുക്കല് എത്തുകയും ഫോട്ടോ എടുക്കുകയും ചെയ്യുമെന്ന് അബു പറയുന്നു. തന്റെ മരണം വരെ മഞ്ഞ നിറമുള്ള വസ്ത്രമല്ലാതെ മറ്റൊന്നും ധരിക്കില്ലെന്ന് അബു ഉറപ്പിച്ചു പറയുകയാണ്.
https://www.facebook.com/Malayalivartha