യുഎസ് പ്രസിഡന്റിന്റെ ഔദ്യോഗിക വസതിയായ വൈറ്റ്ഹൗസിനുള്ളിലെ 'ഓവല്‍ ഓഫിസ്' ആണ് പ്രസിഡന്റിന്റെ ഔദ്യോഗിക ഓഫിസ്. യുഎസിലെ ഓവല്‍ ഓഫിസിനുള്ളിലെ മരമേശയ്ക്കു വലിയൊരു ചരിത്രമുണ്ട്.

ബ്രിട്ടിഷ് നാവികസേനയിലെ റിയര്‍ അഡ്മിറല്‍ സര്‍ ജോണ്‍ ഫ്രാങ്ക്‌ലിനും കൂട്ടരും, 19-ാം നൂറ്റാണ്ടിന്റെ മധ്യത്തില്‍, യൂറോപ്പില്‍നിന്ന് ആര്‍ട്ടിക്കില്‍കൂടി പസിഫിക് സമുദ്രത്തിലെത്താനുള്ള വഴി കണ്ടുപിടിക്കാന്‍ യാത്ര തിരിച്ചു. നിര്‍ഭാഗ്യവശാല്‍, അവരുടെ കപ്പല്‍ മഞ്ഞിലുറഞ്ഞുപോയി. പട്ടിണി, ക്ഷയം, വിഷബാധ, തണുപ്പ് ഇങ്ങനെ പല കാരണങ്ങളാല്‍ സംഘാംഗങ്ങളെല്ലാം കൊല്ലപ്പെട്ടു. ഇതറിയാതെ, ഈ സംഘത്തെ കണ്ടെത്താനായി ബ്രിട്ടന്‍ പലരെയും അയച്ചുകൊണ്ടിരുന്നു.

ഇത്തരത്തിലൊരു ആര്‍ട്ടിക് പര്യവേഷണത്തിനായി പ്രത്യേകം രൂപകല്‍പന ചെയ്ത ബ്രിട്ടിഷ് നാവികക്കപ്പലായിരുന്നു എച്ച്എംഎസ് റെസൊല്യൂട്ട്. പര്യവേഷണത്തിനിടയില്‍ മഞ്ഞില്‍ പുതഞ്ഞുപോയതിനാല്‍ 1854-ല്‍ ഈ കപ്പലും നാവികര്‍ക്ക് ഉപേക്ഷിക്കേണ്ടിവന്നു. (കോളനിക്കാലത്തെ ഒരു ബ്രിട്ടിഷ് യുദ്ധക്കപ്പല്‍ നിര്‍മിക്കാന്‍ 2,000 മരങ്ങള്‍ വരെ വേണ്ടിവന്നിരുന്നു. നമ്മുടെ മഴക്കാടുകളിലേക്ക് അവര്‍ തീവണ്ടിപ്പാതകളും നിലമ്പൂരില്‍ തേക്കിന്‍തോട്ടങ്ങളും ഉണ്ടാക്കിയത് എന്തിനാണെന്ന് ഇപ്പോള്‍ മനസ്സിലായില്ലേ?).

1855-ല്‍ അമേരിക്കക്കാരനായ ജോര്‍ജ് ഹെന്റി എന്ന തിമിംഗലവേട്ടക്കാരന്‍, കടലില്‍ ഒരു കപ്പല്‍ ഒഴുകി നടക്കുന്നതു കണ്ടെത്തി. മഞ്ഞിലുറഞ്ഞുപോയ സ്ഥലത്തുനിന്ന് 1900 കിലോമീറ്റര്‍ ദൂരെ ഒഴുകിയെത്തിയ എച്ച്എംഎസ് റെസൊല്യൂട്ട് ആയിരുന്നു അത്! ആളുകളൊന്നുമില്ലാതെ വിജനമായ ആ കപ്പലില്‍ തന്റെ സംഘാംഗങ്ങളില്‍ പകുതിപ്പേരുമായി യാത്രതുടങ്ങിയ ജോര്‍ജ് ഹെന്റി, ക്രിസ്മസ് തലേന്ന് കപ്പല്‍ അമേരിക്കയില്‍ എത്തിച്ചു.

യുഎസ് - ബ്രിട്ടന്‍ ബന്ധം വല്ലാതെ വഷളായിക്കൊണ്ടിരിക്കുന്ന സമയമായിരുന്നു അത്. മറ്റൊരു യുദ്ധത്തിന്റെ സാധ്യതകളെപ്പറ്റിയുള്ള ചര്‍ച്ച നിറഞ്ഞുനില്‍ക്കുന്ന അന്തരീക്ഷം. നയതന്ത്ര ബന്ധങ്ങളൊക്കെ അവസാനിപ്പിച്ച് എംബസികള്‍ പൂട്ടി സ്ഥാനപതിമാരെ യുഎസ്, ബ്രിട്ടനിലേക്ക് തിരിച്ചയച്ചു കഴിഞ്ഞിരുന്നു.

റെസൊല്യൂട്ടിനെ സര്‍ക്കാര്‍ വാങ്ങി കേടുപാടുകള്‍ തീര്‍ത്ത് ബ്രിട്ടനു മടക്കി നല്‍കണമെന്ന ആശയം സെനറ്ററായിരുന്ന ജെയിംസ് മുറേ മേസണ്‍ മുന്നോട്ടുവച്ചു. അതുവഴി ബ്രിട്ടനുമായുള്ള ബന്ധം തിരിച്ചുപിടിക്കാമെന്ന അദ്ദേഹത്തിന്റെ നിര്‍ദേശം അംഗീകരിക്കപ്പെട്ടു. അങ്ങനെ, 1856 ഡിസംബര്‍ 13-ന് കപ്പല്‍ ബ്രിട്ടനിലെത്തിച്ചു വിക്ടോറിയ രാജ്ഞിക്കു നല്‍കി. യുദ്ധസമാനമായ അന്തരീക്ഷത്തിന് അയവുവന്നു. ഇരുരാജ്യങ്ങള്‍ക്കുമിടയിലെ സമ്മര്‍ദങ്ങള്‍ ലഘൂകരിക്കാന്‍ ഈ 'കപ്പല്‍ നയതന്ത്രം' വലുതായി സഹായിച്ചു.

1879-ല്‍ എച്ച്എംഎസ് റെസൊല്യൂട്ട് വിരമിച്ചു. കപ്പല്‍ പൊളിച്ചപ്പോള്‍ ലഭിച്ച തടി ഉപയോഗിച്ച് ഏതാനും മേശകളുണ്ടാക്കി. തങ്ങളുടെ കപ്പലിനെ രക്ഷിച്ച് തിരിച്ചേല്‍പിച്ചതിനുള്ള സ്‌നേഹോപഹാരമായി, ഈ മേശകളില്‍ വലുതൊരെണ്ണം 1880-ല്‍ യുഎസ് പ്രസിഡന്റിന് സമ്മാനിക്കുകയും ചെയ്തു. അന്നുമുതല്‍ മൂന്നു പ്രസിഡന്റുമാരൊഴികെ എല്ലാവരും ഈ മേശ ഉപയോഗിച്ചു. ഒട്ടേറെ ചരിത്ര സംഭവങ്ങള്‍ക്കു സാക്ഷിയായി ഓവല്‍ ഓഫിസില്‍ കിടക്കുന്ന ഈ മരമേശ 'റെസൊല്യൂട്ട് ഡെസ്‌ക്' എന്നറിയപ്പെടുന്നു.